LECTURAS DEL MIÉRCOLES II DE CUARESMA

LECTURAS DEL MIÉRCOLES II DE CUARESMA

PRIMERA LECTURA

Ko’ágã ñahendúta Tupã Ñandejára ñe’ẽ Jeremías arandukápe oĩ háicha   18, 18-20

Kuimba’e oikóva Judá ha Jerusalénpe, he’i: “Jaheka mba’éichapa ñahundíta Jeremíaspe. Jarekóne katu ete pa’i ñande rekombo’e haguã, karai arandu omombe’u va’erã ñandéve hemiandu ha maranduhára ohenduka va’erã ñandéve Ñandejára Ñe’ẽ. Jaraha mbojovakehára rendápe ojukauka haguã ichupe. Aníke ñahendu mba’eve ha’e he’íva.”

Che Jára, ejapysakána che rehe!

Ehendúna upe he’íva umi che rehe ija’e’ỹva!

Ivaívape piko oñemyengoviáva iporãva?

Ha’e kuéra ojo’óma che yvykuarã!

Ne mandu’akena rombohovái hague añe’ẽ haguã ndéve hesekuéra, ajerure haguã ndéve nde pochy poi haguã hendivekuéra.

Tupã Ñandejára Ñe’ẽ.

SALMO ÑEMBOHOVÁI   30, 5-6. 14-16

R. Tupã Ñandejára, nde rehe ajerovia.

Ñuhã niko omoĩ chéve hikuái, che pe’ákena upégui.

Ndéko hína pe che rehe reñangarekóva.

Nde pópe amoĩ opa che rekove, che Jára Tupã añetete, nde hína pe che pytyvõtáva. R.

Okyhyjepa hikuái.

Ahendu oñe’ẽha che rehe, ha opu’ãmbataha che juka.

Tupä Ñandejára, nde rehe ajerovia. R.

Ndéve ha’e nde che Jaraha, ha opa che rekove nde pópe oĩha.

Ani che rejátei ha’a umi che rayhu’ỹva ha che ári oikóva pópe. R.

VERSÍCULO ANTES DEL EVANGELIO Jn 8, 12

Ñandejára Jesucristo he’i:

“Che hína pe ahesapéva yvy tuichakue;

pe che moirüva orekóta tesakä Tekove rehegua”.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 20, 17-28

Upe ramo Jesús ohóvo Jerusalénpe, ogueraha umi 12 hemimbo’ekuérape ha’eñoháme, ha he’i ichupe kuéra: Jaha niko ñaína Jerusalénpe. Upépe, che, yvypóraicha aju va’ekuépe, oĩta che moĩva pa’ikuéra ruvicha ha Moisés rembiapoukapy mbo’eha pópe, ha ha’e kuéra ojeruréta ajejuka haguã.

Upéi, che me’ẽta hikuái ambue tetãgua pópe oñembohory haguã che rehe, che nupã ha che mosãingo haguã kurusúre. Mbohapy ára haguépe katu aikove jevýta.

Oñemboja Jesús rendápe Zebedeo rembireko, imemby Santiago ha Juan ndive, ha oñesũ ha’e Jesús renondépe, ojerure haguã ichupe peteĩ mba’e. Jesús oporandu ichupe: Mba’épa reipota ajapo?

Ha’e he’i ichupe: Aipota ere chéve, ko’ã che memby mokõi oguapytaha peteĩ nde akatúa gotyo ha ambue nde asu gotyo reguapývo reisãmbyhy mburuvicha guasúrõ.

Jesús he’i ichupekuéra: Peẽ niko ndapeikuaái mba’épa pejeruréva. Peẽ nga’u piko peime pehasa asy haguãicha, che ahasa asýta háicha?

Ha’e kuéra he’i: Roime rohasa haguã.

Jesús he’iichupekuéra: Pehasa asýta añete che ahasa asyta háicha. Peguapy haguã che ykére katu ndaijái chéve ame’ẽ. Che Túva upéva ome’ẽta umi ha’e ombosako’i va’ekuépe.

Umi 10 hemimbo’ekuéra ohendúvo upéva, ipochy umi mokõi ojoryvy ndive. Ha Jesús ohenói ichupekuéra ha he’i: Peẽ niko peikuaa mba’éichapa mburuvichakuéra po pohýipe oisãmbyhy umi hetã, ha mba’éichapa poguasukuéra ave oguereko vai ichupekuéra. Pende apytépe katu ndaupéichai va’erã.

Upéva rangue pe tuichaséva pende apytépe toiko pene rembijokuái ramo. Ha pe itenondeséva pende apytépe, toiko pene rembiguái ramo. Che, yvypóraicha aju va’ekue, niko ndajúi va’ekue che rembiguairã rekávo, aikóvo tembiguáirõ katu, ha ame’ẽvo che rekove anohẽ haguã hetápe ivaívagui.

Ñandejára Jesucristo Ñe’ẽ.