LECTURAS DEL MIÉRCOLES 27 DE NOVIEMBRE

LECTURAS DEL 27 DE NOVIEMBRE

Primera lectura:

Ko’ágä   ñahendúta Tupã Ñandejára ñe’ẽ Daniel arandukápe oĩ háicha   

    5, 1-6. 13-14. 16-17. 23-28

Baltasar, Babilonia ruvicha guasu, ohenói karu guasúpe mburuvicha guasu kuéra hetãmegua. Upe karu guasúpe heta ho’u hikuái vino. Opiguy joparáma ramo, Baltasar ojerure ojegueru haguã ichupe umi kópa ha tása guasu pláta ha órogui ojejapo va’ekue. Umíva itúva Nabucodonosor oguenohẽ ha ogueraha va’ekue  Tupã Ñandejára tupaógui oĩva Jerusalénpe. Ha ojererúvo umíva, mburuvicha guasu ha ambue mburuvicha kuéra, hembireko ha ikuña kuéra reheve ho’u pype vino. Ho’u joa hikuái vino ha omomba’e guasu itupã gua’u kuéra ojejapóva óro, pláta vrónse, fiérro, yvyra ha itágui.

Peichaháguinte ojehecha peteĩ po oñepyrũva ohai ikuãme pe ogykére upe tataindy ohesape porãvehápe. Ha mburuvicha guasu ohecha mba’éichapa pe po ohai ohóvo.

Upépe hova sysyipa ha hesa’yju mimbi kyhyjégui ha oñepyrũ oryrýi osusũ ipy guive, iñakã meve.

Daniel ojereraha mburuvicha guasu rendápe, ha ha’e he’i Daniélpe: Nde piko hína Daniel? Nde piko judío hína, che ru Nabucodonosor ogueru va’ekue  hembiguairã? Ahendu Tupã espíritu oĩha nde pype ha ne akã porã, ne arandu ha ne mba’e kuaaha.

Ahendu nde ikatuha rejora umi mba’e avave ikatu’ỹva ojora. Remoñe’ẽ ramo ko’ã ñe’ẽ ogyke rehe oĩva ha ere chéve mba’épa he’ise, romondéta ao pytã jeguápe, amoĩta nde ajúri ajurigua órogui ojejapóva, ha ndéta mburuvicha mbarete che retãme.

Upérõ Daniel he’i ichupe: Topytapánte ndéve umi mba’e reme’ẽséva chéve ha emoĩ che rendaguépe peteĩ oikoséva nde róga guasúpe. Amombe’úta ndéve, che ruvicha guasu, mba’épa he’ise umi ñe’ẽ ogykére ojehaíva.

Nde reja’yvere Tupä Ñandejára yvágape oĩva ndive rerukávo ne mesápe umi kópa ha tása guasu itupao pegua, ha ne mbohupa kuéra ndive re’u pype vino ha remomba’e guasu tupã nguéra óro, pláta, vrónse, fiérro, yvyra ha itágui ojejapóva. Umíva niko ndohechái, nohendúi ha ndoikuaái mba’eve. Tupã Ñandejárape katu neremomba’e guasúi, ku ipópe oĩva nde rekove ha ipópe oĩ opa mba’e nde rejapóva. Upévare ha’e ombou upe po, ohai haguã ko’ã ñe’ẽ: Mene, Tekel ha Parsin.

Umíva he’ise ko’ã mba’e: Mene, Tupã omoĩ mboy árapa nde reisãmbyhýta ne retã ha araka’e opáta. Tekel: Nde reñeha’ã mba’e ra’ãhápe, ha rejejuhu nde vevyiha. Parsin: Ne retã oñemboja’o ha oñeme’ẽta tetã Media ha Pérsiape.

Tupã Ñandejára Ñe’ẽ.

SALMO ÑEMBOHOVÁI     Dn 3, 62-67

R. Tupä Ñandejárape, pemomba’e guasu ha peropurahéi ichupe opa ára.

Kuarahy ha jasy perohory Tupä Ñandejárape,

pemomba’e guasu ha peropurahéi ichupe opa ára. R.

Yvágare mbyjaita perohory Tupä Ñandejárape,

pemomba’e guasu ha peropurahéi ichupe opa ára. R.

Ama ha ysapy perohory Tupä Ñandejárape,

pemomba’e guasu ha peropurahéi ichupe opa ára. R.

Opa ite yvytu perohory Tupä Ñandejárape,

pemomba’e guasu ha peropurahéi ichupe opa ára. R.

Tata ha ára haku perohory Tupä  Ñandejárape,

pemomba’e guasu ha peropurahéi ichupe opa ára. R.

Ro’y ha y rypy’a perohory Tupä Ñandejárape,

pemomba’e guasu ha peropurahéi ichupe opa ára. R.

ALELUIA Apoc 2, 10c

Aleluia.

Ejeroviáke emano meve ha ame’ëta ndéve ne

akä rehe guarä hekovéva.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?  

                     21, 10-19

Upe ramo Jesús he’i hemimbo’e kuérape: “Pema’ẽ porãke. Aníke peheja avave pene mbotavy. Cháke oĩta heta oúva che rérape. He’íta hikuái: ‘Che ha’e upe Cristo’, ha ‘Oguahẽma ára’.

Ha peẽke ani peho hapykuéri kuéra. Pehendúta oikoha ñorairõ guasu opa rupi. Anínte peñe mondýi. Umíva umi mba’e niko ojehu raẽva’erã voínte, jepe upéva nde’iséi oguahẽmaha pe ára paha opa ko’ã mba’e mboyve, peẽ peñe moakãsãta ha peñe muñáta. Pejereraháta umi judío kuéra tupaópe peñembojovake haguã. Pejereraháta yvyrakuápe ha pene moĩne umi buruvicha guasu ha sãmbyhyhára kuéra renondépe, peiko haguére che ndive.

Upéicharõ ijáta peẽme peñe’ẽ che rehe ichupe kuéra. Aníke peje py’apy peje va’erãre. Che ame’ẽta hína peẽme ñe’ẽ arandu meméva, avave umi pende rehe ija’e’ỹva ikatu’ỹtava ombohovái. Ha oiméta pene ra’ãva pende kupéguio, pende ru jepe, pende ryvy ha pende ryke’y kuéra, pende rogagua ha pene irũ nguéra.

Oiméta pende apytépe ojejukáva, ha che remimbo’e haguére peẽ, avave ndaija’e mo’ãi pende rehe. Ha peteĩ pene akã rague jepe ndo’a mo’ãi pende hegui. Pejepytasóke, pehupity haguã jeikove opa’ỹva.

Ñandejára Jesucristo Ñe’ẽ.