LECTURAS DEL 26 DE NOVIEMBRE

LECTURAS DEL 26 DE NOVIEMBRE

Primera lectura:

Ko’ágä   ñahendúta Tupã Ñandejára ñe’ẽ Daniel arandukápe oĩ háicha   

             2, 31-45

Daniel he’i mburuvicha guasu Nabucodonosorpe:

Nde képe, nde che jára, rehecha kuri opu’ãha nde resa renondépe peteĩ ta’ãnga nde’áva. Upéva overa ha omimbipa, ha tuicha oporomongyhyje.

Pe iñakã ojejapo óro itégui, ipyti’a ha ijyva plátagui, hye ha umi hetyma máta vrónsegui, umi hetyma katu fiérrogui, ha ipy fiérro ha ñai’ũgui.

Nde rema’ẽ aja hese, peteĩ yvytýgui ho’a sapy’a ijehegui peteĩ ita, ha ojapajeréi ou ojejapi pe ta’ãnga pýre ha omoangu’ipa ite peteĩ sapy’a itépe upe ñai’ũ, fiérro, vrónse, pláta ha óro ijaku’i tumi yvy timbóicha, ha yvytu ogueroveve oheja’ỹre hapykuere ku ñana pirukuéicha ára haku jave. Pe ita katu okakuaa ha oiko ichugui  peteĩ yvyty omoenyhẽva yvy tuichakue.

Péicha rehecha va’ekue  nde képe, ha ko’ágä  amombe’úta ndéve mba’épa he’ise. Che ruvicha, nde hína mburuvicha guasu imbaretevéva ko yvy ári. Tupã Ñandejára yvága pegua ne mboguapy mburuvicha ramo ha ome’ẽ ndéve pu’aka, mbarete ha ne moerakuã guasu. Ha’e omoĩ nde po guýpe opa mba’e ko yvy ári oikóva, tymba ha guyra kuéra. Che ruvicha, ha’e ne omoĩ opa mba’e ári. Pe ta’ãngágui, nde hína upe iñakã órogui ojejapóva.

Nde rire oúta mburuvicha guasu ikangyvéva nde hegui, upéi mbohapyha vrónse joguaha, oisãmbyhýtava opa rupi ko yvy jerekuévo. Upéi oúta irundyha, fiérroicha imbaretéva, ha pe fiérro omoangu’i ha ohundi háicha opa mba’e, upéicha upéva omoangu’i ha ohundíta umi tetã ambuépe.

Rehecha kuri mba’éichapa umi ipy ha umi ipysã ñai’ũ ha fiérrogui ojejapo hague. Upéva he’ise upe tetã oñepehe’ãta, na ipeteĩ mo’ãi. Peteĩ hendápe imbaretéta fiérroicha, umi ipýicha.

Rehecha avei umi ipysã fiérro ha ñai’ũgui ojejapo hague, upéva he’ise upe tetã peteĩ hendápe imbareteha fiérroicha ha ambuépe ikangýta ñai’ũicha. Rehecha mba’éichapa pe fiérro ojehe’aha ñai’ũre. Péicha oñeha’ãta umi mburuvicha ñemenda rupi ojoaju oñondive, imbareteve haguã. Nosẽ mo’ãi ichupe kuéra upéva, fiérro ha ñai’ũ niko ndojehe’áiva oñondive. Oisãmbyhy aja ko’ã mburuvicha kuéra, Tupã Ñandejára yvága pegua omopu’ãta peteĩ tetã noñehundi mo’ãiva araka’eve.

Ha’ekuéra ndo’a mo’ãi avaveichagua tetã poguýpe. Ohundi etéta uvei ambue tetãnguéra ha ndopa mo’ãi araka’eve.

Upéva hína pe ita rehecha va’ekue  osẽ pe yvytýgui, avave omongu’e’ỹ rehe ichupe. Ha’e omoangu’i pe fiérro, vrónse, ñai’ũ, pláta ha óro. Tupã Ñandejára ipu’akapáva ohechauka ndéve, che ruvicha, pe ojehútava umi ára oútavape.

Péicha rehecha kuri nde képe ha pe he’iséva añetegua hína.

Tupã Ñandejára Ñe’ẽ.

SALMO ÑEMBOHOVÁI          Dn 3, 57-61

R. Tupä Ñandejárape, pemomba’e guasu ha peropurahéi ichupe opa ára.

Opa Tupä Ñandejára rembiapokue perohory ichupe,

pemomba’e guasu ha peropurahéi ichupe opa ára. R.

Tupä Ñandejára remimbou kuéra, pererohory

Tupä Ñandejárape, pemomba’e guasu, pepurahéi opa ára. R.

Yvága, erohory Tupä Ñandejárape,

emomba’e guasu ha eropurahéi ichupe opa ára. R.

Ykuéra yvága ári peiméva perohory Tupä Ñandejárape,

pemomba’e guasu ha peropurahéi ichupe opa ára. R.

Opa mbyjakuéra, perohory Tupä Ñandejárape,

pemomba’e guasu ha peropurahéi ichupe opa ára. R.

ALELUIA Apoc 2, 10c

Aleluia.

Ejeroviáke emano meve ha ame’ëta ndéve ne

akä rehe guarä hekovéva.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?  

                     21, 5-9

Upe ramo ohendúvo hetápe oguerohoryha hikuái pe Tupao pegua umi ita hepýva ha kuave’ẽmby oñeme’ỹva Tupã Ñandejárape, Jesús he’i: Opa mba’e pehechávagui, oguahẽta ára ndopyta mo’ãiha peteĩ itánte jepe ojo’ári. Oñehundipa itéta.

Aipórõ oporandu ichupe hikuái: Mbo’ehára, mba’éicha piko rohecha kuaáta oguahẽmaha ára oiko potaha umi eréva?

Jesús he’i: “Pema’ẽ porãke. Aníke peheja avave pene mbotavy. Cháke oĩta heta oúva che rérape. He’íta hikuái: ‘Che ha’e upe Cristo’, ha ‘Oguahẽma ára’. Ha peẽke ani peho hapykuéri kuéra. Pehendúta oikoha ñorairõ guasu opa rupi. Anínte peñemondýi. Umíva umi mba’e niko ojehu raẽ va’erã voínte, jepe upéva nde’iséi oguahẽmaha pe ára paha.”

He’ive ohóvo ichupe kuéra: “Peteĩ tetã opu’ãne ambuére, ha opavave opu’ãmbáne ojuehe. Oikóta heta yvyryrýi guasu, ha oĩta ñembyahýi ha mba’asy heta hendápe. Ha árare ojehecháta heta mba’e oporomondýiva ha mba’e hechapyrã tuicháva.”

Ñandejára Jesucristo Ñe’ẽ.