JUEVES DÍA VI DENTRO DE LA OCTAVA DE NAVIDAD

LECTURA PETEÎHA:

Día 30 de diciembre

DÍA V DENTRO DE LA OCTAVA DE NAVIDAD

Ñahendúta Tupã Ñandejára Ñe’ẽ San Juan ohai va’ekue     1 Jn 2, 12-17

Che ra’y kuéra pohayhu etéva, ahai peẽme Tupã, Jesucristo rupi, oheja rei haguére pene angaipa. Túvakuéra, ahai peẽme peikuaágui upe oikóma va’ekue iñepyrũha guive. Mitã rusu kuéra, ahai peẽme pende pu’aka haguére iñañávare.

Ahai peẽme, che ra’ykuéra pohayhu etéva, peikuaa haguére pe Túvape. Ahai peẽme, túvakuéra, peikuaa haguére upe oikóma va’ekuépe iñepyrũha guive.

Ahai avei peẽme, mitã rusu kuéra, pene mbaretégui ha perohory Ñandejára Ñe’ẽ pende py’apýpe, ha pende pu’aka iñañávare. Ani pehayhu yvypóra reko térã oĩva ipype.

Ohayhúva yvypóra reko ndohayhúi pe Túvape. Mba’eve ha’e oikuave’ẽ vagui ndoúi pe Túvagui, ichugui  voínte uvei ou. Kóva hína pe ha’e oikuave’ẽva: yvypóra rekove rembipota vai, yvypóra reko katu opa ohóvo opa hembipota vai reheve. Upe Túva rembipota ojapóva katu oikove opa árape guarã.

Tupã Ñandejára Ñe’ẽ.

SALMO ÑEMBOHOVÁI    95, 7-10

Opavave: Pepurahéi Tupã Ñandejárape purahéi pyahu.

Pemomba’e guasu Tupã Ñandejárape opa tetãnguéra,

pemomba’e guasu Ñandejárape ha’e ipokatu ha omimbipágui,

pemomba’e guasu Tupã Ñandejárape héra tuichágui. O.

Itupao róga guýpe pemoguahẽ pene mba’e kuave’ẽ.

Pemomba’e guasu Tupãme ohechaukáva heko marangatu.

Opa yvypóra henondépe toryrýi. O.

Toje’e opa tetã rupi: “Ñandejára ñande ruvicha guasu hína”.

Hatã omoĩ hendápe ko yvy, ha ndaipóri omongu’éva.

Ha’e oisãmbyhy teko jojápe tetãnguéra. O.

ALELUIA

Aleluia.

Iko’ë ñandéve peteĩ ára hovasapyre

peju tetãnguéra, pemomba’e guasu Tupã Ñandejárape

ko árape mba’e rendy tuicháva oguejy yvágagui.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Lucas omombe’u háicha     2, 22. 36-40

Upe ramo oguahẽvo ára oñemopotĩ haguã, he’i háicha Moisés rembiapoukapy, ogueraha hikuái pe mitã Jerusalénpe omoĩvo Tupã Ñandejára renondépe.

Upe jave upépe oĩ avei hína peteĩ maranduhára kuñáva iguãiguĩmava, hérava Ana, Fanuel rajy,  Aser ñemoñaréva.

Orekóma hína 84 áño. Omenda ra’e imitãme gueteri, ha oiko iména ndive 7 áño; omano iichugui  ha opyta imena’ỹre. Araka’eve nosẽiva Tupaógui, ha omomba’e guasúva Tupã Ñandejárape ára ha pyhare okaru’ỹre ha oñembo’ehápe. Ana oguahẽ upe jave ha oñepyrũ ome’ẽ ijaguyje  Tupãme. Ha oñe’ẽ pe mitã Jesús rehe umi oha’arõvape Jerusalén ñepysyrõ.

Ojapopa rire Tupã Ñandejára rembiapoukapy he’íva, oho jevy hikuái Galiléape, itáva Nazarétpe voi. Ha pe mitã okakuaa ha ko’ẽ ko’ẽre imbareteve, henyhẽ arandúgui ha Tupã ohovasa ichupe.

Ñandejára Jesucristo Ñe’ẽ.