DOMINGO XII DEL TIEMPO ORDINARIO

Ko’ágã ñahendúta Tupã Ñandejára ñe’ẽ Job arandukápe oĩ háicha 38, 1. 8-11

Ha Ñandejára oñe’ẽ Jóbpe yvytu ratã pa’ũme: – Osẽ ramo guare yguasu pe yvy ryepýgui, máva piko ojoko raka’e ani haguã oñehẽ?

Che ame’ẽ va’ekue ichupe arai ijaorã ha ára pytũ hupaguã. Upe yguasu che amongorapy ha amboty hokẽ. Ha ha’e ichupe: “Ápeve reguahẽ, ha águi nderehasa mo’ãi. Ápe ojeka va’erã nde y mbaretekue”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 106, 23-26. 28

Opavave: Aguyje Ñandejárape, ha’e imarangatu opa ára.

Umi yguasu rupi ohóva oñemu haguã imba’e repýre
Ñandejára rembiapokue ohecha hikuái,
y mbytépe mba’e hechapyrãva. O.

Iñe’ẽme omopu’ã yvytu ratã, ombopochýva yguasu.
Yvága rehe ohupi ichupekuéra, ha omboguejy jevy hugua peve.
Iñakãnga’u ha ipy’a kangypa hikuái. O.

Ojecha vai ramo oñembo’e Ñandejárape, ha oipe’a jeiko asýgui ichupekuéra.
Upe yvytu atã rendaguépe ombou yvytu kangy asy
Ha omombi pe mba’e pochy. O.

Ovy’a hikuái upe y opi rire ha Ñandejára omoguahẽ pora chupekuéra.
Perohory Ñandejárape oporo poriahuverekógui.
Ojapógui hechapyrãva yvypóra rehehápe. O.

LECTURA MOKÔIHA

Ñahendúta Tupã Ñandejára Ñe’ẽ San Pablo ohai va’ekue ikuatia mokõiháme Corinto guápe 5, 14-17

Che pehenguekuéra: Cristo mborayhu oñemomba’e va’ekue ore rehe, rohecha kuaa vove peteĩ omano hague opavave rehe ha hendive opavave omano hague. Ha Cristo omano opavave rehe, ikatu haguã umi oikovéva ndoikovéima ijupe guarã, oikove haguã uvei upe hesehápekuéra omano ha oikove jevy va’ekuépe guarã.

Upéva rehe ore ko’ágã noroma’ẽvéima avave rehe yvypóra rekópe. Ymave roma’ẽ va’ekue péicha Crísto rehe, ko’ágã katu nahánirivéima.

Aipo ramo, pe ojoajúva Crísto rehe upéva peteĩ tapicha ipyahúva. Umi yma guare ohasáma, ha umi ipyahúva katu oguahẽ.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Lc 7, 16
Aleluia.
Peteĩ maranduhára mba’e guasúva ou ñande apytépe.
He’i avei hikuái: Ñandejára ou oipytyvõ hetã guápe.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha

4, 35-41

Opavave: Romomba’e guasu ndéve, Ñandejára.

Ka’arúma ramo upe árape, Jesús he’i idisípulokuérape: Jahasa mar mboypýri. Ha omondo rire opavavépe, hemimbo’ekuéra ogueraha Jesúspe upe kanóa oĩháme.

Oĩ ave ambue kanóakuéra omoirũva chupekuéra. Ha peichaháguinte oñepyrũ oipeju
yvytu ne ratãva, ha pe y pochy opu’ã pe kanóa ári ha omyenyhẽ ýgui. Jesús katu okehína upe kanóaruguápe, peteĩ akãngyta ári. Omombáy ha he’i chupe hikuái: Mbo’ehára, nderehecha kuaái piko ñañapymítamaha?

Jesús opu’ã, oja’o pe yvytúpe ha he’i pe márpe: Ekirirĩ! Epyta upépe! Ha opi pe yvytu ha oguapy pe y. Upéi Jesús he’i hemimbo’ekuérape: Mba’ére piko peñemondýi? Ne’ĩra gueteri piko pejerovia?

Idisípulo kuéra katu okyhyje eterei ha oporandu joa ojupe: Máva piko kóva, yvytu ha mar jepe iñe’ẽ rendúva chupe?

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.