LECTURAS JUEVES XVIII DEL TIEMPO ORDINARIO

LECTURAS JUEVES XVIII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Números arandukápe oĩ háicha 20, 1-13

Israel ñemoñare oguahẽ yvy ojeiko’ỹháme Sin héravape ha opyta hikuái táva Cadés héravape. Upépe Miriam omano, ha oñeñotỹ.

Ndaipórigui y upépe, Israel ñemoñare opu’ã Moisés ha Aarón rehe, ha he’i hikuái Moiséspe: Hánga’u romanomba ra’e umi ambue Israel ñemoñare ndive ojuka va’ekue Tupã Ñandejára!

Mba’ére piko reru Tupä Ñandejára retã guápe ko ojeiko’ỹháme romano haguã ko’ápe ore rymbakuéra reheve? Mba’ére ore renohẽ Egíptogui ore reru haguã ko tenda ahẽme ndaikatuihápe opu’ã mba’eve? Ápe ndaipóri kokue, igoty, parralty, granadaty térã y jay’u haguãnte jepe.

Moisés ha Aarón ojei ichuguikuéra ha oho Jotopa Róga rokẽme. Upépe ojayvy hikuái ha omboja isyva yvýre. Upérõ Tupã Ñandejára ojekuaauka imimbipápe, ha he’i Moiséspe: Eraha pe yvyra jekoha ha pemboaty Israel guápe nde ha Aarón.

Opavave renondépe ere pe ita guasúpe tosẽ ichugui y ha osẽta y hoy’u haguã ha’e kuéra ha hymbakuéra.

Moisés ogueraha pe yvyra jekoha ha oho hendápe kuéra, he’i haguéicha ichupe Tupã Ñandejára. Aarón ndive omboaty Israel guápe pe ita guasu renondépe, ha Moisés he’i ichupe kuéra: Pehendu peẽ tova atã atýra! Ore piko roguenohẽta peẽme y ko ita guasúgui?

Upévo Moisés ohupi pe yvyra jekoha, oinupã mokõi jevy pe ita guasu ha opo ha ochororo ichugui pe y. Hoy’u ichugui Israel ñemoñare ha hymbakuéra.

Tupã Ñandejára katu ipochy Moisés ha Aarón ndive ha he’i ichupekuéra: Ndapehechaukái haguére Israel guápe pejeroviaha che rehe ha peẽme guarã ndaiporiha mba’eve ikatu’ỹva ajapo, na pemoinge mo’ãi Israel ñemoñarépe upe yvýpe ichupe kuéra ame’ẽtavape.

Upéva ojehu pe héravape “Meriba”, Israel ñemoñare ojahéi haguépe Tupä Ñandejára rehe ha ha’e ohechauka haguépe ichupe kuéra heko marangatu.

Tupã Ñandejára Ñe’ẽ.

SALMO ÑEMBOHOVÁI 94, 1-2. 6-9

Opavave: Hánga’u ra’e pehendu ko árape Tupä Ñandejára Ñe’ẽ.

Peju japurahéi Tupã Ñandejárape vy’a pópe.
Japurahéi upe jejopy vaígui ñane renohẽvape.
Ñaguahẽ hendápe ha ichupe ñamomba’e,
ichupe japurahéi. O.

Peju ñañesũ ha ñamomba’e guasu ichupe.
Ñañesũ ñande apohare, Tupã Ñandejára renondépe.
Ha’e hína Tupã Ñandejára, ñande katu hetãgua
ha ovecha iñu megua. O.

Hánga’u ra’e pehendu he’i ramo: “Ani pende py’a hatã
Meribápe guaréicha, Masápe pejapo haguéicha.
Upérõ penderukuéra ypykue opu’ã va’ekue che rehe
ohecha ramo jepe umi mba’e ajapo va’ekue. O.

ALELUIA Mt 16, 18

Aleluia.
Nde hína Pedro, ko ita ári omopu’ãta che Iglesia, mano ndaipu’aka mo’ãi hese.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 16, 13-23

Upe ramo Jesús oho táva Cesarea Filípope, ha upépe oĩ aja oporandu hemimbo’e kuérape: Che, yvypóraicha aju va’ekue rehépa, mavaha chépa oje’e?

Ha’ekuéra he’i ichupe: Oĩ he’íva ndeha Juan Bautista. Oĩ he’íva ndeha Elías, ha oime katu he’íva ndeha Jeremías térã ambue maranduhára.

Jesús oporandu ichupe kuéra: Ha peẽ piko mba’e peje, mávapa che? Ha Simón Pedro he’i ichupe: Nde hína upe Mesías, Tupã Ñandejára rembiporavo ha Tupã oikovéva Ra’y.

Jesús he’i ichupe: Revy’a itétapa nde Simón, Juan ra’y. Avave rupi nde reikuaái kóva, che Túva yvágape oĩva oikuaaukáva ndéve. Che ha’e ndéve Pedro, nde réra niko he’ise ita. Ko ita ári amopu’ãta che Iglésia, ha mano jepe ndaipu’aka mo’ãi hese.

Ame’ẽta ndéve ñesãmbyhy yvágagui oúva rokẽ pe’aha. Ha opa mba’e nde rehejáiva ojehu ko yvy ári, ndojehu mo’ãi avei yvágape. Ha opa mba’e nde rehejáva ojehu ko yvy ári, ojehúta avei yvágape.

Upéi Jesús he’i hemimbo’e kuérape ani haguã omombe’u avavépe ha’eha upe Mesías, Tupã Ñandejára rembiporavo.

Upe ára guive Jesús oñepyrũ he’i hemimbo’ekuérape ha’e oho va’erãha Jerusalénpe. Ha upépe moakãhárakuéra, pa’i ruvichakuéra ha umi Moisés rembiapoukapy mbo’eha heta ombohasa asytaha ichupe.

He’i ichupekuéra ha’e ojejukataha ha oikove jevytaha mbohapy ára rire. Upépe Pedro ogueraha ichupe ha’eñoháme, ha he’i ichupe anive haguã péicha oñe’ẽ. He’i ichupe: Mba’eveichavérõ, che Jára! Tupã Ñandejára ndaikatúi oheja ojehu ndéve péicha.

Jesús katu ojere ha he’i Pédrope: Ejei che ypýgui, Satana! Nde, che rape jokose reína. Nde niko yvypóraicha reñandu ko’ã mba’e, ndaha’éi Tupã Ñandejára oñanduka háicha.

Ñandejára Jesucristo Ñe’ẽ