LECTURAS DEL SÁBADO IV DE CUARESMA

LECTURAS DEL SÁBADO IV DE CUARESMA

Ko’ágä   ñahendúta Tupã Ñandejára ñe’ẽ Jeremías arandukápe oĩ háicha                   11, 18-20

Tupä Ñandejára, Nde reikuaauka chéve, che rehe ija’e’ỹva ojaposeha ivaíva che rehe. Nde che resape’a ahechakuaa haguã. Che aime py’aguapýpe, ovecha ra’ýicha ajereraháva ajejuka haguã, aikuaa’ỹre ojaposeha ivaíva che rehe. He’i hikuái: “Jaity pe yvyra ko’ágã hovy’ỹva hína. Jahapo’o oikovéva apytégui, oikove’ỹ haguã mandu’a hese.”

Nde katu, che Jára nde pu’akapáva, mbojovakehára nde pojojáva, nde reikuaa yvypóra py’apy.

Ehechauka chéve mba’éichapa reinupãta ichupe kuéra, nde pópe niko amoĩ che rekove.

Tupã Ñandejára Ñe’ẽ.

SALMO ÑEMBOHOVÁI           7, 2-3. 9bc-12

R. Tupã che Jára, ne rendápe añemboja, nde guýpe añemo’ã.

Tupã che Jára, ne rendápe añemboja, nde guýpe añemo’ã.

Umi che rayhu’ỹva ha che jopy vaívagui che pe’a,

ani jaguaretéicha che jukase ha che rete omondyryry,

ndaipórigui jejopy vaígui che pe’áva. R.

Ehechakuaa chéve che Jára, nde niko nde reko joja.

Mba’eve ivaíva niko ndajapói. Tupã che Jára,

nde niko nde reko joja ha reikuaapa ore py’apýpe oĩva.

Topa iñañávagui hembiapo, hembiapo porävape eipytyvõ. R.

Tupã yvatetegua che pytyvö anítei ojehu chéve mba’eve.

Nde niko reipe’a heko potĩvape jejopy vaígui.

Tupã Ñandejára hína pe oporombojovakéva hendapete,

ha opa árape ikatúva ipochy. R.

VERSÍCULO ANTES DEL EVANGELIO      Lc 8, 15

Ovy’a ite umi oraháva Tupä Ñandejára ñe’ë

ikorasöme omoïre hekopete ha ohecha hembiapo repykue naikane’öigui.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?                                                       7, 40-53

Upe ramo upépe oĩva, ha ohendúvo umi mba’e Jesús he’íva, he’i: Kóva niko hína pe maranduhára.

Oĩ katu he’íva: Kóva ha’e pe Mesías.

Ha oĩve he’íva: Ndaha’éi. Pe Mesías niko ndaha’e mo’ãi Galileagua. Ñandejára ñe’ẽ niko he’i pe Mesías mburuvicha guasu David ñemoñare va’erãha ha ou va’erã táva Beléngui, David voi ou oikove ypy haguépe.

Ha péicha oĩ ojoavy ha oñoñe’ẽ apíva Jesús rehe. Oĩ umi omoakãsãséva ichupe, opáichavo avave ndopokói hese.

Umi ñorairõhára kuéra Tupao pegua oho jevy umi fariséo ha pa’i ruvicha kuéra rendápe. Ha’e kuéra oporandu umi ñorairõhárape: Mba’ére piko ndapeguerúi?

Umi ñorairõhára he’i: Ndaipóri niko avave oñe’ẽva ko kuimba’e oñe’ẽ háicha.

Umi fariséo he’i ichupe kuéra: Peẽme piko pene mbotavy avei? Oĩ nga’u piko peteĩnte jepe moakãhára  kuéra, térã Fariséova ogueroviáva ichupe? Umi tekove tavy, oikuaa’ỹvape Moisés rembiapoukapy, umívape Tupã Ñandejára ohundíta.

Nicodemo, ku peteĩ jevy oho va’ekue Jesús rendápe, he’i hapicha fariséo kuérape: Ndaikatúi ja’e mba’eve avavére ñahendu mboyve mba’épa oguereko he’i va’erã ijehe ha jaikuaa porã mboyve pe ojapo va’ekue. Ñande léi péicha he’i.

He’i ichupe hapicha fariséo: Nde piko Galileagua mba’e avei? Ehecha mba’épa he’i Tupä Ñandejára ñe’ẽ ha rejuhúta mba’eveichagua maranduhára nosẽiha Galiléagui. Upéi, opavave oho hógapekuéra.

Ñandejára Jesucristo Ñe’ẽ.