LECTURAS DEL LUNES TRIGÉSIMO

LECTURAS DEL LUNES TRIGÉSIMO

Primera lectura:

Ñahendúta Tupã Ñandejára Ñe’ẽ  San Pablo ohai va’ekue Roma guápe

                                                                            8, 12-17

Che pehẽnguekuéra:

Aipórõ, jareko jajapo va’erã jaikóvo, ha ndaha’éi yvypóra reko kangýpe. Peiko ramo peẽ yvypóra reko kangýpe, pemanóta. Ha Espíritu rupi pejuka ramo upe yvypóra reko kangy, peikovéta.

Opa oñesãmbyhykáva Tupã Espíriture, umíva Tupã Ñandejára ra’y. Peẽme niko noñeme’ẽi peteĩ Espíritu peiko haguã tembiguái ramo, pe’a jevy haguã kyhyjépe. Upéva rangue katu pe Espíritu ojapo pende hegui Tupã Ñandejára ra’y. Kóva ko Espíritu rehe ja’e Tupã Ñandejárape: “Háa che Ru!”

Ha upe Espíritu upéva voi ojoaju ñande espíriture ohechauka haguã, Tupã Ñandejára ra’ymaha ñande. Ha ñande ha’égui ita’ýra, jahupitýta avei Cristo ndive pe Tupã Ñandejára oguerekóvagui ichupe guarã, ha jahasa asy ramo Cristo ohasa asy haguéicha, ñaiméne avei hendive heko mimbipápe.

Tupã Ñandejára Ñe’ẽ.

SALMO ÑEMBOHOVÁI                 67, 2. 4. 6-7b. 20-21

R. Ñamomba’e guasu Tupã Ñandejárape ñande pe’áva jajejopy vaihágui.

Tupã Ñandejára ojetyvyro ha hese ija’e’ỹva isarambipa.

Okañymba umi ichupe ohayhu’ỹva.

Heko potĩva katu ovy’a, torypápe

osapukái ha ovy’a joa Tupã Ñandejára renondépe. O.

Opa ite ityre’ỹva ru ha’e, ha imenave’ỹva

ñangarekohára, itupao marangatu guive.

Ha’eñóvape ha’e ombohóga, oñeñapytĩvagui ha’e opoi

ovy’a haguã, hese oñemoĩva oikóne yvy ojeiko’ỹha rupi. O.

Ñamomba’e guasu Tupã Ñandejárape

ñande pe’áva jajejopy vaihágui.

Ha’e opa árape ijapére ohupíva ñane mba’e pohýi.

Tupã niko upe ñane pytyvõva ha upe ndohejáiva ñamano. O.

ALELUIA Flp 3, 8-9

Aleluia.

Ñandejára Jesucristo he’i:

“Che ovechakuéra ohendu che ñe’ẽ.

Che aikuaa ichupe kuéra ha ha’e kuéra oho che rapykuéri”.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Lucas omombe’u háicha  13, 10-17

Upe ramo peteĩ pytu’uha ára jave Jesús oñemoĩ oporombo’e peteĩ judíokuéra tupaópe. Ha oĩ hína upépe peteĩ kuña hasýva ojapóma 18 áño. Peteĩ mba’epochy omokarapã ra’e ichupe, ha ndaikatúi oñeakãupi.

Ohechávo upe kuña, Jesús ohenói ha he’i ichupe: Nde kuña, rekueráma ne mba’asýgui. Omoĩ ipo hese, ha upepete upe kuña oñeakãupi ha oñepyrũ oguerohory Tupã Ñandejárape. Pe judío kuéra tupao ruvicha katu ipochy, Jesús omonguera haguére upe kuñáme pytu’uha árape, ha he’i umi oĩvape: Oĩ niko 6 ára oñemba’apo haguã. Peju umi ára umívape peñe monguera haguã, ha ani pytu’uha árape.

Jesús he’i ichupe: Peẽ, tekove rova mokõi! Ndapejorái nga’u piko pene rymba guéi térã pene rymba vúrro pytu’uha ára jave, peraha haguã pemboy’úvo? Ko kuña peikuaa haguã, Abraham ñemoñaréva ha Satana oguereko va’ekue  iñapytĩmby ko mba’asýre ojapóma 18 áño, ndojejorái va’erãpa ra’e, taha’e jepe pytu’uha árape?

Jesús he’ívo péicha, umi hese ija’e’ỹva otĩ opytávo. Ha opavave katu ovy’a joa ohechávo umi mba’e guasu ha’e ojapóva.

Ñandejára Jesucristo Ñe’ẽ.