LECTURAS DEL MIÉRCOLES III DE CUARESMA

LECTURAS DEL MIÉRCOLES III DE CUARESMA

PRIMERA LECTURA

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha    4, 1. 5-9

Moisés he’i Israel ñemoñarépe: Pejapo ramo opa ko’ã tembiapoukapy che amoesakãva peẽme, peikovéta ha peñe momba’éta pe yvýre, Tupã Ñandejára pende ru ypykue jára ome’ẽtava peẽme.

Che pombo’e va’ekue opa hembiapoukapýre, Tupã che Jára he’i haguéicha chéve. Pene ñe’ẽ rendúke umívape peẽ ramo pe yvýpe peiketahápe ko’ágã, peñe momba’e haguã hese. Pejapo oĩ háicha ite, ikatu haguã umi tetã ambuegua ohecha pene akã guapyha.

Ha’ekuéra ohendúvo ko’ã tembiapoukapy he’íta hikuái pende rehe: “Iñakã porã ha iñarandu etépa ko’ã tetãgua!” Ha péicha ite hína: Máva piko pe tetã tuichaitéva, oguerekóva peteĩ Tupã hi’aguĩetéva ichugui  jareko háicha ñande Tupã Ñandejárape, ha’e ñane rendu haguã ñahenói vove ichupe ñaikotevẽ ramo hese, ha máva piko pe tetã tuicha ite, oguerekóva tembiapoukapy péicha ite peve hekojojáva ko’ãicha che ahechaukáva peẽme ko’ágã? Peñe  ñangarekóke! Peñeha’ã ani haguã pende resarái, peikove aja pukukue, ko pehecha va’ekuégui pende resa tee rupi.

Peheko mbo’e pende ra’y ha pene remineno kuérape.

Tupã Ñandejára Ñe’ẽ.

SALMO ÑEMBOHOVÁI 147, 12-13. 15-16. 19-20

Opavave: Jerusalén, erohory Tupã Ñandejárape

Jerusalén, erohory Tupä Ñandejárape, Sión emomba’e guasu Tupã Ñandejárape.

Ha’e omboty hatã ne rokẽnguéra

ha ohovasa nde ra’y ha nde rajy kuéra nde pype. O.

Ha’e ombou iñe’ẽ ko yvýpe ha upe he’íva pya’e oguahẽ.

Mandyjúicha ha’e ombou y rypy’a,

ha tanimbúicha omosarambi ysapy ratã. O.

Jacóbpe ha’e oikuaauka hembipota.

Israélpe ha’e ome’ẽ hembiapoukapy.

Ambue tetã ndive ha’e upéicha ndojapói,

ndoikuaaukái ichupe kuéra hembiapoukapy.  O.

VERSÍCULO ANTES DEL EVANGELIO   Jn 6, 63c. 68c

Ne ñe’ẽ Tupã Ñandejára oreko Espíritu ha Tekove: Nde ereko ñe’ẽ Tekove ijapyra’ÿva.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 5, 17-19

Upe ramo Jesús he’i hemimbo’ekuérape: Ani peimo’ã che aju hague amboyke haguã Moisés rembiapoukapy térã umi mba’e maranduhárakuéra oporombo’e va’ekue.

Che ndajúi amboykévo umíva, aju umíva ojehupa haguã hekoitépe. Añete ha’e peẽme, yvága ha yvy oĩ aja, mba’evete asy ndojepe’a mo’ãi Moisés rembiapoukapýgui, ojehupa peve umi mba’e ipype oĩva.

Upévare, upe omboykéva Tupã Ñandejára  rembiapoukapy ha ojapo’ỹva pe michĩvéva jepe, ha oporombo’éva péicha ojejapo haguã, upévata pe michĩvéva Tupã Ñandejára oporosãmbyhyhápe yvágape. Upe Tupã Ñandejára rembiapoukapy ojapo ha oporombo’éva katu, tuicháta Tupã Ñandejára oporosãmbyhývo yvágape.

Ñandejára Jesucristo Ñe’ẽ.