LUNES XII DEL TIEMPO ORDINARIO

Ko’ágã ñahendúta Tupã Ñandejára ñe’ẽ Génesis arandukápe oĩ háicha 12, 1-9

Tupã Ñandejára he’i Abrámpe: Eheja ne retã ha nde ru róga, ha tereho upe yvy che ahechaukátava ndévepe. Ambohetáta ne ñemoñare ha oikóta ichugui tetã guasu. Rohovasáta, romoherakuã mombyrýta ha nde rupi ambue kuéra ojehovasáta. Ahovasáta nde rovasávape, ha ajahéita umi nde rehe ojahéivare.

Nde rupi ojehovasáta tetã nguéra yvy arigua. Abram osẽ Harángui oguereko ramo 75 áño, Tupä Ñandejára he’i haguéicha ichupe, ha Lot oho hendive.

Ogueraha hembireko Sarai, ha Lot ityvýra amyrỹi Harán ra’yrépe, opa mba’e ‘oguerekóva ha hembiguái kuéra omboaty va’ekue Haránpe, ha oho Canaán gotyo. Oguahẽvo Canaánpe, Abram oguata upe tetã pýre ha oguahẽ táva Siquémpe, upe yvyra imomorãmby Moré peguápe.

Upérõ upe tetã, cananéo mba’e gueteri hína. Tupä Ñandejára ojechauka Abrámpe ha he’i ichupe: “Ko tetã ame’ẽta ne ñemoñarépe.”

Upérõ Abram omopu’ã peteĩ altar upe Tupã Ñandejára ojechauka haguépe ichupe. Upégui ova yvy gotyogua yvyty kuéra gotyo, Betélgui kuarahy resẽvo, ha opyta Betel ha Ai pa’ũme. Betel oĩ ichugui kuarahy reike gotyo, ha Ai kuarahy resẽ gotyo.

Upépe avei omopu’ã altar Tupä Ñandejárape ha omomba’e guasu ichupe. Upégui ojererovave ohóvo Canaán yvy gotyo, hérava Négueb, gotyo.

Tupã Ñandejára Ñe’ẽ.

SALMO ÑEMBOHOVÁI 32, 12-13. 18-20. 22

Opavave: Ovy’a upe tetã oguerekóva Tupãme ijára ramo.

Ovy’a upe tetã oguerekóva Tupãme ijára ramo,
upe tetã ha’e oiporavo va’ekue imba’e teerã.
Tupã Ñandejára omaña yvága guive
ha opavavépe ohecha. O.

Tupã Ñandejára katu oñangareko umi ichupe
omomba’évape ha imborayhu rehe ojeroviávape,
umívape ha’e ndohejái omano.
Omoingove katu ichupe kuéra ñembyahýi guasu ou jave. O.

Tupã Ñandejára rehe ore rojerovia.
Ha’e upe ore pytyvõ ha oñangarekóva ore rehe.
Tupã Ñandejára, ne mborayhu ta ore añuãmba.
Upéva roha’arõ nde hegui. O.

ALELUIA Heb 4, 12

Aleluia.
Tupã Ñandejára Ñe’ẽ hekove ha imbarete; oiporavo umi ñane akãme jarekóva
ha ñane korasö rembipota.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

7, 1-5

Upe ramo Jesús he’i hemimbo’ekuérape: Ani pemoĩ vai pende rapichápe, nda peipotái ramo Tupã Ñandejára pene moĩ vai peẽme. Tupã Ñandejára pene moĩ vaíta peẽme, peẽ peporomoĩ vai háicha. Ha peẽ pejapo háicha pende rapicháre Tupã Ñandejára ojapóta pende rehe.

Mba’éicha piko rehecha pe yvyra ku’i nde ryvy resápe oĩva, ha nderehechái pe yvyra poguasu nde resápe voi rerekóva?

Mba’éicha piko eréta nde ryvýpe: “Taipe’a ndéve pe yvyra ku’i nde resápe oĩva”, nde voi rereko ramo peteĩ yvyra poguasu nde resápe? Nde, tekove rova mokõi! Eipe’a raẽ pe yvyra poguasu nde resape oĩva rehecha porã haguã, ha upéi reipe’a haguã pe yvyra ku’i nde ryvy reságui.

Ñandejára Jesucristo Ñe’ẽ