Ñahendu Hesu Ñe’ê. Viernes 16 de agosto.

Ñahendu Hesu Ñe’ê. Viernes 16 de agosto.

Viernes XIX TO.                                                                           Mateo 19, 3 – 12. 

   Upérõ  fariséo kuéra oñemboja Jesús rendápe ombopakova pire haguã chupe. Oporandu chupe hikuái: — Ména piko oimeraẽ mba’ére ikatu opoi hembirekógui. 

 Jesús he’i chupe kuéra: — Ndapeikuaái nga’u piko Ñandejára Ñe’ẽme he’iha, Ñandejára ojapo ramo guare yvypóra kuimba’e ha kuña ojapo hague.

 Ha ombojo’a Jesús: — Upévare niko kuimba’e oheja itúva ha isy, ojoaju haguã hembireko ndive, ha mokõivégui oiko peteĩ.”   Péicharõ niko, omendáva ndaha’e véima mokõi, peteĩntema. Upévare, yvypóra ndoipe’ái vaerã ojuehegui pe Ñandejára ombojoaju vaekue.

  Upépe umi fariséo osẽ he’i chupe: — Mba’ére piko aipo ramo Moisés léipe he’i kuimba’e ikatuha opoi hembirekógui ome’ẽ ramo chupe peteĩ kuatia he’ihápe opoiha chugui.

  Jesús he’i chupe kuéra: — Ha pende py’a hatãguinte Moisés oheja vaekue peẽme péicha.  Yma ndaupéichai vaekue.   Che katu ha’e peẽme, oimeraẽva opoíva hembirekógui, ndaha’éi ramo omyakãratĩ haguére chupe, pe ména omenda jeýrõ, oporomyakã ratĩ hína. Ha pe omendáva pe kuñáre iména opoi vaekue chugui, péva oporomyakã ratĩnte avei hína.” 

  Upévo idisípulo kuéra he’i chupe: — Péicha jaikótarõ ñane rembireko ndive niko iporãve nañamendái mba’e voi. 

  Jesús he’i chupe kuéra: — Nda’opavavéipe niko Ñandejára oheja ohecha kuaa ikatuha oiko omenda’ỹre.   Ikatu niko heta mba’ére peteĩ kuimba’e nomendái. Oĩ umi ou ypy guive voi yvy ári ikatu’ỹva oiko kuña ndive, ha upévare nomendái. Oĩ umi ikatu’ỹva omenda hapicha okapa haguére. Ha oĩ avei umi omenda’ỹva ha’e kuéra voi oñemoĩgui Ñandejára Rréino rehe omba’apo haguã. Upe oiméva ko’ã mba’e ohecha kuaa haguã, tohecha kuaa. 

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE…

“Omendáva jepe ojueja, mba’e piko la ñande”, he’i niko umi oñemongeta pukúva oñondive opoívo ojuehegui oho haguã hape rupi peteĩ teĩ. Ha péicha jahecha oiko ñande apytépe ha ymaite avei Hesu tiémpope, umi hudío kuéra apytépe kuimba’e kuéra ohejáva voínte hembireko kuéra. Iléi kuéra upéicha he’i ikatuha ojapo. Ñande léi civil niko avei he’íma ko’ãga ikatuha kuña ha kuimba’e omendáva opoi ojuehegui. 

Hesu katu ningo he’i mborayhu rupi mokõi omendávagui oikoha peteĩnte. Upéichama voi raka’e Ñandejára ñandeapo ypy ramo oipota, umi ojoajúva mborayhu rupive opyta haguã oñondive hekove pukukue javeve. Tuicha mba’e upéva, tekotevẽva mokõivéva, ména ha tembireko, oreko hesa renondépe ha ikorasõme, ojedesidi porã, oñangareko ha otira joja haguã pe júgo oñapytĩva ojuehe ojoayhúgui ha Ñandejára ohovasáva. 

Ajépa niko che reindy ha nde che irũ, jaguerohoryete umi oñomboguata kuaáva hekove pukukue javeve ojopoi’ỹre. Ha tekotevẽ avei niko ñamoirũ umi ojavýgui nosẽ porãiva ha ojoaju jeýva, ikatu haguãicha oñemohenda porãma ha opyta pe ilíñope oñomboguata. 

Pa’i Jasy.