LECTURAS DEL SÁBADO 19 DE OCTUBRE

LECTURAS DEL SÁBADO 19 DE OCTUBRE

Primera Lectura:

Ñahendúta Tupã Ñandejára Ñe’ẽ San Pablo ohai va’ekue Roma guápe              4, 13. 16-18

Che pehẽnguekuéra:

Tupã Ñandejára niko ome’ẽ va’ekue  iñe’ẽ Abraham ha iñemoñare kuérape, ohupitytaha ko yvy tuichakue imba’erã. Ha upe ñe’ẽ me’ẽ, ndoiko mo’ãi tembiapoukapy ojejapo ramo añónte, teko joja osẽva jerovia rupi mante.

Upévare, upe ñe’ẽ Tupã Ñandejára ome’ẽ va’ekue  Abrahámpe iporã haguã mayma iñemoñarépe, ou va’erã jeroviágui. He’ise, upe ñe’ẽ me’ẽ ndaha’eiha umi tembiapoukapy ojapóvape guarãnte, umi oñemohatãva ijeroviápe guarã katu avei, Abrahámcha.

Upéicha rupi ha’e ñande ru, he’i háicha Tupã Ñandejára ñe’ẽ: “Ajapo va’ekue  nde hegui heta tetã túva.”

Upéva hína pe Tupã Ñandejára oguerovia va’ekue  Abraham, Tupã Ñandejára omoingove jeýva omano va’ekuépe, ha ojapóva umi mba’e oĩ’ỹva gueteri.

Ndaikatu véima jave oñeha’arõ mba’eve, Abraham oguerovia ha oha’arõ kuaa jevy. Ha upéicha oiko ichugui  “heta tetã túva”, Tupã Ñandejára he’i haguéicha ichupe. “Péichata hetakue ne ñemoñare.”

Tupã Ñandejára Ñe’ẽ.

SALMO ÑEMBOHOVÁI     104, 6-9. 42-43

R. Ñandejára imandu’a mante iñe’ẽ ome’ẽ va’ekuére.

Peẽ hembiguái kuéra Abraham ñemoñaréva,

peë  hembiporavo Jacob ra’ykuérava,

Tupã niko Ñandejára hína,

ha’e oisãmbyhy ko yvy tuichakue. R.

Ha’e imandu’a mante iñe’ẽ ome’ẽ va’ekuére.

Iñe’ẽ ome’ẽ va’ekuére opa árape guarã.

Ha’ete voi ome’ẽ va’ekue  iñe’ẽ Abrahámpe,

héra tee rehe ome’ẽ va’ekue  iñe’ẽ Isaácpe. R.

Imandu’a iñe’ẽ marangatúre ome’ẽ

va’ekue  hembiguái Abrahámpe.

Oguenohẽ hetãme vy’a pópe, ha hembiporavokuéra

osapukái rory osẽvo. R.

ALELUIA Jn 15, 26cd. 27a

Aleluia.

Ñandejára Jesucristo he’i:

“Pe Espíritu Añeteguáva oñe’ëta che rehe,

ha peë avei peikóta che rérape pe ñe’ë haguä.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                         12, 8-12

Upe ramo Jesús he’i hemimbo’ekuérape:

“Ha’e peẽme, oimeraẽ he’íva opavave renondépe che rehe ojeroviaha, che, Tupã ra’y yvypóraicha aju va’ekue, añe’ẽne avei hese Tupã Ñandejára remimbou kuéra renondépe. Ha oimeraẽ he’íva opavave renondépe nda che kuaaiha, che avei ha’éne Tupã Ñandejára remimbou kuéra renondépe, ndaikuaaiha ichupe. Tupã Ñandejára oheja reíta oimeraẽvape che rehe jepe, yvypóraicha aju va’ekue, oñe’ẽ vaívape.

Upe Espíritu Santo rehe oñe’ẽ vaívape katu, ndojeheja rei mo’ãi araka’eve.”

“Pejererahávo umi judío tupaópe, térã mbojovakehára ha mburuvicha kuéra renondépe, ani pejepy’apy mba’éichapa peñe mo’ãtare térã mba’épa pejétare.

Oguahẽvo peẽme peñe’ẽ haguã, Espíritu Santo pene mbo’éta opa peje va’erãre.”

Ñandejára Jesucristo Ñe’ẽ.