LECTURAS DEL MARTES DUODÉCIMO TIEMPO ORDINARIO

LECTURAS DEL MARTES DUODÉCIMO TIEMPO ORDINARIO

Ko’ágä ñahendúta Tupã Ñandejára ñe’ẽ Génesis arandukápe oĩ háicha  13, 2. 5-18

Abram hymba heta ha oguereko pláta ha óro.

Lot oho Abram ndive ijovecha, ivaka ha hogaguakuéra reheve. Yvy michĩma mokõivépe guarã, hymba heta itereígui hikuái.

Upévare Abram ha Lot rymba rerekuakuéra oñorairõ oñondive. Upérõ cananéo ha fariséo kuéra oiko gueteri upe tetãme. Ha Abram he’i Lótpe: “Ñande niko oñopehẽngue  ha naiporãi ñane rembiguái kuéra oñorairõ oñondive. Jajeíntena upéicha ramo ojuehegui. Eiporavo upe yvy pehẽngue  reipotavéva, taha’e kuarahy resẽ térã kuarahy reike gotyo. Upe rehejáva topyta che mba’erã.”

Lot oma’ẽ ha ohecha ñu guasu ojepysóva Jordán rembe’ýre oguahẽ meve tava’i hérava Sóar peve, hi’y heta ha ijyvy porãva, ojoguáva Tupã Ñandejára yvatýpe pe Egipto yvýicha Sóar gotyo peve.

Upéicha va’ekue Tupã Ñandejára ombokusugue mboyve umi táva guasu Sodoma ha Gomorra. Lot oiporavo imba’erã upe yvy, ha oho kuarahy resẽ gotyo.

Upéicha va’ekue ojei haguã ojuehegui Abram ha Lot. Abram opyta Canaánpe, ha Lot ojererova umi ñúme, táva guasukuéra apytépe, ha opyta Sodoma ypýpe. Sodomagua heko ky’a ha iñangaipa Tupã Ñandejára renondépe.

Oho rire Lot, Tupã Ñandejára he’i Abrámpe: “Upe  reimehágui ema’ẽ opa gotyo. Opa yvy rehecháva ame’ẽta ndéve ha ne ñemoñarépe opa ára guarã. Heta ne ñemoñaréta, ikatu’ỹ haguãicha ojepapa. Ikatu ramo ojepapa yvy ra’ỹi, ikatúne avei ojepapa ne ñemoñare kuéra. Epu’ã ha eguata ko tetã pýre rehecha haguã ituichakue.

Upéva ame’ẽmbáta ndéve.” Upérõ Abram ojererova ha opyta Mambré ka’aguy ykére, Hebrón ypýpe. Upépe omopu’ã altar Tupã Ñandejárape.

Tupã Ñandejára Ñe’ẽ.

SALMO ÑEMBOHOVÁI   14, 2-4b. 5

Opavave: Tupã Ñandejára, mávapa oikéta nde rógape.

Upe hembiapo porã ha oikóva heko itépe

ha maymáva ndive heko jojáva,

upe añete guánte he’íva ipy’a ite guive,

upe oñe’ẽ vai’ỹva hapicháre. O.

Upe ojapo’ỹva ivaíva hapicháre,

upe oiko vai’ỹva hapicha ndive,

upe oñe’ẽ vai’ỹva hapicháre,

upe oiko vai’ỹva hapicha ndive. O.

Upe Tupã Ñandejárare ojeroviávape omomba’éva,

upe pláta oiporuka’ỹva mba’eve repýre,

térã plátare omoĩ vai’ỹva hapichápe.

Upe ojapóva ko’ã mba’e, ndo’ái chéne araka’eve. O.

ALELUIA  Jn 8, 12

Aleluia.

Ñandejára Jesucristo he’i: “Che hína pe ohesapéva yvy ape ári; pe che moirüva orekóta mba’e resapeha Tekove rehegua”.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha   7, 6. 12-14

Upe ramo Jesús he’i hemimbo’ekuérape:

Ani peme’ẽ umi mba’e imarangatúva jaguápe, aníntemo ojere pende rehe ha pende su’upa. Ani peity pene mba’e jeguaka kurépe, aníntemo opyrũmba rei hese.

Upévare, pejapo pende rapicháre upe peẽ peipotáva ha’e kuéra ojapo pende rehe. Upévape he’ipa itéma Moisés rembiapoukapy ha maranduhárakuéra kuatia Ñe’ẽme oĩva.

Peikéke pe okẽ po’i rupi. Cháke ipe hína upe okẽ ha ipe upe tape ohóva aña retãme. Ndahasýi upe tape rupi jaiko ha heta umi oikéva upe okẽ rupi. Upe okẽ ha upe tape ohóva tekovetépe katu ipo’i ha hasy upe rupi jaiko. Ha pokã umi ojuhúva pe okẽ.

Ñandejára Jesucristo Ñe’ẽ.