LECTURAS DEL BAUTISMO DEL SEÑOR

LECTURAS DEL BAUTISMO DEL SEÑOR

LECTURA PETEÎHA:

Ko’ágä ñahendúta Tupä Ñandejára ñe’ẽ Isaías arandukápe oĩ háicha  42, 1-4. 6-7

Péicha oñe’ẽ Tupã Ñandejára: “Kóina ápe che rembiguái, che amo’ãva,

che rembiporavo che mbovy’áva.

Ipype amoĩ che espíritu ogueraha haguã teko joja opa tetãme.

Ndosapukái mo’ãi, ndoporoja’o mo’ãi,

nohenduka mo’ãi iñe’ẽ okaha rehe, nomopẽ mo’ãi takuapi ojepepýmava,

nombogue mo’ãi tataindy hendy’ímava.

Ojapóta heko itépe upe heko jojáva.

Ndopytu’u mo’ãi ha naikangy mo’ãi omoĩ meve yvy ári teko joja.

Tetã mombyrygua ojapysakáta hemimbo’e rehe.

Che, nde Jára, rohenói ha rogueraha nde pógui,

nde rupi amoĩ haguã teko joja.

Che rohenói aipotágui rehechauka che ñe’ẽ me’ẽ yvypórakuérape ha resape tetãnguérape.

Rehesape’a haguã ohecha’ỹvape, renohẽ haguã jepokuahagui

umi oikóvape iñapytĩmby ha koty ypytũgui umi pytũmbýpe oikóvape.

Tupä Ñandejára Ñe’ẽ.

SALMO ÑEMBOHOVÁI  29, 1a. 2-3ac. 4. 3b. 9c-10

Opavave: Tupã Ñandejára ohovasa hetã py’aguapýpe.

Pemomba’e guasu Tupã Ñandejárape,

Pemomba’e guasu héra

ñane mbopy’a rorýva Tupaópe,

Tupä Ñandejára ohovasa hetã py’aguapýpe. O.

Tupã Ñandejára ñe’ẽ hyapupa y ape rehe.

Tupã Ñandejára oñemoĩ yguasu ári.

Tupã Ñandejára ñe’ẽ hatã hyapu,

Tupä Ñandejára ñe’ẽ opa rupi oñehendu. O.

Tupã Ñandejára ojajaipáva oñeñanduka aratirícha

Tupaópe maymáva he’i: “Tupã Ñandejára niko tuicha”.

Tupã Ñandejára oguereko ama ipo guýpe,

ha’e mburuvicha guasu opa árape O.

LECTURA MOKOÎHA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha  10, 34-38

Pedro oñepyrũ oñe’ẽ ha he’i: Ko’ágã aikuaáma, añetehápe Tupã Ñandejárape guarã peteïchanteha opavave, ha oimeraẽ tetã megua, ichupe omboajéva  ha iporãva ojapóvape, oguerohoryha avei. Tupã Ñandejára oñe’ẽ va’ekue Israel ñemoñare kuérape, omombe’úvo py’a guapy rehegua ñe’ẽ, Jesucrísto , opavave Jára, rupi.

Peẽ peikuaa porã upe ojehu va’ekue Israel retãme, oñepyrũvo Galilea rupi, Juan omoerakuã rire tekotevẽha oñeñemongarai. Peikuaa Tupã Ñandejára omoenyhẽ hague pokatu ha Espíritu Sántogui Jesús Nazaret guápe, ha Jesús ohasa hague ojapóvo iporãva ha omonguerávo opa ohasa asývape mba’e pochy poguýpe. Upéva ikatu va’ekue ojapo Tupã oĩgui hendive.

Tupã Ñandejára Ñe’ẽ

ALELUIA  Cf. Mc 9, 7

Aleluia.

Upévo ou peteĩ arai ha ojaho’i ichupekuéra. Ha pe araígui oñehendu peteï ñe’ẽ he’íva: “Kóva hína che Ra’y ahayhuetéva, pehendu ichupe”.

Aleluia.

EVANGELIO

Ñahendúta Ñandejára Jesucrísto rekove ha hemimbo’e San Mateo omombe’u háicha   3, 13-17

Upe ramo Jesús osẽ Galiléagui ha oho Juan rendápe, ysyry Jordánpe, ha’e omongarai haguã ichupe. Ha Juan nomongaraiséigui Jesúspe he’i ichupe:

Nde uvei niko chéve che mongarai va’erã. Ha piko nde reju che rendápe?

Jesús katu he’i ichupe:

Marãve ndoikói. Iporã niko jajapopa heko itépe Tupä Ñandejára oipotáva.

Juan ojapo Jesús he’i haguéicha ichupe. Jesús oñemongarai rire ha osẽvo upe ýgui,  yvága ojepe’a ha Jesús ohecha Tupã Ñandejára Espíritu, oguejýva hi’ári pykasúicha. Upévo oñehendu peteï oñe’ẽva yvágagui, ha he’íva:

Kóva hína che ra’y ahayhúva, che aiporavo va’ekue.

Ñandejára Jesucrísto  Ñe’ẽ.