LECTURAS: VIERNES 1° DURANTE EL AÑO

LECTURAS: VIERNES 1° DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe        4, 1-5. 11

Che pehẽngue kuéra: Jareko aja gueteri pe ñe’ẽ me’ẽ jaike haguã upe Tupã Ñandejára ome’ẽhápe pytu’u, ñañangareko va’erã ani oime oike’ỹva. Ñande niko ñahendu avei upe marandu porã, ha’ekuéra ohendu haguéicha. Ha ichupe kuéra mba’evépe naiporãi va’ekue ohendu, ndojoajúi rupi ijeroviápe umi iñe’ẽ rendu va’ekue ndive. Ñande jajerovia va’ekue katu jaike upe pytu’úpe, Tupã Ñandejára he’i hague:

“Upévare añe’ẽ me’ẽ che pochyhápe, ndoikéi chéne haguã pe pytu’u ame’ëháme.”

Upéicharõ jepe, Tupã Ñandejára ojapopáma va’ekue ojapo va’erã ko yvy ojapo ramo guare. Oime voi niko hína 7 araháre he’íva pe Tupä Ñandejára ñe’ẽ: “Tupã Ñandejára opytu’u opa hembiapógui 7 arahápe.”

Ha oje’e jevy pe Tupã Ñandejára kuatiápe: “Ndoikéi chéne hikuái che ame’ëháme pytu’u.”

Ñañeha’ã va’erã, aipórõ, jaike haguã upe Tupã Ñandejára  oporomo mbytu’u hápe, avave ani haguã ho’a umi oguerovia’ỹ va’ekue rapykuéri.

Tupã Ñandejára Ñe’ẽ.

SALMO ÑEMBOHOVÁI        (77, 3. 4bc. 6c-8)

Opavave: Romombe’úne, Tupã Ñandejára reko mimbipa

Umi mba’e rohendu ha roikuaáva, ha ore rukuéra ypykue omombe’u va’ekue

noromokañýi chéne ore ra’y kuéraguiumíva Tupã Ñandejára réra herakuã porã ha ipu’aka. O.

Upéicha oikuaa haguã umi oúva ha ombo’e jevy haguã ita’ýra kuérape.

Tupã Ñandejára rehe ojerovia haguã, ha ojapo haguã Tupã Ñandejára rembipota. O.

Ani haguã ojogua túva kuéra ypykuépe, tekove iñakã guapy’ỹva ha maymávare opu’ãva,

ipy’a mokõiva nomopeteïriva ha ojerovia’ỹva Tupã Ñandejára rehe. O.

ALELUIA Lc 7, 16

Aleluia.

Peteï maranduhára nde tuicháva osẽ kuri ñande apytégui

ha Tupã Ñandejára ou ohechávo hetãguápe.

Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Marcos omombe’u háicha 2, 1-12

Upe ramo Jesús oike jevy Cafarnaúmpe. Ojekuaávo ha’e oĩha hógape, hetaeterei umi oñemboatýva ha ndaijavéi upe okẽ renondépe, ha ha’e oñe’ẽ ichupekuéra.

Upérõ irundy kuimba’e ogueru peteĩ ijapávape. Ha ndaikatúigui oguahẽ Jesús rendápe hetágui umi upépe oĩva, ombokua hikuái pe óga ape ha’e oĩháme, ha upe rupi omboguejy hikuái pe hasývape, hupápe.

Jesús ohechávo mba’éicha itépa ha’e kuéra ojerovia hese, he’i pe hasývape: Che ra’y, ojeheja reíma ndéve ne angaipa.

Upépe, umi Moisés rembiapoukapy mbo’eha oguapyva hína upépe, he’i ipy’apýpe: “Mba’ére piko kóva péicha oñe’ẽ? Ojahéi niko Tupã Ñandejárare, ku hendaguépe oĩrõ guáicha. Tupã Ñandejára añónte niko ikatu oheja rei ñandéve ñane angaipa.”

Ha Jesús pya’e ohecha kuaa mba’épa he’i hína hikuái ipy’apýpe, ha oporandu ichupekuéra: Mba’érepa pejepy’a mongeta péicha? Mba’épa ndahasyive, ja’e ko ijapávape: “Ojeheja reíma ndéve ne angaipa”, térãpa “Epu’ã. Ehupi nde rupa ha eguata”?

Néi, ahechaukáta peẽme che, yvypóraicha aju va’ekue, ikatuha aipysyrõ oimeraẽvape ko yvy ári.

Ha upévo he’i pe ijapávape: Ndéve ha’e: ‘Epu’ã. Ehupi nde rupa ha tereho nde rógape.’

Upépe, pe ijapáva opu’ã, ohupi hupa ha osẽ upégui opavave renondépe. Upévare opavave ohecha ramo, ha omomba’e guasu Tupã Ñandejárape he’ívo: Péichagua mba’e ndajahecháiva araka’eve.

Ñandejára Jesucristo Ñe’ẽ