LECTURAS DOMINGO 2º TIEMPO DURANTE EL AÑO

LECTURAS DOMINGO 2º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 62-1-5

Nde rayhupápe, Sión, nakirirĩ mo’ãi, nde rayhupápe, Jerusalén, nda pytu’u mo’ãi, osẽ meve kuarahýicha heko joja ha hendy peve tatáicha iñesẽ jejopy vaígui. Nde reko joja ohechata tetãnguéra ha nde reko mimbi mburuvicha guasu maymáva.

Nde katu rejekuaáta peteĩ téra pyahúpe, Tupã voi omoĩva nde rehe. Ndéta Tupã nde Jára pópe, mburuvicha guasu akã rehegua jeguaka porãicha, mba’e vera isyva rehe guarãva.

Ndoje’e mo’ã véima nde rehe, “Ojeheja rei va’ekue” ha nde yvy rehe, “oñemoperõ va’ekue”. Reñembo hérata uvei “Che rembiayhu”, nde yvy katu “Che rembireko”.

Ndétagui Tupã rembiayhu, ha nde yvy hembireko. Peteĩ mitãrusu hembiayhúre omenda háicha, upe nde apo jevýva omendáta nde rehe. Ha hembireko ndive iména ovy’a háicha Tupã ovy’áta ne ndive.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 95, 1-3- 7-10a.c.
Opavave: Pemoerakuã Ñandejára rembiapokue ijojaha’ỹva opa rupiete.

Pepurahéi Ñandejárape purahéi pyahu.
Topurahéi Ñandejárape opa ko yvy.
Pepurahéi Tupã Ñandejárape, héra pemomba’e. O.

Opa ára pemo herakuã ha’e oporo guenohẽha jejopy vaígui.
Pemombe’u opa tetã rupi ha maymávape, ha’e tuichaha,
ha umi mba’e hechapyrãva ha’e ojapóva. O.

Pemo mba’e guasu Ñandejárape opa tetãnguéra,
pemo mba’e guasu Ñandejárape
ha’e ipokatu ha omimbipágui,
pemo mba’e guasu Ñandejárape héra tuichagui. O.

Itupao róga guýpe pemo guahẽ kuave’ẽmby.
Pemo mba’e guasu Ñandejárape
ojehechaukáva heko marangatúpe.
Opa yvypóra henondépe toryrýi. O.

To je’e opa tetã rupi: “Ñandejára ñande ruvicha guasu hína”.
Ha’e oisãmbyhy teko jojápe tetãnguéra. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 12, 4-11

Che pehenguekuéra: Ñandejára reroviahakuéra apytépe heta oĩ Espíritu Santo ome’ẽ hague opaichagua mba’e kuaa. Ha umi mba’e umíva me’ẽha, peteĩ Espíritu añónte. Hetaichagua ijapopyrã oĩ, ha umi tembiapo umíva, peteĩ Tupã añónte ome’ẽ ojejapo haguã.

Pe pokatu niko ojechauka opáicha, ha upéicha ramo jepe, peteĩ Ñandejárante pe ipokatu rupi, ojapóva opa mba’e opavavépe guarã. Espíritu Santo ojekuaauka peteĩ teĩ rupi, opavavépe iporã haguãicha. Espíritu rupi oime oñeme’ẽha oñe’ẽ haguã arandúpe, ha oime oñeme’ẽha, Espíritu Santo rupi avei, oñe’ẽ haguã tuicha mba’e kuaa reheve.

Oime ohupytýva ijerovia espíritu Santo rupi, ha oime oñeme’ẽha mba’e kuaa omonguera haguã hasýva. Oime ohupytýva pokatu ojapo haguã mba’e hechapyrãva, ha oime umi oikuaáva pe tenonderãvévo ojehútava.

Oime umi Ñandejára ombokatupyrýva ohecha kuaa haguã espíritu japúgui oúva, ha Espíritu añeteguágui oúva. Oime ombokatupyrýva oiporu kuaa haguã ñe’ẽ ojekua’ỹva, ha oime avei ome’ẽha katupyry omyesakã haguã umi ñe’ẽ umíva. Ha opa ko’ã mba’e ojapo ipokatúpe pe Espíritu peteĩnteva, ome’ẽvo peteï teĩ yvypórape, ha’e ohecha haichaite.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. 2Tes 2, 14
Aleluia.
Upevarã pene renói va’ekue Ñandejára, marandu porã ore romyerakuãva rupi, peike haguã
avei peẽ Ñandejára Jesucristo reko mimbipápe.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha 2, 1-11

Opavave: Romomba’e guasu ndéve, Ñandejára.

Upe ramo, mbohapy ára rire niko oiko peteĩ ñemenda Caná puéblope, opytáva Galiléape. Jesús sy oĩ ra’e hína upépe. Jesús ha idisípulokuérape avei oñekonvida oho haguã. Upéi katu opa sapy’a víno. Upépe Jesús sy oñemboja hendápe ha he’i chupe: —Opa niko chuguikuéra ivíno.

Jesús he’i chupe: — Che sy, mba’éreiko chéve eju ere péicha. Ne’ĩra gueteri niko oguãhẽ pe ára aikuaaukávo opavavépe mávapa che.
Isy katu he’i umi tembiguáipe: — Pejapo he’íva peẽme.

Oĩ hína upépe 6 kambuchi y ryru, judío kuéra oiporúva oñemopotĩ haguã hamba’e. Umi kambuchípe ija amo 100 lítrokuéra rupi. Jesús he’i umi tembiguáipe: —Pemyenyhẽ ýgui umi kambuchi.

Ha hembére omyenyhẽ hikuái. Upéi katu Jesús he’i chupekuéra: — Penohẽ michĩmi ha peraha petanteauka pende kapatápe. Ha péicha ojapo hikuái. Pe kapata otantea pe víno ýgui oiko vaekue, oikuaa’ỹre ha’e moõguipa osẽ. Umi tembiguái katu niko oikuaa, ha’e kuéra voi oguenohẽ haguére pe kambuchígui.

Upéi, pe kapata ohenói pe omendávape, ha he’i chupe: — Opárupi niko víno iporãvéva raẽ oñeme’ẽ oje’u haguã. Oje’u heta rire ae oñeme’ẽ pe naiporãmbáiva. Nde katu niko reheja pe iporãvéva ko ipahávo.

Kóva va’ekue pe milágro tenondetegua Jesús ojapo va’ekue. Ha Canáme kóicha ohechauka ikatupyryha, ha idisípulokuéra ojerovia hese.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.