LECTURAS DEL MARTES 14 DE ENERO

LECTURAS DEL MARTES 14 DE ENERO

Primera lectura:

Ko’ágä   ñahendúta Tupã Ñandejára ñe’ẽ Samuel arandukápe oĩ háicha                            

1, 10- 20

Ana hasẽ soro ha ipy’a renyhẽ ñembyasýgui. Oñemoĩ oñembo’e Tupã Ñandejárape, ha kóicha he’i ichupe: “Tupã che Jára nde pu’akapáva! Rema’ẽ ramo ko ne rembiguái poriahumíre, ne mandu’a ramo che rehe ha nde reipota rupi che memby ramo peteĩ mitã kuimba’e, ame’ẽta ndéve ne mba’erã ha noñekytĩ mo’ãi iñakã rague oikove aja pukukue”.

Ana oñembo’e puku rupi Tupã Ñandejára renondépe, Elí oma’ẽ ijurúre. Ana niko oñembo’e ipy’apýpente ha noñehendúi iñembo’e. Hembénte omomýi. Upévare Elí oimo’ã oka’uha, ha he’i ichupe: Reka’u jevýma hína! Terehóna ejera raẽ!

Ana he’i ichupe: Ndaka’úiko che karai! Nda’úi vino térã mba’eve ñane monga’úva. Ajepy’apy etereínte niko ha ahekuavo che mba’e mbyasy Tupã Ñandejára renondépe. Ani reimo’ã kuña vaiha che. Añembo’e puku aína aiko asy eterei ha ndavy’avéigui.

Elí he’i ichupe: Tereho katu py’a guapýpe ha Tupã Israel Jára to me’ẽ ndéve pe rejerure va’ekue.

Ana he’i ichupe: Terehecha kuaa kena chéve péicha opa ára!

Upéi ojevy oikohápe ha opa ichugui  vy’a’ỹ. Pe ára ambuépe opu’ã hikuái ko’ẽ mboyve ha omomba’e guasu rire Tupä Ñandejárape oho jevy hógape Ramáme. Upéi Elcaná oñeno hembireko Ana ndive ha Tupã Ñandejára imandu’a Ana rembijerurére. Péicha Ana opyta hye guasu. Ha oñembotývo hi’ára, imemby peteĩ mitã kuimba’e ha ombohéra ichupe Samuel, ojerure haguére Tupã Ñandejárape.

Tupã Ñandejára Ñe’ẽ.

SALMO ÑEMBOHOVÁI                         1Sam 2, 1.4-8

R. Tupã Ñandejára, che py’a ite guive roguerovy’a

Tupã Ñandejára, che py’a ite guive roguerovy’a,

nde che mombarete pyahúgui.

Umi che rehe ija’e’ỹvare che yvytu, nde che pytyvõ haguére avy’a rasa. R.

Ha’e omopẽ umi ipy’a guasuvéva hu’ykuéra,

ha umi ikangývape ha’e omombarete.

Umi hyvatã va’ekue, ko’ágä  ochanga tembi’u rembyrére. R.

Umi iñembyahýi va’ekue, ko’ágä  hyvatãmba.

Kuña ikatu’ỹ va’ekue imemby, ko’ágä  7 imemby,

ha pe imemby reta va’ekue, ko’ágä  icha’ĩmba. R.

Tupä Ñandejára oporojuka ha oporomoingove, ñane mboguejy pe yvy kuápe, ha upégui ñane renohẽ jevy.

Ñandejára ñane momboriahu, térã heta mba’e ome’ẽ ñandéve;

ha’e ñande reity, ha ñane mopu’ã jevy. R.

Tupã Ñandejára omopu’ã mboriahúpe yvýgui, ha yty apytégui mba’eve oguereko’ỹvape,

poguasu ykére ichupe omboguapy, ha ijyvatevehápe ichupe omohenda. R.

ALELUIA Cf. 1Tes 2, 13

Aleluia.

Pejapyhy Tupä Ñandejára ñe’ë ha ani yvypóra ñe’ëicha,

katu pe añete háicha. Tupä Ñandejára ñe’ë ramo.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       1, 21-28

Upe ramo Jesús oguahẽ Cafarnaúmpe, ha pytu’uha árape oike pe judío kuéra tupaópe, ha oñepyrũ oporombo’e. Opavave ohecha ramo joa ite mba’éichapa ha’e ombo’e ichupekuéra. Jesús niko nombo’éi umi Moisés rembiapoukapy mbo’eha ombo’e háicha.

Ha’e oporombo’e ku noikotevẽí ramo guáicha avavére oporombo’e haguã. Ha upe judío kuéra tupaópe, oĩ peteĩ kuimba’e oguerekóva mba’epochy, ha upéva osapukái: Mba’ére piko reñemoĩ ore rehe, Jesús Nazaretgua? Reju piko ore rundívo? Che roikuaa. Nde hína pe imarangatúva, Tupã Ñandejára omboúva.

Jesús oja’o pe espíritu añáme ha he’i ichupe: Ekirirĩ ha esẽ pe kuimba’égui!

Pe mba’epochy oityvyro mbarete pe kuimba’épe, ha osapukái hatãvo osẽ ichugui. Opavave oñemondýi ha he’i joa ojupe: Mba’éichagua ñe’ẽ piko ãva? Oikuaa porãhápe ha pokatúpe ko kuimba’e he’i umi mba’epochýpe osẽ haguã, ha ha’e kuéra ojapo ha’e he’íva!

Pya’e voi herakuã Jesús opa rupi Galiléa jerekuévo.

Ñandejára Jesucristo Ñe’ẽ