Jueves 8 DE AGOSTO Mateo 16, 13 – 23.

Upérõ ¹³ Jesús oguãhẽmbotávoma Cesaréa Filípope, oporandu idisípulo kuérape:

—Mba’éiko oje’e che rehe upe rupi. Mavaha che piko he’i hikuái.

¹⁴ He’i chupe hikuái:

—Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva ndeha Jeremías térã ambue proféta.

¹⁵ Jesús oporandu chupe kuéra: — Ha peẽ piko mba’e peje. Mávaiko che.

¹⁶ Ha Simón Pedro he’i chupe: — Nde hína pe Mesías, Ñandejára oikovéva Ra’y.

¹⁷ Jesús he’i chupe: 

—Ñandejára ta nde rovasa ndéve Simón. Ndejeheguínte ndereikuaái vaerã mo’ãkuri péva, che ru yvagapegua ndoikuaaukái rire ndéve. ¹⁸ Ha ha’eve ndéve Pedro, nde réra niko he’ise ita. Ko ita ári amopu’ãta che iglésia, ha mano jepe nda’ipu’aka mo’ãi hese. ¹⁹ Nde pópe amoĩta Ñandejára Rréino rokẽ reipe’a haguã. Ha opa mba’e nde emosãva ko yvy ári oñemosãta avei yvágape. Ha opa mba’e nde reheja reíva ko yvy ári, yvágape avei ojeheja reíta. 

²⁰ Upéi Jesús he’i idisípulo kuérape ani haguã he’i avavépe ha’eha pe Mesías.

²¹ Jesús oñepyrũ omombe’u idisípulo kuérape oho mante vaerãha Jerusalénpe.He’ichupe kuéra upépe umi mburuvicha,pa’i ruvicha ha umi Moisés léi ombo’éva heta ombohasa asytaha chupe. He’i avei ojejukataha upépe, ha oikove jeytaha mbohapyára haguépe. 

²² Upépe Pedro ogueraha chupe ha’eñoháme, ha he’i chupe anive haguã péicha oñe’ẽ. He’i chupe: — Mba’éichata piko péva. Ñandejára ndohejái chéne ojehu ndéve mba’eve.

²³ Jesús katu ojere ha he’i Pédrope: — Na che reja Sataná. Nde niko ita che rapépe. Ndereikuaái pe Ñandejára oipotáva. Nde niko rejogua opavavépe. 

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Mba’épa ñahendu ñande oje’e Hesúre. Mba’épa oje’e ñande róga pýpe, ñane irũ nguéra apytépe. Mba’épa he’i umi hénte upérupi Hesúre. Ha mba’e he’i hikuái umi Hesu ndive oguatáva rehe, tupaogua, pa’i, hermana, catequista, animador umíva rehe. 

Ñahendu Hesu oporandu ijapóstol kuérape mba’épa ohendu hikuái upérupi, mba’épa he’i la hénte hese oikóvo. Ha upéi katu oikuaaséma mba’épa he’i ha mba’épa oñandu hikuái hese. Hesu nohendusevéima hénte jurúgui osẽva, ohenduse ha oikuaase mba’épa he’i ha oñandu hikuái hese.

Ha’ete ku Hesu ombo’eséva ichupe kuéra, ha ñandéve avei upe jave che reindy ha nde che irũ, heta ñe’ẽ ha opaichagua ñahendútaha upérupi, la hénte juru niko ndaijokohái. Opáichavo, amo ipahápe la he’iséva hína upe ñande ñañandúva amo ñande py’a ruguápe, ha Ñandejára oñandukáva ñandéve. Upéva la ovaléva. Hembyre, láta pararãrei. 

Pa’i Alberto Luna