LECTURAS DEL 25 DE NOVIEMBRE

LECTURAS DEL 25 DE NOVIEMBRE

Primera lectura:

Ko’ágä   ñahendúta Tupã Ñandejára ñe’ẽDaniel arandukápe oĩ háicha                

1, 1-6. 8-20

Áño mbohapyhápe ojupi haguépe Judá ruvichárõ mburuvicha guasu Joaquín, Nabucodonosor, Babiloniagua ruvicha guasu, oguahẽ Jerusalénpe ha omongora upe táva iñorairõhára reheve. Tupä Ñandejára oheja Nabucodonosórpe omoakãsã Joaquímpe ha oñemomba’e heta tembiporu tupao peguáre. Nabucodonosor ogueraha Babilóniape iñapytĩmby umi ho’a va’ekue  ipo guýpe ha omoĩ umi tembiporu tupao pegua itupã nguéra tupaópe.

He’i avei hembiguái kuéra ruvicha Aspenázpe oiporavo haguã Israel ruvicha kuéra ra’y apytégui, karia’y iporãva, hesãi ha imbaretéva, iñarandu ha imba’e kuaáva opa mba’épe, hembiapo haguã hóga guasúpe. Umívape ojeheko mbo’e va’erã Caldéo kuéra ñe’ẽme ha hekópe. Nabucodonosor he’i avei ko’ã karia’y oñemongaru va’erãha umi tembi’u ha kaguy ha’e ho’úvagui. Ojeheko mbo’e rire mbohapy áño pukukue, oike va’erã hikuái hembiapo haguã hóga guasúpe hembiguái ramo.

Umi karia’y ojeporavo va’ekue  apytépe oĩ Daniel, Ananías, Misael ha Azarías, opavave Judá ñemoñaregua.

Daniel katu oñembopy’a peteĩ ani haguã oñemongy’a ho’úvo mburuvicha guasu rembi’u ha ikaguýgui. Ha’e ojerure huvichápe ani haguã ome’ẽ ichupe umi tembi’u. Tupã Ñandejára oĩ rupi Daniel ndive, huvicha imba’e porã hendive. Ha’e he’i ichupe: Akyhyje mburuvicha guasúgui. Ha’e he’íma chéve mba’épa pe’u va’erã ha ohechárõ pende resa’yjuveha pende rapicha kuéragui, ha’e che jukaukáta upe haguére.

Upérõ Daniel oho oñe’ẽ Aspenaz ndive, ipópe niko oĩ ha’e ha iñirũ nguéra. He’i ichupe ha’e: Mba’ére piko nderehejái roiko 10 ára pukukue y ha tembi’u ka’avo rehénte, ha upéi ehecha mba’éichapa ropyta? Upéi embojoja ore rova umi karia’y oñemongarúva mburuvicha guasu meságui rováre, ha ejapo ore rehe rehecha háicha.

Ho’a porã upéva pe herekuápe ha 10 ára pukukue oheja ichupe kuéra péicha oiko. Ohasa rire umi 10 ára, ojehecha hese kuéra hesãi ha imbareteveha hapicha kuéra, mburuvicha guasu meságui okarúvagui. Upe guive oheja ichupe kuéra ho’u y ha tembi’u ka’avo añónte, okaru rangue mburuvicha guasu meságui.

Ko’ã irundy karia’ýpe Tupã Ñandejára omoarandu ha omoakã porã, oikuaa haguã opaichagua mba’e kuatiápe oĩva. Daniel oikuaa avei mba’éichapa ojora va’erã umi mba’e ñande képe jahecháva térã jahecha gua’úva. Oñembotývo umi ára mburuvicha guasu he’i va’ekue  ojereraha haguã hendápe umi karia’y, huvicha ogueraha ichupe kuéra mburuvicha guasu rendápe.

Mburuvicha guasu oñe’ẽ hendive kuéra ha ijapytépe kuéra ndojuhúi peteĩnte jepe ikatúva oñembo joja Daniel, Ananías Misael ha Azarías ndive. Upévare, ha’e kuéra opyta mburuvicha guasu rembiguái ramo. Opa mba’e oñekotevẽhápe ha’e kuéra iñarandu ha imba’e kuaáva. Mburuvicha guasu ojuhu ha’e kuéra mombyry oikuaaveha opavave umi karai arandu ha paje apoha hetãme oĩvagui.

Tupã Ñandejára Ñe’ẽ.

SALMO ÑEMBOHOVÁI     Dn 3, 52-56

R. Tupä Ñandejára nde reñemomba’e guasu ha reñemomorã opa ára.

Ndéve roguerohory, Tupã, oreru kuéra ypykue Jára.

Ndéve romomba’e guasu opa ára.

Roguerohory nde réra marangatu, ha romomba’e guasu. R.

Ndéve rejererohory nde Tupao marangatu mimbipápe,

reñemomba’e guasu ha reñemomorã opa ára.

Ndéve rejererohory mburuvicha guasúicha reguapýva. R.

Ndéve rejerohory rehechágui umi ipypukuvehápe,

ha reguapy umi tekove ipepóva ári,

nde reñemomba’e guasu ha reñemomorã opa ára. R.

Ndéve rejererohory yvága ha arapýre,

nde réra ojererohory ha reñemomba’e guasu

reñemomba’e guasu ha reñemomorã opa ára. R.

ALELUIA Mt 24, 42a. 44

Aleluia.

Pejesarekóke ha peime ñembosako’ihápe, peimo’ã’ỹve jave niko che, yvypóraicha aju va’ekue aju jevýta.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                         21, 1-4

Upe ramo Jesús ohecha hína umi imba’e retávape oitýrõ viru pe mba’e me’ẽ karameguãme, ha ohecha avei peteĩ kuña mboriahu imenave’ỹva oityha mokõi viru pehẽngue mi.

Aipórõ Jesús he’i: Añetehápe ha’e peẽme pe kuña mboriahu imenave’ỹva ome’ẽve hague opavavégui. Opavave niko omba’e me’ẽ hembývagui ichupe kuéra, ha’e katu, imboriahu pa’ũme, ome’ẽmba oguereko va’ekue  okaru haguã.

Ñandejára Jesucristo Ñe’ẽ.