LECTURAS DOMINGO VIGÉSIMA SÉPTIMA SEMANA

LECTURAS DOMINGO VIGÉSIMA SÉPTIMA SEMANA

Ko’ágã ñahendúta Tupã Ñandejára ñe’ẽ Reyes aranduka mokõiháme oĩ háicha 5, 10. 14-17

Upérõ Eliseo he’iuka Naamánpe hembijokuái rupi: “Tereho ejahu 7 jevy ysyry Jordánpe ha nde rete ipotĩta kuru vaígui”.
Naamán oho ha oñapymi 7 jevy ysyry Jordánpe, he’i haguéicha ichupe maranduhára, ha ho’o opyta ipotĩ asy mitã ro’óicha. Okuera pe lépragui.

Upéma ramo ha’e ha opa imoirũhara oho jevy Eliseo rendápe, ha oguahẽvo Naamán he’i ichupe: Ko’ágã aikuaa porã, opa tetãnguéra ko yvy arigua apytépe, Israélpe añoite oĩha Ñandejára. Upéva rehe ajerure ndéve rereko haguã ne mba’erã ko’ã jopói arúva ndéve.

Eliseo katu he’i ichupe: Che Jára, che recháva hína rehe ha’e ndéve, ndareko mo’ãiha che mba’erã. Ha Naamán he’ive ramo jepe ichupe, Eliseo ndoipotái.

Upéma ramo Naamán he’i ichupe: Upéicha ramo, tarahamína mokõi che mburika ári yvy Israel pegua; águive niko naikuave’ẽ mo’ã véima mymbahapy térã mymbajuka Tupãnguérape, opa mba’e Járape añoiténtema uvei.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 97, 1-4
Opavave: Ñandejára ohechauka ipokatu.

Pepurahéi Ñandejárape purahéi pyahu, mba’e hechapyrãva ojapógui ha’e.
Ipyapy mbarete ha imarangatúgui ipu’aka opa mba’e rehe. O.

Ñandejára ohechauka ipokatu, tetãnguérape ohechauka heko jojaha.
Imandu’a imborayhu ha nopyrũiha iñe’ẽ rehe tetã Israel ndive guarã. O.

Yvy jerekuévo ojehecha Ñandejára ipu’akaha opa mba’e rehe.
Tojererohory Ñandejára yvy jerekuévo, purahéi rory tosoro ha tojevy’a. O.

LECTURA MOKÕIHA:
Ko’ágã ñahendúta Tupã Ñandejára Ñe’ẽ San Pablo ohai va’ekue ikuatia mokõiháme Timotéope 2, 8-13

Che ra’y rohayhuetéva: Ne mandu’áke Jesucrísto rehe. Ha’e niko David ñemoñare hína, ha opu’ã jevy va’ekue omanóva apytégui. Péicha niko he’i pe marandu porã che amoherakuãva, ha upéva rupi heta ahasa asy ha ajerereko iñapytĩháme, che rembiapo vai ramo guáicha. Ñandejára Ñe’ẽ katu ndaikatúi oñeñapytĩ.

Upéva rehe, umi Ñandejára oiporavo va’ekue rehehápe aropu’aka opa mba’e, ikatu haguã Cristo Jesús rupi ha’ekuéra avei ojesalva, ha oikuaa pe jeikove opa’ỹva ha tuichaitéva.

Añetehápe niko oje’e: Ñamano ramo hendive hendive avei jaikovéta, jahasa asy kuaa ramo hendive ñaiméta opa mba’e ári, ja’e ramo nda jaikuaaiha ichupe ha’e avei nañande kuaa mo’ãi, nda jajeroviái ramo hese ha’e nda upéichai ñane ndive, ndaikatúigui ha’e voi he’i ijupe tove.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 1Tes 5, 18
Pende aguyje Ñandejárape opa mba’e rehe, upéva pe ha’e oipotáva pende hegui, peẽ Jesucristo reroviaha.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 17, 11-19
Opavave: Romomba’e guasu ndéve, Ñandejára.

Upe ramo, Jesús ohóvo Jerusalénpe, ohasa Samaria ha Galiléa ojoajuha rupi. Ha og̃uahẽvo peteĩ pueblo’ípe osẽ ohuvãitĩvo chupe 10 lepróso. Mombyrymi opyta hikuái Jesúsgui, ha osapukái chupe: — Jesús, mbo’ehára. Ore poriahuverekomína.

Ha ohechávo chupe kuéra, Jesús osẽ he’i: — Tapeho pejechauka pa’ípe.

Ha oguata jave ohóvo, okuera hikuái. Ha peteĩ, ohecha kuaávo okueraha, ojevy Jesús rendápe ha oguerohory oúvo Ñandejárape. Oho oñesũ Jesús renondépe omboja peve isyva yvýre, ha oagradese chupe. Samariagua nimbo ra’e ha’e.

Jesús osẽ he’i hemimbo’ekuérape:— Ndaha’éi nga’u piko ra’e 10 umi okuera va’ekue. Moõiko ohopa hikuái. Ha mba’eichakue piko ko mombyryguávante pe oguerohorýva Ñandejárape. Ha ojere he’i pe kuimba’épe:— Epu’ã tereho. Che rehe rejerovia haguére rekuera.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.