LECTURAS DEL DOMINGO 12 DE ENERO

LECTURAS DEL DOMINGO 12 ENERO: EL BAUTISMO DEL SEÑOR

Ko’ágä ñahendúta Tupä Ñandejára ñe’ẽ Isaías arandukápe oĩ háicha                                                        

              42, 1-4. 6-7

Péicha oñe’ë Tupä Ñandejára:

“Kóina ápe che rembiguái, che amo’ãva, che rembiporavo che mbovy’áva.

Ipype amoĩ che espíritu ogueraha haguã teko joja opa tetãme.

Ndosapukái mo’ãi, ndoporoja’o mo’ãi, nohenduka mo’ãi iñe’ẽ okaha rehe, nomopẽ mo’ãi takuapi ojepepýmava, nombogue mo’ãi tataindy hendy’ímava.

Ojapóta heko itépe upe heko jojáva. Ndopytu’u mo’ãi ha naikangy mo’ãi omoĩ meve yvy ári teko joja.

Tetã mombyrygua ojapysakáta hemimbo’e rehe. Che, nde Jára, rohenói ha rogueraha nde pógui, nde rupi amoĩ haguã teko joja.

Che rohenói aipotágui rehechauka che ñe’ẽ me’ẽ yvypórakuérape ha resape tetãnguérape.

Rehesape’a haguã ohecha’ỹvape, renohẽ haguã jepokuahagui umi oikóvape iñapytĩmby  ha koty ypytũgui umi pytũmbýpe oikóvape.

Tupä Ñandejára Ñe’ẽ.

SALMO ÑEMBOHOVÁI                           29, 1a. 2-3ac. 4. 3b. 9c-10

R. Tupä Ñandejára ohovasa hetã py’aguapýpe.

Pemomba’e guasu Tupä Ñandejárape, Pemomba’e guasu héra

ñane mbopy’a rorýva Tupaópe, Tupä Ñandejára ohovasa hetã py’aguapýpe. R.

Tupä Ñandejára ñe’ẽ hyapupa y ape rehe. Tupä Ñandejára oñemoĩ yguasu ári.

Tupä Ñandejára ñe’ẽ hatã hyapu, Tupä Ñandejára ñe’ẽ opa rupi oñehendu. R.

Tupä Ñandejára ojajaipáva oñeñanduka aratirícha Tupaópe maymáva he’i: “Tupä Ñandejára niko tuicha”. Tupä Ñandejára oguereko ama ipo guýpe, ha’e mburuvicha guasu opa árape guarã. R.

Primera lectura:

Ko’ágä ñahendúta Tupä Ñandejára ñe’ẽ Apóstolkuéra rembiapokuépe oĩ háicha                                                  

    10, 34-38

Pedro oñepyrũ oñe’ẽ ha he’i:

Ko’ágã aikuaáma, añetehápe Tupä Ñandejárape guarã peteïchanteha opavave, ha oimeraẽ tetã megua, ichupe omboajéva  ha iporãva ojapóvape, oguerohoryha avei. Tupä Ñandejára oñe’ẽ va’ekue Israel ñemoñarekuérape, omombe’úvo py’a guapy rehegua ñe’ẽ, Jesucrísto, opavave Jára, rupi.

Peë peikuaa porã upe ojehu va’ekue Israel retãme, oñepyrũvo Galilea rupi, Juan omoerakuã rire tekotevẽha oñeñemongarai. Peikuaa Tupä Ñandejára omoenyhẽ hague pokatu ha Espíritu Sántogui Jesús Nazaret guápe, ha Jesús ohasa hague ojapóvo iporãva ha omonguerávo opa ohasa asývape mba’e pochy poguýpe. Upéva ikatu va’ekue ojapo Tupä oĩgui hendive.

Tupä Ñandejára Ñe’ẽ

ALELUIA Cf. Mc 9, 7

Aleluia.

Upévo ou peteï arai ha ojaho’i ichupe kuéra. Ha pe araígui oñehendu peteï ñe’ẽ he’íva: “Kóva hína che Ra’y ahayhu etéva, pehendu ichupe”.

Aleluia.

EVANGELIO

Ko’ágä ñahendúta Ñandejára Jesucrísto  rekove ha hemimbo’e San Mateo omombe’u háicha.

Pejapysaka porãtapa hese?                                                      3, 13-17

Upe ramo Jesús osẽ Galiléagui ha oho Juan rendápe, ysyry Jordánpe, ha’e omongarai haguã ichupe. Ha Juan nomongaraiséigui Jesúspe he’i ichupe:

Nde uvei niko chéve che mongarai va’erã. Ha piko nde reju che rendápe?

Jesús katu he’i ichupe:

Marãve ndoikói. Iporã niko jajapopa heko itépe Tupä Ñandejára oipotáva.

Juan ojapo Jesús he’i haguéicha ichupe. Jesús oñemongarai rire ha osẽvo upe ýgui,  yvága ojepe’a ha Jesús ohecha Tupä Ñandejára Espíritu, oguejýva hi’ári pykasúicha. Upévo oñehendu peteï oñe’ẽva yvágagui, ha he’íva:

Kóva hína che ra’y ahayhúva, che aiporavo va’ekue.

Ñandejára Jesucrísto  Ñe’ẽ.