LECTURAS: DOMINGO 3º DE CUARESMA

LECTURAS: DOMINGO 3º DE CUARESMA

PRIMERA LECTURA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha (versión breve) 20, 1-4. 7-8. 12-17

Upéma ramo Ñandejára he’i ko’ã mba’e: Che hína Tupã nde Jára roguenohẽ va’ekue Egíptogui, tembiguái rekógui. Ani rereko ambue Tupã che yke rehe.

Ani rejapo mba’eveichagua ta’ãnga, ta ha’e yvagapegua, ta ha’e yvy arigua, ta ha’e ypegua oikóva ra’ãnga.

Ani reiporu Tupã nde Jára réra rejapo haguã ivaíva, Cháke che hína Tupã ha ainupã pochy pe oiporu vaívape che réra. Ne mandu’a pytu’uha ára rehe remboarete haguã.

Ehayhu nde ru ha nde sýpe, ipuku haguã nde rekove upe yvýpe, che, Tupã nde Jára, ame’ẽtáva ndéve.

Ani reporojuka. Ani reiko tembireko ne mba’e’ỹva ndive. Ani remonda.

Ani remboja rei mba’eve nde rapicha rehe.
Ani reipota rei nde rapicha róga, hembireko, hembiguái kuimba’éva, hembiguái kuñáva,
hymba guéi, hymba vúrro térã mba’eve imba’éva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 18, 8-11

Opavave: Ñandejára ne ñe’ẽme oï tekove opave’ỹva.

Ñandejára rembiapoukapy ndaijojahai, ñane mbopy’a rory.
Ñandejára rembiapoukapy ijeroviaha, omoarandu oikuaa’ỹvape. O.

Ñandejára rembiapoukapy oĩ heko itépe, ñane mbovy’a.
Ñandejára rembiapoukapy hesakã, ñande resape’a. O.

Ñandejára ñe’ẽ naimeguãi ha opa ára opyta.
Ñandejára rembiapoukapy ijeroviaha, opavave oĩ hekoitépe. O.

Iporã ite ve óro ojajaipávagui, he’ẽve eiretégui osyrýva káva raitýgui. O.

SEGUNDA LECTURA:
Ñahendúta Tupã Ñandejára Ñe’ẽ San Pablo ohai va’ekue Corinto guápe 1, 22-25

Che pehẽnguekuéra: Umi judío ohechase mba’e rechaukaha hechapyrãva, ha umi Greciagua oheka arandu. Ñande
katu ñaporo momarandu peteï Mesías kurusu rehe omano va’ekuépe.

Upéva ombopochy umi judíope, ha umi judio’ỹvape katu ojogua výro reípe. Umi Ñandejára ohenói va’ekuépe katu, judío térã Greciagua, ko Mesías ha’e Ñandejára pokatu ha Tupã arandu.

Pe Ñandejára rehegua ha’etéva výro rei, tuichaiteve mba’e hína opa yvypóra arandúgui. Ha pe Ñandejára rehegua ikangy vaicha, imbareteteve hína opa yvypóra mbaretégui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN Jn 3, 16

Ñandejára ohayhu etereígui opa yvypórape, ome’ẽ va’ekue Ta’ýra peteĩete, ani haguã omano umi hese ojeroviáva, oikove haguã uvei opa ára.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha 2, 13-25

Opavave: Romomba’e guasu ndéve, Ñandejára.

Hi’aguĩma Páskua arete, ha upévare Jesús oho Jerusalénpe. Tupaópe ojuhu umi opa mba’ére oñemúva. Oĩ ovendéva novíllo, ovecha ha pykasu hamba’e. Ojuhu avei upépe umi pláta okambiáva oguapy joáva hína imesakuérape. Ha Jesús ohechávo upéva, ipojái peteĩ tukumbóre ha omosẽmba chupekuéra tupaógui, hymbakuéra reheve.

Umi pláta okambiávagui katu, ojapetepa ipláta yvýre ha oitypa umi imesakuéra.

Umi pykasu ovendévape katu he’i: — Penohẽmba chéve ko’águi ko’ã mba’e. Che Ru rógagui anive pejapo merkádo.
Upépe idisípulokuéra imandu’a Ñandejára Ñe’ẽme he’iha: “Mborayhu arekóva nde rógare niko ikusugue che rejáta”.

Umi judío poguasukuéra oporandu chupe: — Mba’e milágro rejapóta rohecha haguã nde ikatuha reju rejapo ko’ã mba’e.

Jesús he’i chupekuéra: — Peitypa ko tupao, ha mbohapy árape amopu’ã jeýne.

Umi judío katu he’i chupe: — Kóva ko tupao niko 46 áñope oñemopu’ã vaekue, ha piko nde remopu’ã jeýta mbohapy árape.

Ha Jesús oñe’ẽvo tupaóre niko, hetére oñe’ẽ hína chupekuéra. Upévare, Jesús opu’ã jeývo omanóva apytégui, idisípulokuéra imandu’a upe Jesús he’i va’ekuére. Upépe oguerovia hikuái upe Ñandejára Ñe’ẽme he’íva ha upe Jesús he’i va’ekuére avei.

Jesús oĩ aja Jerusalénpe Páskua arete jave, heta oĩ ojeroviáva hese ohechágui umi milágro ha’e ojapóva.

Jesús katu ndogueroviapái chupe kuéra, oikuaágui mba’e-mba’épa oguereko hikuái hi’angapýpe. Noikotevẽi avave he’i chupe mba’eve avavére. Ijehegui voi oikuaapa yvypóra korasõme oĩva.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.