DOMINGO SEMANA 30 TO

LECTURA PETEÏHA: 

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 22, 20-26

Ani pejahéi mombyrygua pene ndive oikóva rehe, térã pejopy hendive. Mombyrygua va’ekue avei niko peë Egíptope. 

Ani pereko asy kuña mena’ỹ rehe opytávape, térã mitã tyre’ỹme. Pereko asy ramo ha osapukái chéve, nambohasa rei mo’ãi isapukái, hendýta che pochy ha pojukáta kyse pukúpe. Pene rembireko opytáta mena’ỹ rehe ha pene mitã nguéra tyre’ỹ. 

Peiporuka ramo pláta peteï che retãgua mboriahu pene ndive oikóvape, ani pejopy hendive térã pejerure to myengovia hetave peëme. Ome’ẽ ramo peẽme ijahoja, jeporuka jeroviaha ramo, peme’ẽ jeýke ichupe oikévo kuarahy. Upéva ñoite niko oguereko oñeñuã haguã ro’ýgui. Ỹrõ piko mba’épe oñeñuãta oke haguã? Chéve ojerure ramo pytyvõ, aipytyvõta. Chéko mboriahúpe aiporiahuvereko hína.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 17, 2-4. 47. 51ab

Opavave: Rohayhu Ñandejára, nde hína pe che mombaretéva.

Nde reñangareko che rehe, ne rendápe aguahẽ akañy haguã, 

nde reime che jerekuévo, nde hína pe che renohẽva jejopy vaígui. 

Añembo’e Ñandejárape, ichupe japurahéi va’erã. 

Ha’e, che pe’a umi che rayhu’ỹvagui. O.

Toikove Ñandejára, che pytyvõhára. To ñemomba’e Ñandejára che pe’áva ivaívagui. 

Tuicha reipytyvõ mburuvicha remoĩ va’ekuépe, na nde resaráiri ne rembiporavo pyrégui. O.

LECTURA MOKÖIHA: 

Ñahendúta Tupã Ñandejára Ñe’ẽ San Pablo ohai va’ekue Tesalónica guápe                    1, 5c-10

Che pehenguekuéra:

Peikuaa porã mba’éichapa ore mba’e porã pene ndive, rohekávo peẽme guarã iporãva. 

Peë katu pejapo ore rojapóva ha Ñandejára ojapo va’ekue. Ha pemoguahẽ pende py’ápe pe marandu porã vy’a guasúpe Espíritu Santo ome’ẽva peëme reheve, heta jehasa asy pa’ũme. Ha upéicha peiko ku oikose haguãicha mayma Jesucrísto  reroviaha, Macedonia ha Acáya pe.

Pende hegui, Ñandejára ñe’ẽ iñasãi, ndaha’éi  Macedonia ha Acáya pe añónte, opa rupi katu, ha ojekuaa pe jerovia peẽ perekóva Ñandejára rehe, ha upéicha rupi natekotevẽvéima ore ro’e mba’eve. 

Ha’ekuéra voi katu oñe’ẽ peẽme ore guahẽre, ha mba’éichapa peheja umi ta’ãnga rei ha pejevy Ñandejára gotyo, oikove ha añeteguáva, pejapo haguã ha’e oipotáva. Ha avei peha’arõha ou jevy yvágagui Jesús, pe Tupã Ra’y, Ñandejára omoingove jevy va’ekue. Jesús niko pe ñande pe’áva pe ñenupã vai ete oútavagui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 14, 23

Aleluia.

Pe che rayhúva ojapo che ha’éva ha che Ru ohayhúta ichupe. 

Ha che Ru ndive rojúne roiko hendive.

Aleluia.

EVANGELIO

Marandu porã Ñandejára Jesucristo rehegua San Mateo omombe’u háicha 22, 34-40

Opavave: Romomba’e guasu ndéve, Ñandejára.

Umi Fariséo ohecha kuaávo Jesús ojuru mboty hague saducéo kuérape, oñembyaty hikuái ha oho Jesús rendápe. Peteĩva, Moisés ley oikuaa porãva, ombopakova pireséva Jesúspe oporandu chupe: — Mbo’ehára, Ñandejára mandamiénto kuéra apytégui piko máva hína pe tuichavéva.

Jesús he’i chupe: — Tenondegua he’i, “Ehayhu Tupã Ñandejárape nde py’aite guive, ne ánga rugua guive ha opaite ne arandukue reheve”. Kóva hína pe tenondetegua ha pe tuichavéva.

Upéva rire oúva ojoguánte avei chupe, ha he’i kóicha, “Ehayhu nde rapichápe nde rejehayhu háicha”. Ko’ã mokõi mandamiénto ári oguapy hína opaite mba’e Ñandejára Ñe’ẽme oĩva.

Ñandejára Jesucristo Ñe’ẽ.

Opavave: Romomba’e guasu ndéve, Ñandejára Hesukrísto.