LECTURAS LUNES DECIMOOCTAVA SEMANA

LECTURAS DOMINGO DECIMOOCTAVA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 28, 1-17

Upe áño pegua mes 5ha, he’ise áño irundyha oñepyrũ haguépe oisãmbyhy Judápe Sedequías, maranduhára Ananías, Azur ra’y Gabaongua oñe’ẽ Jeremíaspe tupaópe, pa’ikuéra ha opa tetãgua renondépe ha he’i ichupe: Tupã Israel Jára ipu’akapáva he’i: ‘Amopẽta Babilonia ruvicha guasu pokatu, ha mokõi áño haguépe aruka jevýta ko’ápe opa tupao rembiporu ogueraha va’ekue Babilóniape mburuvicha guasu Nabucodonosor. Ha ambou jevýta ko’ápe Judá ruvicha guasu Joaquim ra’y Jeconíaspe ha opa umi ojereraha va’ekue jepokuapy Judágui Babilóniape. Che amopẽta Babilonia ruvicha guasu pokatu. Che, opa mba’e Jára, upéicha ha’e.’

Maranduhára Jeremías he’i maranduhára Ananíaspe, pa’i kuéra ha opa tetãgua tupaópe oĩva renondépe: Hánga’u Tupã Ñandejára ojapo péicha! Hánga’u Tupã Ñandejára he’i oiko haguã upe ere va’ekue, ha ojegueru jevy tupao rembiporu ha ou jevy Babilóniagui opa umi ojererahava’ekue upépe!

Ehendúke ko ha’éva ndéve ha opa tetã guápe: Maranduhára kuéra yma guare, ñande jaikove ypy mboyve guare, ohenduka va’ekue ñorairõ, mba’e vai ha mba’asy asãi hetã tetãnguéra ha mburuvicha guasu ipokatúvape. Peteĩ maranduhára ohenduka ramo ñakã rapu’ã katu, ha’e he’íva oiko rire mante ikatu jaikuaa añetehápepa Tupä Ñandejára omondo ra’e ichupe.

Upérõ Ananías oipe’a Jeremías ajúragui upe júgo ha omopẽ, he’ikuévo opa tetãgua renondépe: Tupã Ñandejára he’i: ‘Péicha, mokõi áño haguépe, aipe’áta opa tetã ajúragui Babilonia ruvicha guasu Nabucodonosor pokatu ha amopẽta.’

Jeremías katu oho upégui. Mbovymi ára Ananías oipe’a rire Jeremías ajúragui upe yvyra ha omopẽ, Tupã Ñandejára oñe’ẽ Jeremíaspe ha he’i ichupe: “Tereho ha ere Hananíaspe, che opa mba’e Jára ha’eha: ‘Remopẽ peteĩ júgo yvyra, che katu ambosako’i ndéve guarã peteĩ júgo fiérrova’. Che, Tupã Israel Jára che pu’akapáva, ha’égui kóicha: ‘Amoĩma opa tetã nguéra ajúrare júgo fiérro oiko haguã Babilonia ruvicha guasu Nabucodonosor rembiguái ramo. Tymba ñarõnguéra jepe amoĩmbáma ipo guýpe.’”

Upérõ Jeremías he’i Ananíaspe: Ehendúke ko ha’éva Ananías! Tupã Ñandejára na ne mboúi kuri ndéve, ha nde rembotavy reína ko’ã tetã guápe. Upévare Tupã Ñandejára he’i: ‘Romondóta repa haguã ko yvy ári. Ko áñope remanóta, ne ñe’ẽ rupi remopu’ã haguére tetã guápe che rehe.’ Ha maranduhára Hananías omano upe áño pegua mes 7hápe.

Tupã Ñandejára Ñe’ẽ.

SALMO ÑEMBOHOVÁI 118, 29. 43. 79-80. 95. 102

Opavave: Tupã Ñandejára, che mbo’e umi ne rembiapoukapýre

Japúgui che momombyry,
ha ne rembiapoukapy eikuaauka chéve.
Ñe’ẽ añete ani reipe’a che jurúgui,
ne rembiapoukapy rehe niko ajeko. O.

To ñemboja che rendápe umi nde rehe ojeroviáva,
umi omomba’éva upe ne Ñe’ẽ.
Che ta japopa ite upe ne rembipota
ani haguã ndahechakuaavéi pe oikoóva. O.

Umi iñañáva omangea che rehe
che juka haguã, che katu aiko
ne rembiapoukapy he’iháicha.
Namboykéi upe ne ñe’ẽ, ndéko hína upe che mbo’éva. O.

ALELUIA Mt 4, 4

Aleluia.
Yvypóra noikovéiri mbuja añóre, Tupã Ñandejára jurúgui osẽva ñe’ẽre rehe uvei.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha14, 13-21

Upe ramo oikuaávo Jesús upe Juánpe ojehu va’ekue, ojupi peteĩ kanóape ha oho upégui peteĩ ha’eñoháme. Opavave oikuaávo upéva, osẽ umi oikohágui ha oho ha’e oĩháme yvy rupi. Oguejývo Jesús pe kanóagui, ha ohechávo hetaha umi ijatýva, oiporiahuvereko ichupe kuéra, ha omonguera umi hasýva ogueru va’ekue hikuái.

Pytũmarõ hína, hemimbo’e kuéra ou hendápe, ha he’i ichupe: Ka’aru etéma niko, ha ko’arupi ndaipóri avave oikóva. Emondómana opavavépe toho umi táva rupi, tojogua hembi’urã.

Jesús katu he’i ichupe kuéra: Natekotevẽi oho. Peẽ voi pemongaru ichupekuéra. Ha’ekuéra he’i ichupe: Roguereko niko 5 mbuja ha mokõi pira.

Jesús he’i ichupe kuéra: Peru chéve ko’ápe. Ha omboguapy opavavépe kapi’ipépe. Upéi katu ojapyhy ipópe umi 5 pan ha mokõi pira ha oma’ẽvo yvága gotyo ojerure Tupã Ñandejára ohovasa haguã.

Upéi oipehe’ã umi pan ha ome’ẽ hemimbo’ekuérape, ha ha’ekuéra ome’ẽ opavavépe. Opavave ho’u hyvatã meve. Ha umi hembývagui omono’õ hikuái 12 ajaka renyhẽ. Umi okarúva niko hína 5.000 kuimba’e rupi, ojepapa’ỹre kuña ha mitãnguéra.

Ñandejára Jesucristo Ñe’ẽ