LECTURAS DEL MARTES 03 DE DICIEMBRE

LECTURAS DEL MARTES 03 DE DICIEMBRE

Primera lectura:

Ko’ágä   ñahendúta Tupã Ñandejára ñe’ẽ Isaías arandukápe oĩ háicha                                          

11, 1-10

Jesé rapógui osẽta hoky pyahu, upégui heñóita.

Tupã Ñandejára espíritu hi’ári opytáta, arandu ha akã porã espíritu, ñemoñe’ẽ kuaa ha mbarete espíritu, mba’e kuaa ha Tupä Ñandejára mboaje espíritu, ha omoheñóita ipype jepoyhu.

Opa mba’épe iñe’ẽ rendúta Tupã Ñandejárape, oporombojovake ramo, vaicha rehénte noma’ẽ mo’ãi, ha pe oje’énteva nohendu mo’ãi.

Ombojovakérõ ikangývape, teko joja oiporúta, ha imboriahúvape hekópe omohendáta.

Imbaretesévape, oinupãta iñe’ẽme tukumbópe ramo guáicha, ha pe iñañávape ipytúpe ojukáta.

Teko jojáta iku’a jokuaha, ha teko jeroviaha humby ñuãha.

Aguara guasu ovecha ra’y ndive oikóta, jaguarete ha kavara ra’y ojoykére oñenóta, vaka ra’y ha león okarúta oñondive, ha mitã’íta herekua.

Vaka ha óso oikóta oñondive ha ta’ýra kuéra oñenóta ojoykére, guéicha avei león ho’úta kapi’i.

Mitã kambu oñemboharáita mbói chumbe kuára ári, ha mitãmi ikuápe opo’ẽta.

Ndaipóri mo’ãi ñembyai térã sarambikue che yvyty marangatúpe, henyhẽtagui pe tetã Tupã Ñandejárape oikuaávagui, y omoenyhẽ háicha yguasu.

Upe árape Jesé rapo, mba’e rechaukaha ramo opu’ãta tetã nguérape guarã.

Tetã nguéra ohekáta upéva, ha omimbipáta hekoha.

Tupã Ñandejára Ñe’ẽ.

SALMO ÑEMBOHOVÁI                71, 1-2. 7-8. 12-13. 17

R.Hetãme tojeiko hendapete

Tupã Ñandejára, eme’ẽ mburuvicha guasúpe teko joja

ha mburuvicha guasu ra’ýpe teko potĩ,

ikatu haguãicha ne retã oisãmbyhy hekopete,

ha imboriahúvape tohecha kuaa. R.

Hetãme to jeiko hendapete

ha hetã to isãmbyhy jasy oñehundi peve.

Peteĩ yguasúgui ambue peve upe yvy toĩ ipo guýpe,

Éufrates ysyry guive yvy opaha peve. R.

Ha’e oguenohẽta imboriahúva ojerure asývape

umi mboriahu noñepytyvõivape.

Oiporiahuverekóta imboriahu ha ikangývape,

ha oipytyvõta umi ndo rekóiva mamo oho haguã rekove. R.

Mburuvicha guasu réra ani opa araka’eve,

ta herakuã kuarahy oñehundi peve;

tetã nguéra tojehovasa ipo rupi,

ha umíva tombovy’a ichupe. R.

ALELUIA

Aleluia.

Ñandejára Jesucristo oúta pu’aka reheve

ha omoesakãta umi hembiguái resa.

Aleluia

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                             

         10, 21-24

Upe ramo Jesús henyhẽ Espíritu Santo guigua vy’ápe, ha he’i: “Romomba’e guasu che Ru, yvy ha yvága Jára, reñomi haguére ko’ã mba’e umi iñarandu ha imba’e kuaávagui, ha reikuaauka umi iñarandu’ỹvape. Upéicha che Ru, péichante voi reipota va’ekue ojehu.

Che Ru niko omoĩ che po guýpe opa mba’e. Avave ndoikuaái Tupã Ra’ýpe, Túva añónte. Ha avave ndoikuaái Túvape, Tupã Ra’y añónte, ha umi oikuaaukasévape Tupã Ra’y oikuaauka.”

Ha ojerévo hemimbo’e kuéra gotyo, he’i ichupe kuéra año: “Ovy’a iténe umi ohecháva pe peẽ pehecháva hína. Añetehápe ha’e peẽme, heta maranduhára ha heta mburuvicha guasu ohechase va’ekue ko peẽ pehecháva, ha ndo hechái. Ha’e kuéra ohenduse va’ekue ko peẽ pehendúva, ha nohendúi.”

Ñandejára Jesucristo Ñe’ẽ.