LUNES XIX DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 10, 12-22

Moisés he’i péicha hetãguápe: Pehendu peẽ Israel ñemoñare ko ha’éva peẽme: Umi mba’e Tupä Ñandejára oipotáva pejapo, ko’ãva hína: Pemomba’e guasu ichupe ha pejapo opa mba’e ha’e he’íva, pehayhu ichupe, peiko ha’e oipota háicha pende py’a ite guive, ha pejapo hembiapoukapy, che ame’ëva peẽme Ko’ágã oho porã haguã peẽme.

Tupã Ñandejára mba’e hína pe yvága ijyvatetéva ha avei ko yvy ha opa mba’e ipype oĩva. Tupã Ñandejára ohayhu’etereígui pende rukuéra ypykuépe, pende poravo peẽme opa tetã apytégui hetã tee ramo.

Ha peẽ Tupã Ñandejára retã gueteri hína. Pene ñe’ë rendu Ñandejárape ha ani akóinte peikose pene akãre. Tupã Ñandejára oĩ hína opa mba’e ári ha imbareteve opa tupã nguéragui.

Ha’e tuicha ha imbarete eterei ha tekotevẽ pene ñe’ẽ rendu ichupe. Ha’e nombojerovia juavýi avavépe, ha ndojejoguaukái mba’e me’ẽre.

Ha’e hakate’ỹ ityre’ỹva ha kuña iména manóva rehe ha oipota ojeapo mba’e ramo; ohayhu mombyry ñemoñarépe oikóva pende apytépe ha ome’ẽ ichupe hembi’u ha ijaorã. Péicharõ, pehayhu mombyry ñemoñarépe, peẽ voi mombyrygua va’ekue Egíptope.

Pemomba’e Tupã Ñandejárape ha pemomba’e guasu ichupe ha hérape añónte peme’ẽ pene ñe’ẽ. Ichupe pemomba’e guasu va’erã, ha’e niko Tupã Ñandejára ojapo va’ekue mba’e rechapyrã pene resa renondépe. Pende rukuéra ypykue oho ramo guare Egíptope, 70 va’ekue. Ko’ágã katu Tupã Ñandejára pene mbohetáma mbyja ita yvágape guáicha.

Tupã Ñandejára Ñe’ẽ.

SALMO ÑEMBOHOVÁI 147, 12-15. 19-20

Opavave: Jerusalén, erohory Tupã Ñandejárape.

Jerusalén, erohory Tuypä Ñandejárape,
Sión emomba’e guasu Tupã Ñandejárape.
Ha’e omboty hatã ne rokẽnguéra
ha ohovasa nde ra’y ha nde rajy kuéra nde pype. O.

Ha’e ogueru py’aguapy nde yvýpe,
ha nemohyvatã trígo iporãvévape.
Ha’e ombou iñe’ẽ ko yvýpe
ha upe he’íva pya’e oguahẽ. O.

Jacóbpe ha’e oikuaauka hembipota.
Israélpe ha’e ome’ẽ hembiapoukapy.
Ambue tetã ndive ha’e upéicha ndojapói,
ndoikuaaukái ichupe kuéra hembiapoukapy. O.

ALELUIA Cf. 2Tes 2, 14

Aleluia.
Tupã Ñandejára ñane renói Marandu porã rupi,
jaguereko haguã Ñandejára Jesucristo mimbipa.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

17, 22-27

Upe ramo oiko aja hikuái Galiléa rupi Jesús oñe’ẽ hemimbo’e kuérape kóicha: Che, vypóraicha aju va’ekue, ha’áta hína yvypóra kuéra pópe. Ha’e kuéra che jukáta, mbohapy ára haguépe katu aikove jevýta.

Kóva ohendúvo, tuicha oñembyasy hikuái. Jesús ha hemimbo’e kuéra oguahẽ rire táva Cafarnaúmpe, umi viru ombyatýva Tupaópe guarã oho Pedro rendápe ha oporandu ichupe: Pene mbo’ehára piko ome’ẽ oikóvo pe viru tupaópe guarã?

Ha Pedro he’i ichupe: Ome’ẽ.

Upéi, Pedro oikévo Jesús rógape, Jesús raẽ imandu’a Pédrope, ha oporandu ichupe: Simón, mba’épa nde ere? Mburuvicha kuéra omboaty ramo viru, mávarepa ha’e kuéra omopẽ? Hetãgua kuérarepa térã ambue tetãguáre?

Pedro he’i ichupe: Ambue tetãguáre.

Jesús he’i ichupe: Péicharõ niko hetãgua natekotevéi ome’ẽ. Péicharõ jepe, ani haguã ipochy ñane ndive avave, tereho ýpe ha eity ne pinda. Pe pira reikutu raëva jurúpe rejuhúta viru ohupitýva ñande mokõime guarã. Eraha ha eme’ẽ ichupe kuéra upéva.

Ñandejára Jesucristo Ñe’ẽ.