LECTURAS DOMINGO DECIMOSÉPTIMA SEMANA

LECTURAS DOMINGO DECIMOSÉPTIMA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiastés arandukápe oĩ háicha 1, 2; 2, 21-23

Vyrorei ha vyresa ite! Opa mba’e ko yvy arigua vyrorei. Oime niko omoĩ va’ekue arandu, mba’e kuaa ha heta mba’e ohasa va’ekue hembiapópe, oheja haguã jevýnte opa mba’e pe nomba’apói va’ekue peguarã. Ha upéva ha’e peteĩ vyrorei joja’ỹ nde tuicháva!

Amo ipahápe, mba’e piko yvypóra oguenohẽ pe hetaite omba’apógui ha hetaite ojepy’apýgui ko arapýpe? Oikove aja pukukue oiko asy, ipohýi ichupe hekove; pyhare jepe ndopytu’úi iñapytu’ũ. Ha upéva avei vyroreiete.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 89, 3-6. 12-14. 17
Opavave: Ñandejára, nde hína upe ore mo’ãva.

Nde upe yvypórape remondóva oiko haguã ichugui yvy ichupekuéra erévo:
“Ta peho jevy yvýpe pepa”. O.

Mil áño niko ndéve guarã ku petei ára ohasa va’ekuéicha,
opa jevýmava, térã ku pyhare mbykýicha, pya’e ohasáva. O.

Ku jake ramo guáicha sapy’aite reraha ichupekuéra, ku ñana heñói vaicha, ko’ẽ vove.
Pyhare heñói ha ipoty, ka’aru haviru ha ipiru. O.

Ehechauka oréve ore rekove mbykyha ikatu haguã ore akã guapy.
¡Ore Jára, eju ore rendápe!
Araka’e peve piko reñeha’arõukáta?
Ore poriahuverekóna. Ore niko ne rembiguái hína. O.

Ára ko’ẽ rehe ore myenyhẽ ne mborayhúgui
ikatu haguã ore py’a rory roikove aja pukukue.
Tupã Ñandejára imba’e porãva ta ñande rovasa ha ta ñane pytyvõ
ñasẽ porã haguã opa mba’épe. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ San Pablo ohai va’ekue Colosas guápe 3, 1-5. 9-11

Che pehenguekuéra: Peẽ niko peñemoingove jevy Cristo rupi, peheka umi mba’e yvága reheguáva, pe Cristo oguapyhápe Tupã ykere. Pejepy’a mongeta umi mba’e yvága peguare, ani yvýpe guáre.

Peẽ niko pemano va’ekue ha Tupã oguereko iñongatupy peẽme guarã peikove haguã Cristo ndive. Cristo voi niko pe pende rekove. Ágã ha’e oúvo, peẽ pejúta avei hendive pene renyhẽ mimbipa reheve.

Pejuka, aipo ramo, opa yvy rehegua oĩva pende pype: avave ani itie’ỹ, ha ani ojapo mba’eve iky’áva, ani oho imba’e andu rei ha hembipota vai rapykuéri, ha ani oñe mbotyryryka.

Ani pende japu ojupe, peipe’áma niko pende jehegui pende reko yma guare ha umi mba’e yma pejapo va’ekue, ha peikóta jeikove pyahúpe, pe kuimba’e pyahu rekovépe, oñe myatyrõva ohóvo ojogua haguã Ñandejára, ijapoharépe, peikuaa porã haguã ichupe.

Nde’ise véima mba’eve ndépa Greciagua térãpa judío, ndépa reñesirkunsida térãpa nahaníri, ndépa tetã mombyrygua, térã nde tavýpa, tembiguáipa térãpa nde rekosã’ỹ. Cristo ha’e opa mba’e ha oĩ opavavépe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 5, 3
Aleluia.
“Ovy’a va’erã umi ohecha kuaáva imboriahuha ipy’apýpe, ichupekuéra guarã hína ñesãmbyhy yvágagui oúva.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 12, 13-21
Opavave: Romomba’e guasu ndéve, Ñandejára.

Upérõ osẽ peteĩ karai aty guasu apytégui he’i Jesúspe: — Mbo’ehára, ikatu piko ere che ryke’ýpe ome’ẽ haguã chéve pe chéve otokáva upe ore ru oheja va’ekuégui.

Jesús he’i chupe: — Che irũ, mávaiko che moĩ karai juez ramo peẽ mokõi pa’ũme.

Upéi ojere he’i opavavépe: — Anietéke pende taryrýi. Mba’e pota rei ha mba’eta jerereko niko ndoguerúi vy’a.

Upéi katu oñemoĩ omombe’u chupekuéra ko káso: Oiko ndaje raka’e peteĩ karai heta mba’e oguerekóva. Ha heta oñemitỹ
haguéicha, heta ave omono’õ. Ha he’i ipy’apýpe, “Mba’éiko ajapóta. Moõiko añongatupáta ko’ã mba’e, ko ndarekóiva hendaguã”.

Upéi katu he’i, “Aikuaáma mba’épa ajapóta. Aitypáta umi arekóva ha hendaguépe amopu’ãta tuichavéva. Umívape ijapáne pe amono’õ vaekue”. Ágã upéi ha’éne che jupe, “Hetáma niko rembyaty ha reñongatu.

Umívare niko nde tuja peve reikovéta. Ikatúntema epytu’u, ekaru, emokõ, ha evy’a”. Ñandejára katu he’i chupe, “Nde výro. Ko pyharépe remanóta. Ha mávape opytapáta pe reñongatu va’ekue”.

Péichako ojehu umi oñongatupáva opa mba’e imba’erãiténte. He’i hikuái ijehe irríkoha. Ñandejára renondépe katu imboriahu.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.