LECTURAS DEL SÁBADO III DE CUARESMA

LECTURAS DEL SÁBADO III DE CUARESMA

PRIMERA LECTURA

Ko’ágã ñahendúta Tupã Ñandejára ñe’ẽ Oseas arandukápe oĩ háicha   6, 1-6

Pejupáke jajevy Tupã Ñandejára rendápe: Ha’e ñane mopẽmba, ha ha’e ñane monguera jevýta.

Ha’e ñande kutu ha ha’e ñane pohano jevýta.

Peteĩ sapy’a itépe ñane mohesãi jevýta .

Ñane mopu’ãta jaiko haguã henondépe.

Ñañe ha’ãke jaikuaa haguã Tupä Ñandejárape.

Ha’e oúta ñane rendápe osẽ háicha kuarahy, ha ama omohe’õ háicha yvy, ára yvoty jave.

 Israel, mba’épa ajapóta nde hegui?

Judá, mba’épa ajapóta nde hegui?

Peẽ niko che rayhu tatatĩna ha ysapy ko’ẽicha, pya’e terei ogue jeýva.

Upévare, pomoangu’i va’ekue maranduhára juru rupi, che ñe’ẽme pojuka.

Che reko joja heñói tata rendýicha.

Che aipota pe che rayhu, ndaipotái mymbajuka.

Che aipota pe che kuaa ndaipotái mymbahapy.

Tupã Ñandejára Ñe’ẽ.

SALMO ÑEMBOHOVÁI        50, 3-4. 18-21ab

Opavave: Tupã, che poriahuvereko, nde niko ne mba’e porã.

Tupã, che poriahuvereko, nde niko ne mba’e porã.

Che poriahuvereko ha eipe’a che árigui che rembiapo vaikue.

Che johéi porã teko vaígui, che mopotĩ che angaipágui. O.

Nderehecha ramói mba’e kuave’ẽ.

Ndéve aikuave’ẽ ramo, naiporãi ndéve.

Taikuave’ẽna ndéve py’a rasy oñemomichĩva,

upéva katu rehecha ramoTupã Ñandejára. O.

Tupã, nde niko ne mba’e porã, ehechakuaa kena Siónpe.

Emopu’ã jevy Jerusalén tapiakuéra.

Rerohorýne mymba juka mba’e kuave’ẽ ha mymbahapy, oñemoguahẽva ndéve. O.

VERSÍCULO ANTES DEL EVANGELIO Cf.  Sal  94, 8a-7d

Ani pemohatã pene korasõ, pehendu uvei Tupã Ñandejára ñe’ẽ.

EVANGELIO

Ñahendúta Ñandejára Jesucristo rekove ha hemimbo’e San Lucas omombe’u háicha 18, 9-14

Upe ramo Jesús omombe’u ko ambue ñe’ẽ mbojoja, umi ojeroviávape ijehe oimo’ãgui heko joja, ha ojahéiva hapichakuérare. “Mokõi kuimba’e oho Tupaópe oñembo’évo. Peteĩva fariséo, pe ambue katu, umi viru omono’õva Rómape guarã rehegua.

Pe fariséo, oñembo’yhápe, oñembo’e péicha: “Háa! Tupã Ñandejára, ame’ẽ ndéve che aguyje , ndaha’éigui che umi ambuéicha, mondaha, heko añáva, omoakã ratĩva hembireko, ha pe viru omono’õ vaicha ave. Che ndakarúi mokõi ára aja peteĩ semánape, ha ame’ẽ ndéve guarã 10gui peteĩ opa ahupitývagui.’

Pe viru mono’õhára katu opyta mombyrymi, ha ndaipy’ái ojesa rupi haguã yvága gotyo. Ombota mbota uvei hína ipyti’a, ha he’i: ‘Háa! Tupã Ñandejára, che poriahuvereko mína. Che niko mba’e vai apoháva.’ Ha’e peẽme, pe viru mono’õhára ojevy hague hógape heko joja pyre, pe fariséo katu nahániri. Pe ijupe voi oñembotuicháva, oñemomichĩne ha pe oñemomichĩva, tuicháne.”

Ñandejára Jesucristo Ñe’ẽ.