LUNES XVIII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Números arandukápe oĩ háicha 11, 4b-15

Umi Israel ñemoñare oñepyrũ hasẽngy ha he’i joa ojupe: “Jahechaga’u etéma piko pe Egipto! Upépe ja’u va’ekue pira ja’use háicha ha umi andai, sevói, áho, ha kurapepẽ katu ndaja’eséi. Ko’ápe katu ñamano ñembyahýigui ha ndaipóri mba’eve ja’u haguã ndaha’éi ramo pe maná.”

Maná ojogua kuratũ ra’ỹi ha ijape morotĩ nunga. Ho’a jepi ha’e kuéra oĩháme pyharekue ho’ávo ysapy. Ko’ẽ mba rire opa Israel ñemoñare osẽ omboaty imba’erã omoangu’i angu’ápe ha ojapo ichugui hu’itĩ.

Upéi ombojy óllape térã ojapo ichugui chipape. Oje’u ramo ojogua mbuja ñandyry reheve.

Moisés ohendu Israel ñemoñare hasẽmba joa oñemboatývo hóga rokẽme. Ha’e ojepy’apy Tupã Ñandejára ipochy haguére hendivekuéra. Ha he’i Tupã Ñandejárape: Mba’ére piko che rereko asy eterei?

Mba’ére piko nde pochy che ndive? Ma’erã piko reheja che ári añangareko haguã hesekuéra? Che ndajapói ha ndarúi va’ekue ichupekuéra yvy ári.

Mba’ére piko rejerure chéve aiko haguã herekua ramo ha araha haguã ichupe kuéra che jyva ári mitã kambúicha pe tape pukukue amoguahẽ meve ichupe kuéra pe yvýpe ere va’ekue reme’ẽtaha ichupe kuéra?

Mamógui piko anohẽta so’o ho’u haguã hikuái? Ha’ekuéra hasẽ mante rei chéve ho’uségui so’o. Che ndaikatúi añangareko hese kuéra cheño. Hetaite reíma chéve guarã.

Péichante che rerekóta ramo, che poriahuverekóna ha che juka mba’e, ta pytu’u. Ndaikatu mo’ãi niko aropu’aka are ko nde pochykue.

Tupã Ñandejára Ñe’ẽ.

SALMO ÑEMBOHOVÁI 80, 12-17

Opavave: Ñahendukena Tupã Ñandejára Ñe’ẽ.

“Che retãgua katu na che renduséi,
Israel ndojaposéi upe ichupe ha’éva:
upévare aheja ichupekuéra ojapo ojaposéva.
Iñakãre oiko hikuái. O.

Che rendu nga’u ra’e umi che retãgua,
ha Israel oiko che aipota háicha.
Peteĩ tesa pirĩme ahundíne hesekuéra ija’e’ỹvape,
ha ajahéine umi hese kuéra oñemoĩvare.”O.

Umi Tupã Ñandejárape ohayhu’ỹva oñemomirïne,
ha umíva oñehundi eténe;
hetã guápe katu Tupã Ñandejára omongarúne trígo porãme,
ha omohyvatãne eíra ka’aguýpe. O.

ALELUIA Mt 4, 4

Aleluia.
Yvypóra noikovéiri mbuja añóre, Tupã Ñandejára jurúgui osẽva ñe’ẽre rehe uvei.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 14, 13-21

Upe ramo oikuaávo Jesús upe Juánpe ojehu va’ekue, ojupi peteĩ kanóape ha oho upégui peteĩ ha’eñoháme. Opavave oikuaávo upéva, osẽ umi oikohágui ha oho ha’e oĩháme yvy rupi.

Oguejývo Jesús pe kanóagui, ha ohechávo hetaha umi ijatýva, oiporiahuvereko ichupekuéra, ha omonguera umi hasýva ogueru va’ekue hikuái.

Pytũmarõ hína, hemimbo’e kuéra ou hendápe, ha he’i ichupe: Ka’aru etéma niko, ha ko’arupi ndaipóri avave oikóva. Emondómana opavavépe toho umi táva rupi, tojogua hembi’urã.

Jesús katu he’i ichupekuéra: Natekotevẽi oho. Peẽ voi pemongaru ichupekuéra. Ha’ekuéra he’i ichupe: Roguereko niko 5 mbuja ha mokõi pira.

Jesús he’i ichupe kuéra: Peru chéve ko’ápe. Ha omboguapy opavavépe kapi’ipépe. Upéi katu ojapyhy ipópe umi 5 pan ha mokõi pira ha oma’ẽvo yvága gotyo ojerure Tupã Ñandejára ohovasa haguã.

Upéi oipehe’ã umi pan ha ome’ẽ hemimbo’ekuérape, ha ha’ekuéra ome’ẽ opavavépe. Opavave ho’u hyvatã meve. Ha umi hembývagui omono’õ hikuái 12 ajaka renyhẽ. Umi okarúva niko hína 5.000 kuimba’e rupi, ojepapa’ỹre kuña ha mitãnguéra.

Ñandejára Jesucristo Ñe’ẽ