MARTES XVIII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Números arandukápe oĩ háicha 12, 1-13

Upe árape: Moisés omenda peteĩ kuña Etiopía guáre. Upévare Miriam ha Aarón okaguai hese. Ha’ekuéra he’i: “Ndaha’éiko Moisés rupi año Tupã Ñandejára oñe’ẽva. Ñande rupi avei niko oñe’ẽ”. Tupã Ñandejára ohendu pe ha’ekuéra he’íva. Moisés heko kirirĩ ha ndaipochy kuaái voi. Ha’eichagua ipy’a porãva ndaipóri yvy ári.

Upéicha háguinte Tupä Ñandejára he’i Moisés, Aarón ha Miríampe: Aipota peẽ mbohapyve peju che rendápe Jotopa Rógape. Ha’ekuéra oho, ha Tupä Ñandejára oguejy peteĩ arai ñembo’ýpe, opyta Jotopa Róga rokẽme ha he’i: Peju ko’ápe Aarón ha Miriam!

Ha’ekuéra oñemboja, ha Tupã Ñandejára he’i: Pehendu porãke ko ha’éva peẽme! Oĩ ramo maranduhára pende apytépe, che ajechauka ha añe’ẽ ichupe kuéra iképe.

Che rembiguái Moisés ndive, ndapéichai. Ha’e pe jeroviahavéva ijapytépekuéra. Hendive añe’ẽ ramo, añe’ẽ sakã porã ha ha’e che recha. Ha mba’éicha piko peẽ ndapekyhyjéi peñe’ẽ vai haguã che rembiguái Moisés rehe?

Tupã Ñandejára ipochy hendive kuéra ha oho pégui. Pe arai ojei rire Tekohágui, Miriam pire ojejaho’ipa kuru vaípe ha opyta morotĩ aramirõicha. Aarón oma’ẽ hese ha ohechávo imba’asy vai, he’i Moiséspe: Che karai, anína péicha ite peve ore nupã rasy eterei! Ore tavýgui niko roñe’ẽ rei nde rehe. Anína reheja ha’e opyta mitãicha osẽva isy ryégui he’õngue. Osẽvo ipire oñembyaíma.

Upérõ Moisés osapukái Ñandejárape ha he’i: Háa Tupã! Emonguerána ichupe!

Tupã Ñandejára Ñe’ẽ.

SALMO ÑEMBOHOVÁI 50, 3-7, 12-13

Opavave: Tupã Ñandejára che poriahuverekokena.

Tupã Ñandejára, che poriahuvereko, nde niko ne mba’e porã.
Che poriahuvereko ha eipe’a che árigui
che rembiapo vaikue, ha che johéi porã teko vaígui,
che mopotĩ che angaipágui. O.

Ahecha kuaa niko ajavyha,
ha mba’e vaígui ndaikatúi apoi.
Nde rehe añónte ajapo ivaíva,
ha hendape’ỹva nde rovake ajapo. O.

Upévare, opa mba’e eréva oĩ porã.
Ndaipóri avave he’i va’erã mba’eve.
Aikove ypy guive voi ajapo ivaíva,
che sy ryepy guivéma voi asẽ che ky’a. O.

Tupã Ñandejára, embopyahu che rekove ha ta imarã’ỹ,
che py’a to ñembopyahu ha ta imbarete.
Anítei che mosẽ ne renondégui,
térã reipe’a che hegui nde pytu marangatu. O.

ALELUIA Jn 1, 49b

Aleluia.
Mbo’ehára, nde ningo Tupã Ñandejára Ra’y. Nde hína Mburuvicha guasu Israelpe guarã.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 14, 22-36

Upe ramo Jesús he’i hemimbo’ekuérape ojupi haguã peteĩ kanóape ha ohasa haguã henonderã y mboypýri. Upe aja ha’e he’íta opavavépe oho haguã hógape. Omondopa rire opavavépe hógape, Jesús ojupi peteĩ yvytýpe oñembo’e haguã ha’eñoháme. Pyhare oguahẽvo, Jesús oĩ gueteri upépe ha’eño.

Pe kanóa katu ohupitýma pe y mbyte rupi. Pe y pochy katu oñenupã pe kanóa tĩre, ohuguãitĩgui ohóvo hikuái yvytu. Ha ko’ẽ mbotávo, Jesús oñemboja hendápekuéra oguatahápe pe y apére. Hemimbo’e kuéra katu ohechávo ichupe oguatáva ohóvo y apére, tuicha oñemondýi ha okyhyjégui osapukái: Póra niko upéva!

Jesús katu oñe’ẽ ichupekuéra, ha he’i: Chénteko! Ani pekyhyje. Upépe Pedro oñe’ẽ ichupe, ha he’i: Che Jára, nde ramo añete, eheja chéve taha ne rendápe y apére.

Jesús he’i ichupe: Eju.

Upévo Pedro oguejy pe kanóagui ha oñepyrũ oguata pe y apére, ohóvo Jesús rendápe. Oñandúvo pe yvytu ratã katu okyhyje ha oñepyrũ oyguy. Upépe hatã osapukái: Che Jára, che pytyvõke!

Upévo Jesús ipojái ipóre, ha he’i ichupe: Rejerovia’i eterei ra’e! Mba’ére piko nde py’a mokõi reguata haguã?

Ha’ekuéra ojupívo pe kanóape, opi pe yvytu. Ha umi oĩ va’ekue pe kanóape oñesũmba Jesús renondépe, ha he’i ichupe: Nde niko añete Tupã Ra’y.

Ohasa hikuái pe y mboypýri ha oguahẽ Genesarétpe. Ha umi upepegua oikuaávo Jesús oguahẽ hague, opa rupi ojekuaa, ha ogueru hikuái hendápe opaichagua hasýva. Ojerure ichupe hikuái opokomínte haguã ijao rembe’ýrente jepe, ha opokóva guive hese, okuera.

Ñandejára Jesucristo Ñe’ẽ