LECTURAS DEL MIÉRCOLES 15 DE ENERO

LECTURAS DEL MIÉRCOLES 15 DE ENERO

Primera lectura:

Ko’ágä   ñahendúta Tupã Ñandejára ñe’ẽ Samuel arandukápe oĩ háicha                              3, 3b-10. 19

Mitã rusu Samuel akóinte omomba’e Tupã Ñandejárape, ojapóvo pa’i Elí he’íva ichupe. Elí oke hína ikotýpe, Samuel katu oke tupaópe oĩháme Tupã Ñandejára karameguã. Pe mba’e rendy hendy Tupã Ñandejárape oñemoendýva, ne’ĩra gueteri oñembogue. Upérõ Tupã Ñandejára ohenói ichupe: Samuel!

Ha’e he’i: Mba’épa pa’i!

Pya’e oho Elí rendápe ha he’i ichupe: Ajúma. Mba’épa reipota!

Elí he’i ichupe: Norohenóiri kuri. Tereho eñeno jevy.

Samuel oho oñeno. Tupã Ñandejára katu ohenói jevy ichupe: Samuel!

Samuel opu’ã oho Elí rendápe ha he’i ichupe: Ajúma. Mba’épa reipota!

Elí he’i ichupe: Che norohenóiri che ra’y. Tereho eñeno.

Samuel ndoikuaái gueteri Tupä Ñandejárape, ku noñe’ẽiva gueteri ichupe. Tupã Ñandejára katu ohenói jevy Samuélpe ha ha’e oho Elí rendápe ha he’i ichupe: Ajúma. Mba’épa reipota!

Upérõ Elí ohecha kuaa Tupä Ñandejára ohenoiha pe mitã rusúpe, ha he’i ichupe: Tereho eñeno, ha Tupä Ñandejára ne renói ramo, ere ichupe: “Eñe’ẽ katu, ne rembiguái ne rendu!”.

Samuel oho jevy oñeno. Upéi oguahẽ Tupä Ñandejára, opyta, ha ohenói jevy ichupe, ojapóma haguéicha. Samuel, Samuel!

Samuel he’i ichupe: Eñe’ẽ katu, ne rembiguái ne rendu!

Samuel okakuaa ha Tupä Ñandejára oipytyvõ ichupe. Ha’e ndohejái ojapo’ỹre mba’eve umi ichupe he’i va’ekuégui. Opa Israelgua Dan guive Beerseba peve, ohecha kuaa Samuel ha’eha Tupã Ñandejára maranduhára añetegua.

Tupã Ñandejára Ñe’ẽ.

SALMO ÑEMBOHOVÁI                         39, 2.5. 7-10

R. Tupã che Jára, nde reipotávante niko che aipota

Tupä Ñandejára rehénte ajerovia. Che rendápe oñemboja ha che rendu.

Ovy’a rasa upe Tupä Ñandejára rehénte ojeroviáva,

ojehe’a’ỹva hembiapo vaíva ndive, ha japúpe oñeme’ẽ’ỹva. R.

Rejerure rangue mymba juka ha mba’e kuave’ẽ,

térã mymba hapy tembiapo vai jeheja reirã, hendaguépe reju che resape’a.

Upévare ha’e ndéve, eñe’ë katu, ápe aime. R.

Ne rembiapoukapýpe he’íma voi umi mba’e che ajapo va’erã.

Tupã che Jára, nde reipotávante niko che aipota,

ne rembiapoukapy areko che ñe’ã ruguápe. R.

Vy’ápe amoerakuä nde reko jojaha maymavéva oñemboatýva rendépe

Tupä Ñandejára, nde reikuaa akirirĩ rangue,

opavavépe aikuaauka hague nde reko joja. R.

ALELUIA Jn 10, 27

Aleluia.

Ñandejára Jesucristo he’i:

“Che ovecha kuéra ohendu che ñe’ë,

Che aikuaa ichupe kuéra ha ha’e kuéra oho che rapykuéri”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       1, 29-39

Upe ramo Jesús oho Santiago ha Juan ndive, Simón ha Andrés rógape. Simón rembireko sy iñakãnundu ha oĩ hupápe. Jesús ohendu upéva, oñemboja ha ipojáivo ipóre omopu’ã ichupe. Upévo opi iñakãnundu ha oñemoĩ ohecha mba’épa ha’e kuéra oikotevẽ.

Ka’aru ete, oikévo kuarahy, ogueraha hikuái Jesús rendápe opa hasýva ha oguerekóva mba’epochy, ha opa távagua oñemboaty hokẽme. Jesús omonguera heta hasývape opaichagua mba’asýgui ha omosẽ heta mba’epochy. Ha ndohejái ichupekuéra oñe’ẽ, ha’eKuéra oikuaágui ichupe.

Ko’ẽ mboyve Jesús opu’ã ha osẽ pe távagui, ha oho peteĩ avave oĩ’ỹháme oñembo’e haguã. Simón ha iñirũ nguéra oho Jesús píari, ha ojuhúvo he’i ichupe: Opavave nde reka. Jesús katu he’i ichupekuéra: Jaha umi hi’aguĩha rupi. Umi rupi avei tekotevẽ amoasãi che Ñe’ẽ, upevarã niko asẽ va’ekue.

Ha upéicha Jesús oiko Galiléa rupi omombe’úvo iñe’ẽ umi judíokuéra tupao rupi, ha omosẽvo mba’epochykuéra.

Ñandejára Jesucristo Ñe’ẽ