DOMINGO XIX DEL TIEMPO ORDINARIO

DOMINGO DÉCIMO NOVENO DURANTE EL AÑO

LECTURA PETEÎHA:
Motivación: Ñandejára oñeñanduka Proféta Elías peteĩ sérro ru’ãme. Ohasa rire heta guyryry Ñandejára ou hendápe yvytu vevúi asýpe.

Ñahendúta Tupã Ñandejára ñe’ẽ Reyes aranduka peteïhápe oĩ háicha 19, 9. 11-13a

Elías oguahẽvo Tupã yvyty Horébpe oike peteĩ ita kuápe ha upépe ohasa pe pyhare. Tupã ñe’ẽ oguahẽ ichupe. Ñandejára he’i ichupe: “Esẽ okápe ha epyta eñembo’y che renondépe pe sérro ári”.

Upérõ ohasa Ñandejára. Ha peteĩ yvytu ne ratã ha ne mbaretéva omboja’o pe sérro ha ojoka umi ita Ñandejára renondépe; Ñandejára katu noĩri pe yvytúpe. Pe yvytu rire oiko yvy ryrýi ha Ñandejára noĩri avei pe yvy ryrýipe. Pe yvy ryrýi rire oiko tata rendy ha pe tata rendýpe noĩri Ñandejára. Tata rendy rire katu oñehendu yvytu oipeju vevúi asýva. Ohendúvo upéva Elías oñomi hova ijahojápe
ha osẽ opyta pe itakua renondépe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 85, 9-14
Opavave: Ñandejára ore poriahuvereko kena ha oresalva.

Agueroayvúta Ñandejára he’íva:
Ha’e he’i ome’ẽtaha py’a guapy hetãme ha umi hese ojeroviávape.
Hi’aguĩ ára ha’e oguenohẽ haguã jejopy vaígui
Ñandejára, nde reko mimbipa ojekuaáne ore yvýpe. O.

Mborayhu ha añete oñuguãitĩne,
py’a guapy ha teko joja oñoañuáne.
Añete heñóine upe yvýgui,
ha teko joja yvágagui oma’ẽne. O.

Ñandejára, ha’ete voi ome’ẽta ñandéve iporãva,
ko ñande yvy ome’ẽta hi’a.
Teko joja ohóne henonderã,
Ombosako’ívo ichupe háperã. O.

LECTURA MOKÕIHA:
Motivación: San Pablo ombyasy eterei umi hudíokuéra ha’éva ihentekuéra ha Ñandejára pueblogua, ndojeroviaiha Jesucristo rehe.

Ñahendúta Tupã Ñandejára Ñe’ẽ San Pablo ohai va’ekue Roma guápe 9, 1-5

Che pehenguekuéra: Jesucrísto reroviaha che rekópe, ha’e añetegua, nda che japúi. Upéi ave, che akã, oisãmbyhýva Espíritu Santo, he’i chéve añeteha: ajepy’apy manterei ha che py’ápe areko peteĩ ñembyasy opa’ỹva, hi’ãnte chéve che voi ajeharu, ajei Jesucrístogui, upéicha aipytyvõta ramo che pehẽnguekuéra umi che retãguávape.

Ha’ekuéra niko Israel ñemoñare, ha Ñandejára oguereko ichupekuéra ita’ýrarõ. Ñandejára oĩ va’ekue ijapytépekuéra heko mimbipa reheve, ha oñoñe’ẽ me’ẽ hendivekuéra, ome’ẽ ichupekuéra Moisés mandamiento, Ñandejára rayhu kuaa ha iñe’ẽ. Ha’ekuéra niko ñande rukuéra ypykue ñemoñare, ha ichuguikuéra, yvypóra rekópe, ou pe Mesías, Ñandejárava opa mba’e ári, oñemomba’e guasúva opa ára.
Amén.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 130, 5
Aleluia.
Che py’aite guive aha’arõ Ñandejára che pytyvõ haguã, ha arovia upe iñe’ẽ ha’e ome’ẽva chéve.
Aleluia.

EVANGELIO

Motivación: Apóstolkuéra oho háicha pe kanóape, yvytu ratã ha ama pochy pa’ũme, upéicha avei sapy’ánte jahasa ñande Iglésia ha ñande komunidakuérape. Jesús katu nañanderejái.

Marandu porã Ñandejára Jesucristo rekove ha hemimbo’e San Mateo omombe’u háicha 14, 22-33

Opavave: Romomba’e guasu ndéve, Ñandejára.

Upérõ Jesús he’i idisípulokuérape pya’ete ojupi haguã kanóape ha ohasa haguã hikuái henonderã lágo mboypýri. Upe aja ha’e opytáta omondopa haguã opavavépe hógape. Ohopa rire hikuái, Jesús ojupi peteĩ sérro ru’ãme oñembo’e haguã ha’eño. Pyhare oguãhẽvo, Jesús oĩ gueteri hína upépe ha’eño.

Upe aja katu, pe kanóa oguãhẽma pe y mbyte rupi. Ohuvãitĩ ohóvo hikuái yvytu, ha pe y pochy oñenupã pe kanóa tĩre. Ko’ẽmbotávoma, oñemboja sapy’a Jesús hendápe kuéra, oguata oúvo y apére ra’e hína. Idisípulokuéra katu ohechávo oguatáva oúvo hína y apére,
tuicha oñemondýi. Ha okyhyjégui osapukái: — Cháke póra.

Jesús katu oñe’ẽ chupekuéra, ha he’i: — Chénteko hína. Ani pekyhyje.

Upérõ Pedro osẽ he’i: — Mbo’ehára, nde ramo añete, eheja chéve taha ne rendápe y apére.

Jesús he’i chupe: — Eju.

Upépe, Pedro oguejy pe kanóagui ha oñepyrũ oguata pe y apére ohóvo Jesús rendápe. Oñandúvo pe yvytu hatã oipeju katu okyhyje sapy’a, ha oñepyrũ oñapymi. Upépe osapukái: — Mbo’ehára, cháke ajahogátako.

Upévo Jesús ombohasa ichupe ipo, ha he’i chupe: — Rejerovia’iete piko ra’e che rehe.

Mba’éreiko reduda ha rekyhyje. Ha ojupívo mokõivéva pe kanóape, opi sapy’a pe yvytu. Umi kanóape opyta va’ekue katu oñesũmba Jesús renondépe, ha he’i chupe: — Nde niko añete Ñandejára Ra’y ra’e.

Tupã Ñandejára Ñe’ẽ.

Opavave: Romomba’e guasu ndéve, Ñandejára Jesucristo.