Lecturas del 24 de agosto

Lecturas del 24 de agosto

Primera Lectura

Ko’ágä ñahendúta Tupã Ñandejára ñe’ẽ Rut arandukápe oĩ háicha

                                   2, 1-3. 8-11; 4, 13-17

Noemí oguereko va’ekue iména Elimélec guio peteĩ karai ipehẽnguéva, imba’e reko hetáva, hérava Booz. 

Peteĩ jevy Rut he’i Noemíme: Ehejána taha kokuépe seváda mono’õháme. Oĩ va’erã niko peteĩva jepe ohejáva chéve aha hapykuéri koga’a amono’õ haguã. 

He’i ichupe Noemí: Tereho che memby. 

Ha oho Rut ohupi yvýgui umi seváda ho’áva omono’õva pógui. Ha mba’éicha haguã nimbo oho omono’õ Booz, upe Elimélec pehẽngue kokuépe.

Booz he’i Rútpe: Natekotevẽi reho ambue kokuépe. Epyta ápe che rembiguái kuéra apytépe. Ha’e kuéra ohohápe tereho hapykuéri kuéra. Ha’éma ichupe kuéra ani haguã iñe’ẽ vai ndéve. Nde y’uhéi ramo tereho hey’u umi kambuchi ha’e kuéra omoenyhẽ va’ekuégui. Rehendúpa che rajy! 

Oñakãity ichupe Rut, ha he’i: Che niko ndaha’éi arupigua. Mba’ére piko péicha ite peve che rerohory, ha rehechakuaa ite chéve? Booz he’i ichupe: Aikuaapa umi mba’e rejapo va’ekue  ne ména sýre, ne ména omano rire. Aikuaa reheja hague nde sy, nde ru ha ne retã, ha reju reiko ko tetã reikuaa’ÿvape.

Omenda Booz Rut rehe. Ha oiko rire oñondive Tupã Ñandejára rupi ae Rut ou hye guasu ha imemby peteĩ mitã kuimba’e. 

Umi kuña he’i Noemíme: Tupä Ñandejára to ñemomba’e guasu. Ome’ẽ niko ndéve peteĩ oñangarekótava nde rehe. Héra ta herakuã Israel retã tuichakue javeve. Rut, upe nde rayhúva 7 ne memby nde rayhu ramo guáicha imemby, ha upe imemby ne moangapyhýta ha oñangarekóta nde rehe ne guãiguĩ vove.

Noemí ohupi pe mitã ha ojopy ipyti’áre. Upe ára guive ha’ete voi omongakuaa pe mitã. Umi kuña Noemí róga jerére oikóva he’i: “Oúma Noemíme imembyrã”, ha ombohéra hikuái upe mitã Obed. Kóva ha’e hína Jesé ypykue. Jesé katu David ypykue. 

Tupã Ñandejára Ñe’ẽ.

SALMO ÑEMBOHOVÁI                                  127, 1-5

R. Revy’a va’erã Tupä Ñandejára rehe rejerovia ramo.

Revy’a va’erã Tupä Ñandejára rehe rejerovia ramo, 

ha reiko ramo ha’e oipota háicha. 

Nde ry’ái repykuégui rekarúne, 

revy’áne, ha opa mba’épe resẽ porãne. R.

Nde róga pýpe ne rembireko ojoguáta 

ku parral hi’a hetávape. 

Ne mesa jerére katu nde ra’y ha nde rajy kuéra 

ojoguáta umi yvyra roky pyahúpe. R.

Kóicha ojehovasáta upe Tupä Ñandejára rehe ojeroviáva. 

TupänÑandejára ta nde rovasa 

Sión guive reikove aja pukukue. 

Reikovéta rehecha haguã mba’éichapa Jerusalén opu’ã. R.

Ko’ágä   ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?   

1, 43 – 51.

   Upérõ   Felipe oho Natanael rekávo, ha he’i chupe: — Oime rojuhu ku Moisés ha umi proféta kuéra imandu’aha ikuatia kuérape. Jesús niko héra, ku José Nazaretgua ra’y.

  Natanael katu osẽ he’i chupe: — Nazarétgui piko araka’e osẽva iporãva.

Ha Felipe he’i chupe: — Eju ndete ehecha. 

  Ha Jesús ohechávo Natanaélpe oguãhẽva ohóvo hendápe, he’i: — Amo oúva hína Israelgua añetete. Hendive ndaipóri japu. 

  Natanael he’i chupe: — Mba’eichakue piko nde che kuaa. 

Jesús he’i chupe: — Rohecháma voi kuri aje’i, ku reguapy ramo hína pe ígo mataguýpe, Felipe ne renói mboyve. 

  Natanael he’i chupe: — Mbo’ehára, nde niko Ñandejára ra’y. Nde hína Israel rréi. 

  Jesús he’i chupe: — Péicha piko ere ha’e haguére ndéve rohecha hague reguapýrõ hína ígo mataguýpe. Tuichaiteve mba’e katu niko rehecháne ágã. 

  Upéi Jesús he’i chupe kuéra: — Añetéko ha’e peẽme. Pehecháne ágã yvága ojepe’a ramo ha Ñandejára ángel kuéra ojupi ha oguejy ramo che rendápe. 

Ñandejára Hesukrísto ñe’ẽ.