LECTURAS DEL JUEVES 17 DE OCTUBRE
16 octubre, 2019LECTURAS DEL SÁBADO 19 DE OCTUBRE
20 octubre, 2019LECTURAS DEL VIERNES 18 DE OCTUBRE
Primera lectura:
Ñahendúta Tupã Ñandejára Ñe’ẽ San Pablo ohaiva’ekue Roma guápe 4, 1-8
Che pehẽnguekuéra:
Mba’épe osẽ porã hague piko ja’éta ñande ru ypykue Abraham. Añetehápe, Abraham ojeguereko rire hekojojáva ramo hembiapokueta rupi, hekópe oñembotuicha va’erã mo’ã, ndaha’éirõ jepe Tupã Ñandejára renondépe. Ñandejára ñe’ẽ he’i: “Abraham niko oguerovia va’ekue Tupã Ñandejárape, upévare Tupã Ñandejára oguereko va’ekue ichupe hekojojáva ramo.”
Oimérõ omba’apóva, ojehepyme’ẽ ichupe imba’apokuére, ndaha’éi jopói ramo. Ha pe ojapo’ỹva mba’eve ha oguerovia Tupã Ñandejárape, pe ombohekojojáva mba’e vai apohápe, ha upévape Tupã Ñandejára ohecha kuaa pe ijerovia, omoĩ porã haguã ichupe hendive. David voi ohechauka va’ekue mba’éichapa ovy’a, pe Tupã Ñandejára oguerekóva heko jojávarõ, oma’ẽ’ỹre mba’épa ojapo.
He’i avei David: “Ovy’a iténepa umi Tupã Ñandejára oheja reíva ichupe heko añangue, ha ombohasa reíva umi iñangaipa.
Ovy’a iténepa pe yvypóra Tupä Ñandejára oipysyrõva angaipágui.”
Tupã Ñandejára Ñe’ẽ.
SALMO ÑEMBOHOVÁI 31, 1-2. 5. 11
R. Tupä Ñandejára pokatu che mbo vy’a.
Ovy’a upe ojeheja reívape iñangaipa
ha umívagui oiko tesarái.
Ovy’a upe hova mokõi’ỹva,
Tupä Ñandejára oheja reívape hembiapo vaikue. R.
Amombe’u ndéve che angaipa.
Mba’evete namokañýi, che py’a
pýpe arekógui ndéve aikuaaukávo.
Umíva nde reheja rei chéve. R.
Pevy’a Tupä Ñandejára rehehápe
peẽ pende rekojojáva.
Umi imba’e porã ha imarangatúva
to purahéi vy’a pópe. R.
ALELUIA Sal 32, 22
Aleluia.
Tupä Ñandejára, ne mborayhu to guejy ore ári,
toiko upe ndéve roha’arö háicha.
Aleluia.
EVANGELIO
Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese? 12, 1-7
Upe árape, heta hetave yvypóra oñemboaty, ha heta itereígui ojejapipa ojuehe. Jesús iñepyrũrã oñe’ẽ hemimbo’e kuérape: “Peñe ñangarekóke umi fariséo rova mokõigui. Ndaipóri mba’eve okañýva ojehecha’ỹ va’erã ha oñemíva ojekuaa’ỹ va’erã. Upévare, opa mba’e peẽ pejéva pytũmbýpe, oñehendúne ára sakãme, ha umi pejéva ñemiháme ha koty ñembotypýpe ojesapukáine opa óga ári guive.”
“Peẽme, che irũ nguéra ha’e, ani pekyhyje umi pende reténte ojukávagui, ha upéi katu ndaikatu véima ojapo mba’eve. Che ha’éta peẽme mávaguipa pekyhyje va’erã: Pekyhyje oporojuka rire ipokatúva oporomondo haguã aña retãme. Upévagui pekyhyje va’erã.
“Noñeme’ẽi nga’u piko 5 guyra’imi mokõi viru pehẽngue míre? Upéicharõ jepe, Tupã Ñandejára ndahesaráiri ichugui kuéra. Pene akãrague peteĩ teĩ jepe niko ha’e oikuaapa. Aníke aipo ramo pekyhyje, peẽ niko mba’e guasu eteve hína heta guyra’ígui.”
Ñandejára Jesucristo Ñe’ẽ