DOMINGO UNDÉCIMA SEMANA ORDINARIA

DOMINGO UNDÉCIMA SEMANA ORDINARIA

Ko’ágã ñahendúta Tupã Ñandejára ñe’ẽ Éxodo arandukápe oĩ háicha   19, 1b-6a

Israelgua oguahẽ yvy ojeiko’ỹháme Sinaí pegua. Osẽ hikuái Refidímgui ha oguahẽvo Sinaípe opyta upépe yvyty rovái.

Moisés ojupi Tupã rendápe ha Ñandejára ohenói yvytýgui ha he’i ichupe: Ere kóicha Israel guápe:

“Pehechama ajapo va’ekue Egiptoguare  ha mba’éichapa po  mo’ã ha pogueru che rendápe. Pejapo ramo añetehápe che ha’éva, ha ñaĩ ramo oñondive oñoñe’ẽme, peëta che retã tee opa tetã apytépe. Che mba’e ramo jepe ko yvy tuichakue. Peëta chéve guarã tetã ipa’i rekóva, ha heko marangatúva.

Tupä Ñandejára Ñe’ẽ.

SALMO ÑEMBOHOVÁI   99,1b-3.5

Opavave: Ñande ningo Tupä Ñandejára mba’e

    ha ijovechañu.

Tojeguerohory Tupãme ko yvy tuichakue

Pejapo ichupe hembipota vy’apópe

Peguahë hendápe purahéi pópe. O.

Peikuaa porãke Ñandejaraha hína Tupã

Ha’e ñande apohare hañande imba’e

Hetäygua ha ijovechañu. O.

Imba’e porãitépa Tupã

Iporiahuvereko tapiaite

Ha iñe’ë me’ë opa ára guarã. O.

Ñahendúta Tupä Ñandejára Ñe’ẽ San Pablo ohai va’ekue Roma guápe      5, 6-11

Che pehenguekuéra: Jaikuaa pe ñande reko yma, ojehupi hague kurusu rehe Jesucrísto  ndive, pe ñande reko vaikue oñehundi haguã ha ndajaiko véima haguã angaipa apo poguýpe.

Peteĩ omano ramo niko ojei pe angaipa apógui. Ñande ñamano ramo Jesucrísto  ndive, jajerovia hendive avei jaikovetaha. Jaikuaa, oikove jevývo Jesucrísto  nomano mo’ã veimaha. Pe mano ndaipu’aka mo’ãvéima hese. Jesucrísto , omanóvo, omano angaipápe guarã, ha oikovévo, oikove Tupãme guarã. Upéicha avei peẽ, pejerereko omanóva ramo angaipápe guarã, ha oikovéva ramo Tupãme guarã, Jesucrísto  ndive pejoaju rupi.

Tupä Ñandejára Ñe’ẽ.

ALELUIA Mc 1, 15

Aleluia.

“Oguahẽma upe ára oje’e va’ekue, ha Tupã sãmbyhy hi’aguĩma.

Pejevy Tupã gotyoha perovia pe marandu porã”.

Aleluia.

EVANGELIO

Ñahendúta Ñandejára Jesucrísto rekove ha hemimbo’e San Mateo omombe’u háicha    9,35-10,8

Upéi Jesús ohasa oikóvo peteï távagui ambuépe. Ha mamo oĩháme itupao kuéra, upépe ha’e oporombo’e. Omoherakuã avei marandu porã Tupä sãmbyhyha ára rehegua, ha omonguera opaichagua hasývape. Ha ohechávo hetaha umi ijatýva, tuicha oiporiahuvereko ichupe kuéra. Ohecha kuaa, ha’e kuéra ikane’õ ha ikangypaha ku ovecha herekua’ỹvaicha. Ha he’i hemimbo’ekuérape:

Ajépa tuicha pe kokue ha heta hi’a, omono’õ va’erãnte mbovy. Upéva rehe, pejerure pe kóga járape tombou umi ou va’erãme omono’õ.

Jesús ohenói umi 12 hemimbo’épe ha ome’ẽ ichupekuéra pokatu omosẽ haguã mba’epochy, ha omonguera haguã opaichagua mba’asy.

Péicha hína umi 12 apóstol réra: tenondete Simón hérava avei Pedro, ha tyvýra Andrés. Upéi Santiago ha tyvýra Juan, Zebedeo ra’y kuéra. Felipe ha Bartolomé, Tomás ha Mateo, viru omboatýva Roma peguarã. Avei Santiago, Alfeo ra’y ha Tadeo. Oĩ avei Simón, hetã rayhúva, ha Judas Iscariote, pe upéi omoñuhã va’ekue Jesúspe.

Jesús omondo hembiaporãme ko’ã 12 kuimba’épe kóicha ombo’e rire ichupekuéra:

Aníke pehótei judio’ỹva oikoha rupi térã peguahẽ Samariagua táva kuéra rupi. Ta peho  uvei Israelgua rendápe, ku ovecháicha okañymbáva. Ta peho  pemoerakuã hi’aguĩmaha ñesãmbyhy yvágagui oúva. Pemonguera hasýva, pemoingove jevy omanóvape, pemonguera umi hete aipávape ha pemosẽ mba’epochy opavavégui. Peëme niko oñeme’ẽ rei ko pokatu, ani pejerure hese mba’eve.

Ani peraha viru pende jehe, térã vosa oimeháichagua tape rehe guarã, térã pende ao pembojopyru haguã, térã pende py rehegua, térã yvyra pende po pegua. Opa omba’apóva niko oñemongaru va’erã voínte.

Ñandejára Jesucrísto  Ñe’ẽ.