LECTURAS DEL SÁBADO 3º TIEMPO ORDINARIO

LECTURAS DEL SÁBADO 3º TIEMPO ORDINARIO

Ko’ágã ñahendúta Tupã Ñandejára ñe’ẽ Samuel arandukápe oĩ háicha   12, 1-7a. 10-15a

Tupã Ñandejára omondo maranduhára Natánpe David rendápe. Natán oguahẽ hendápe ha he’i ichupe: Peteĩ távape oiko mokõi kuimba’e: peteĩ ipira pire heta ha ambue imboriahu.

Pe karai ipira pire hetáva oguereko heta ovecha ha vaka, pe mboriahu katu oguereko peteĩ ovecha ra’ýnte, ojogua va’ekue. Ha’e voi omongakuaa ha pe ovecha ra’y okakuaa hendive ha imitãnguéra ndive, okaru imesápe, hoy’u imbayrúgui ha oke ipohéi. Peteĩ jevy pe karai poguasu rógape oguahẽ peteĩ mbohupa; pe karai katu ndopokoséi ijovecha ha ivaka kuérare ha oipe’a pe mboriahúgui ijovecha ra’y omongaru haguã imbohupápe.

David ipochyeterei pe karai ndive ha he’i Natánpe: Tupã Ñandejára oikovéva rehe ha’e ndéve! Pe kuimba’e ojapo va’ekue upéicha hapicháre iporã ojejuka! Ha ohepyme’ëta irundy jevyve pe ovecha ra’y repykue ndoiporiahuverekói haguére hapichápe!

Upe marõ Natán he’i ichupe: Nde hína upéva! Ha péicha he’iuka ndéve Tupã Israel Jára: “Che roiporavo va’ekue Israel ruvicha guasúrõ ha roipe’a Saúl pógui.

Che apo’i haguére reipe’ávo Uríasgui hembireko reñemokuña haguã hese, ndojei mo’ãi nde rógagui araka’eve porojuka ha pochy vai. Péicha he’i Tupã Ñandejára: ‘Nde róga teégui amopu’ãta ivaíva nde rehe. Nde resa renondépe ame’ẽta ne kuñakuéra peteĩ nde róga guápe, ha ha’e oñenóta hendive kuéra ára resápe. Nde rejapo ivaíva ñemiháme, che katu ajapóta nde rehe opa Israelgua renondépe, ára sakãme.’”

David he’i Natánpe: Ajapo ivaíva Tupã Ñandejára renondépe.

Natán he’i ichupe: Tupã Ñandejára nane nupã mo’ãi ne angaipáre, ha ne remano mo’ãi. Nde ra’y heñói ramóva katu omanóta katu ete ivai eterei haguére ko ne rembiapo Tupä Ñandejára renondépe.

Natán oho rire hógape, Tupã Ñandejára ombohasy ete pe mitãme Urías rembirekore imemby va’ekue Davídgui. Upérõ David oñembo’e Tupã Ñandejárape pe mitãre, ndokaruvéi ha oñeno yvýpe pyhare. Umi mburuvicha oikóva hóga guasúpe ojerure ichupe opu’ã haguã yvýgui ha okaru haguã hendivekuéra, ha’e katu nopu’ãséi ha ndokaruséi avei.

Tupã Ñandejára Ñe’ẽ.

SALMO ÑEMBOHOVÁI 50, 12-17

Opavave: Tupã, che Jára, eme’ẽ chéve korasõ potĩ

Tupã che Jára, embopyahu che rekove

ha ta imarã’ỹ, che py’a to ñembopyahu ha ta imbarete,

anítei che mosẽ nerenondégui, térã reipe’a

che hegui nde pytu marangatu. O.

Embopyahu jevy chéve vy’a añandúva ajejopy vaihágui che renohévo, ha nde pu’aka marangatu ta che mombarete,

nde rape rehechaukáne iñangaipávape, ha heko vaíva ojevýne ne rendápe. O.

Tupã che Jára che nohẽ mano poguýgui purahéipe amoherakuãne nde reko jojaha.

Tupã che Jára, che juru eipe’a chéve ha ndéve rogueropurahéine. O.

ALELUIA  Jn  3, 16

Aleluia.

Tupã Ñandejára ñande rayhu etereígui ome’ẽ Ta’ýra peteĩmi; maymave Ichupe oroviáva oreko Tekove opa ára guarãva.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha   4, 35-41

Upe ramo ka’arúma upe árape, Jesús he’i hemimbo’e kuérape: Jahasa yguasu mboypýri. Ha omondo rire opavavépe, hemimbo’ekuéra ogueraha Jesúspe upe kanóa oĩháme.

Oĩ ave ambue kanóa kuéra omoirũva ichupe kuéra. Ha peichaháguinte oñepyrũ oipeju yvytu ne ratãva, ha pe y pochy ho’a pe kanóa ári ha omoenyhẽ ýgui. Jesús katu oke hína upe kanóa ruguáipe, peteĩ akãngyta ári.

Omombáy ha he’i ichupe hikuái: Mbo’ehára, nderehecha kuaái piko ja’yguyha?

Jesús opu’ã, oja’o pe yvytúpe ha he’i pe yguasúpe: Ekirirĩ! Epyta emyi’ỹre!

Ha opi pe yvytu ha oguapy pe y. Upéi Jesús he’i hemimbo’e kuérape: Mba’ére piko peñemondýi? Ne’ĩra gueteri piko pejerovia?

Hemimbo’e kuéra katu okyhyjeeterei ha oporandu joa ojupe: Máva piko kóva, yvytu ha yguasu jepe iñe’ẽ rendúva ichupe?

Ñandejára Jesucristo Ñe’ẽ