LECTURAS: SÁBADO 1° DURANTE EL AÑO

LECTURAS: SÁBADO 1° DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe   4, 12-16

Che pehẽngue kuéra: Ñandejára Ñe’ẽ niko oikove ha ipu’aka. Hãimbeve kyse puku hãimbe jováivagui, ha ojasuru ñande py’a ha ñande espíritu ipypukuve hápe, ñande py’apy okañyve hápe, ha oipyguara ñane remiandu ha ñande py’a pota. Ndaipóri okañýva Tupã Ñandejáragui, opa mba’e hesakã ichupe, ha ohechapa ñane rembiapo.

Jesús, Tupã Ra’y, hína ñande Pa’i Guasu oike va’ekue yvágape. Upévare akói ñane mbarete va’erã ñande jeroviápe. Jesús, ñande Pa’i Guasu, ikatu ñande poriahuvereko ñane kangyhápe, ha’e voi niko ojepy’a ra’ã va’ekue ñandéicha. Ha’e ndo guerekóinte mba’eveichagua angaipa. Ñañemboja, aipórõ, jerovia reheve Tupã Ñandejára ñande rayhu etéva guapyhápe, ha’e ñande poriahuvereko haguã ha ipy’a porãgui ha ñane pytyvõ haguã ñaikotevẽ jave.

Tupã Ñandejára Ñe’ẽ.

SALMO ÑEMBOHOVÁI     18, 8-10. 15

Opavave: Tupã Ñandejára, ne Ñe’ẽ ome’ẽ tekove añetete

Tupã Ñandejára rembiapoukapy ndaijojahái, ñane mbopy’a rory.

Tupã Ñandejára rembiapoukapy ijeroviaha, omoarandu oikuaa’ỹvape. O.

Tupã Ñandejára rembiapoukapy oĩ heko itépe, ombovy’a ñane korasõ.

Tupã Ñandejára rembiapoukapy hesakã, ñande resape’a. O.

Tupã Ñandejára ñe’ë naimeguãi ha ndahekoviái oikove opa ára guarä:

Tupã Ñandejára apoukapy añetéva hína opa ára itépe añete. O.

To guahẽ porã ite ne rendápe, Ñe’ẽ osẽva che jurúgui ha arekóva che py’a pýpe.

Che Jára che mo’ã ha che renohẽva jejopy vaígui. O.

ALELUIA Lc 4, 18

Aleluia.

Tupã Ñandejára che mbou va’ekue agueraha haguã Marandu Porã imboriahúvape, amoerakuävo oñemondohoha umi apytïmbýpe oikóva sã.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha   2, 13-17

Upe ramo Jesús oho jevy yguasu rembe’ýpe. Opavave oñemboja hese ha ha’e oporombo’e. Ohasávo, ohecha Alfeo ra’y Levípe, oguapyva hína viru oñemono’õ hápe Rómape guarã.

Jesús he’i ichupe: Eju che moirũ. Leví opu’ã ha oho hendive.

Jesús okaru hína Leví rógape, ha heta umi viru omono’õva Rómape guarã. Ha ambue herakuã vaíva oguapy avei mesápe Jesús ha hemimbo’ekuéra ndive. Heta niko umi oikóva hapykuéri.

Mbovymi Moisés rembiapoukapy mbo’eha Fariséova, ohechávo Jesús okaruha umíva ndive, oporandu hemimbo’e kuérape: Mba’éicha rupi piko pene mbo’ehára oguapy okaru viru Mboatyha ha iñangaipáva ndive?

Jesús ohendu upéva ha he’i ichupekuéra: Hesãiva noikotevẽi pohãnohárare, hasývante. Che ndajúi ahenóivo heko jojávape, hembiapo vaívapente.

Ñandejára Jesucristo Ñe’ẽ