LECTURAS: DOMINGO 4º DE CUARESMA

LECTURAS: DOMINGO 4º DE CUARESMA

LECTURA PETEÎHA:

Ko’ágã ñahendúta Tupã Ñandejára ñe’ẽ Crónica arandukápe oĩ háicha 36, 14-16. 19-23

Judagua ruvichakuéra, pa’i ha tetãguára, oñemboheko añave, ha oñeme’ẽ umi tetã ambuegua rembiapo ahẽme, omomarã pe tupao Ñandejára oiporavo va’ekue hogarã Jerusalénpe.  Ñandejára itúvakuéra ypykue Jára omondo tapiaite ichupekuéra iñe’ẽ hembiguáikuéra rupi, oiporiahuverekógui hetã guápe ha pe ha’e oikohápe.

Ha’ekuéra katu opuka umi Ñandejára rembiguái rehe, ndojapói mba’eve ramo imomarandu ha oñembohory imaranduhárakuéra rehe. Upéma ramo Ñandejára pochy rendy okapu hetãguare ha ndaipóri véima ojokóva ichupe.

Ha ou umi Caldeo kuéra ohapy pe tupao, oity yvy rehe táva Jerusalén korapy jere yvate, ohapy óga guasukuéra ha ohundi opa mba’e, oheja’ỹre mba’eve ikatúva ojeporu.

Nabucodonosor oguerahapa umi ojejuka’ỹ va’ekue, ha umívape ha’e ha ita’ýrakuéra oguereko hembiguái ramo, opu’ã meve hendaguépe tetã guasu Persia. Kóva ojehu oiko haguã Ñandejára he’i va’ekue maranduhára Jeremías rupi. Upéicha pe yvy opytu’u itapere aja pukukue, ohepyme’ẽmba peve umi pytu’uha ára opytu’u’ỹ hague rehe, oñemboty peve 70 áño.

Áño peteïha Ciro ojupi haguépe Persia ruvicha guasu ramo, ha ojehu haguãicha Ñandejára ñe’ẽ Jeremías omosarambi va’ekue, Ñandejára oñatõi Círope omoĩ haguã kuatiápe ha ohenduka haguã hetã tuichakue rehe kóicha: “Che Ciro, Persia ruvicha guasu kóicha ha’e: Ñandejára, Tupã yvága pegua omoĩmba che pópe opa tetãnguéra oĩva ko yvy ape rehe. Ha’e omoĩ che pópe amopu’ãvo ichupe tupao táva Jerusalénpe, opytáva Judá yvýpe. Aipo ramo opa peẽme, Ñandejára retãgua, tapeho upépe, ha ha’e ta penepytyvõ”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI    136, 1-6

Opavave: Ani mo’ãke che resarái nde hegui Jerusalén.

Babilonia ysyry rembe’y rupi roguapýva rojahe’o, Sión rehe ore mandu’ávo.

Sáuse rakã rehe ysyry rembe’y rupi opu’ãva, romosãingómiva ore mbaraka. O.

Upépe umi apytĩmby ore reraha va’ekue ojerure oréve ropurahéi haguã.

Umi ipy guýpe ore jopýva ojerure oréve rombovy’a haguã ichupekuéra, he’ívo:

“Pepurahéi oréve purahéi Sión rehegua”. O.

Mba’éicha piko aipo ropurahéita,

purahéi Ñandejárape guarãva tetã ambuépe?

Nde hegui che resarái ramo Jerusalén taikã che po. O.

Che kũ toja che apekũ rehe na che mandu’ái ramo nde rehe,

namoĩri ramo Jerusalén tenondete opa umi mba’e che mbovy’ávagui. O.

LECTURA MOKÔIHA:

Ñahendúta Tupã Ñandejára Ñe’ẽ San Pablo ohai va’ekue va’ekue Éfeso guápe     2, 4-10

Che pehẽnguekuéra:

Ñandejára tuicha ñande poriahuverekógui ha tuicha ñande rayhúgui, jaikove ramo jepe ku omanóva ramo guáicha ñane rembiapo vai hague rehe, ñane moingove jevy Cristo ndive.

Ñandejára imba’e porãgui peñepysyrõ. Ha Cristo ndive voi ñane moingove jevy, ha ñane mboguapy hendive yvágape. Péicha ojapo ohechauka haguã umi ára oútavape mba’eichaitépa ñande rayhu ha mba’eichaitépa imba’e porã ñane ndive Cristo Jesús rupi.

Ñandejára imba’e porãgui ha peë pejeroviágui hese, peñepysyrõ. Kóva ndaha’éi  pende jehegui ikatúva pejapo, Tupã ome’ẽ rei peẽme.  Ñandejára niko pe ñande apóva, ha ñane mbojoajúvo Cristo ndive ñande apo ypy va’ekue jajapo haguã umi mba’e iporãva ha’e omoĩma va’ekue voi ñandéve.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN  Jn 3, 16

Ñandejára ohayhuetereígui opa yvypórape, ome’ẽ va’ekue Ta’ýra peteï ete, ani haguã omano umi hese ojeroviáva, oikove haguã uvei opa ára.

EVANGELIO

Marandu porã Ñandejára Jesucrísto rekove ha hemimbo’e San Juan omombe’u háicha    3, 14-21

Opavave: Romomba’e guasu ndéve, Ñandejára.                             

Upérõ Jesús he’i Nicodémope:  Ku Moisés, pe desiértope omopu’ã haguéicha yvate pe mbói ra’ãnga, upéicha avei che añemopu’ã vaerã ágã.  Ha umi che rehe ojeroviáva, oikovéne opa ára.

 Ñandejára ohayhu etereígui opa yvypórape, ome’ẽ va’ekue ta’ýra peteĩete, ani haguã omano umi hese ojeroviáva, oikove haguã uvei opa ára.  Ñandejára niko nomboúi ta’ýra yvy ári ohundi haguã yvypórape. Ombou chupe, ha’e rupi yvypóra ojesalva haguã.

Pe ojeroviáva Ñandejára Ra’ýre noñehundi mo’ãi. Pe ojerovia’ỹva katu oñehundíma, ojerovia’ỹ haguére Ñandejára Ra’ýre.  Kóicha niko oñehundi umi ojerovia’ỹva: Che aju ko yvy ári ahesape haguã opavavépe ha yvypórakuéra hembiapo vaígui, oikoseve pytũmbýpe. Opa hembiapo vaíva niko ndoikoséi hesakãháme.

Pytũmbýpente oikose, ha noñemo’aguĩséi hesakãháme ani haguã ojehecha hembiapo vaikue. Umi oikóva Ñandejára oipotaháicha katu oñemo’aguĩ hesakãháme ojehecha haguã hesekuéra oikoha Ñandejára oipotaháicha.

Ñandejára Jesucrísto  Ñe’ẽ.

Opavave: Romomba’e guasu ndéve, Ñandejára Hesukrísto.