LECTURAS DOMINGO VIGÉSIMA SEXTA SEMANA

LECTURAS DOMINGO VIGÉSIMA SEXTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Amós arandukápe oĩ háicha 6, 1a. 4-7

Cháke! Umi Siónpe oikóvagui ojepy’apy’ỹ rehe, oñeno umi tupa ojeguapa ha hepyvévape, ho’u ovecha ha vaka ra’y ikyravéva, árpa púpe opurahéi Davídcha oiporúvo mba’epu, tuichaicha vino omboy’u, ha oiporu mba’e ryakuã iporãvéva.

Mba’evete voi peẽme José retã oñehundi ramo! Peẽ raẽvete pejereraháta tetã mombyrýpe, pende karu guasu ha vy’a saingo opáta hína!

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 145, 7-10
Opavave: Emomba’e guasu Ñandejárape che anga.

Ñandejára oñemoĩ ojejopy vaíva ykére,
ha omongaru iñembyahýivape.
Ñandejára opoi umi iñapytĩmby ojererekóvagui. O.

Ñandejára ohesape’a umi ohecha’ỹvape,
Ñandejára omopu’ã umi ikangývape,
Ñandejára ohayhu umi heko jojávape,
Ñandejára oñangareko umi mombyry guáre.O.

Ityre’ỹ ha iména manóvape ha’e oipytyvõ.
Heko vaíva rape katu ha’e ohundi.
Ñandejára niko mburuvicha guasu opa ára guarã.
Táva Sión! Ñandejára ne sãmbyhýta opa araite. O.

LECTURA MOKÕIHA:
Ko’ágã ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Timotéope 6, 11-16

Nde Timoteo, Ñandejára rembiguái. Eikove teko porãme, poriahuverekópe, Jesucrísto reroviápe, mborayhúpe, eropu’aka jeiko asy ha nde py’a porãke. Eñorairõ porã ne mba’e reroviáre. Ani reheja oho nde hegui pe jeikove opa’ỹva, upeva’erãma nerenói va’ekue Ñandejára, ha upéva rehe reme’ẽ vaekue ne ñe’ẽ heta renondépe.

Ko’ágã, Ñandejára opa mba’e omoingovéva renondépe, ha Jesucristo renondépe, ome’ẽ va’ekue avei iñe’ẽ ha omombe’u hendupyrãva Poncio Pilato renondépe, ha’e ndéve rejapo haguã ha’éva. Eikóke teko potĩ ojehecha vai’ỹ va’erãme, Ñandejára Jesucrísto ou peve heko mimbipápe.

Hi’árape porã Ñandejára ojapóta ko’ã mba’e. Ha’e añoite pe imarangatúva, mburuvicha guasukuéra ruvicha, ha opa mba’e Jára. Ha’e añoite pe omano’ỹva, oikovéva peteĩ mba’e rendýpe, avave ikatu’ỹhápe oñemboja. Ndaipóri yvypóra ohecha va’ekue ichupe ha ndaikatúi ohecha. Ha’e opa ára guarã heko marã’ỹ ha ipokatu. Amén.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 2Cor 8, 9

Ñandejára Jesucrísto, pende rayhupápe, mba’e rerekoha ramo jepe, oñemomboriahu, ikatu haguã oiko pende hegui mba’eta rerekoha imboriahukue rupi.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 16, 19-31

Opavave: Romomba’e guasu ndéve, Ñandejára.

Upérõ Jesús he’i umi fariséokuérape: “Oikómi vaekue ndaje raka’e peteĩ karai irríkova, oñemondéva ao hepy-hepyvévape. Ha ára ko’ẽre ojapómiva karu guasu neporã-porãva hógape. Hóga renondépe katu oñemoĩmiva peteĩ mboriahu chapĩ hérava Lázaro. Hete niko ikurupa ha umi jagua oúmiva oheréi umi ijaiha. Lázarope niko hi’ã ohupyty michĩmínte jepe umi tembi’u rembyre pe óga jára meságui
oñemombóva.

Peteĩ ko’ẽme Lázaro omano. Ha Ñandejára ángelkuéra ou ogueraha chupe yvágape ha omboguapy chupe Abraham ykére. Upéi, omano ave pe rríko ha ojereraha oñeñotỹ, ha oho ojejuhu Aña retãme. Ha ohasa asy hágui hína upépe, ojesaupi sapy’a ha mombyry ohecha Abrahámpe, ha Lázarope ave oguapýva hína ijykére.

Ha oñemoĩ osapukái: “Che ru Abraham, che poriahuverekóna. Emondomína Lázarope tomyakỹ ikuã apymínte jepe ha tou tombopiro’y chéve che kũ. Vaípe niko ajecha hína ko tatápe.” Abraham katu he’i chupe: “Che ra’y, na ne mandu’ái piko amo yvýpe reikovépe, hembypa hague ndéve opaite mba’e. Lázaro katu, ivaikuete ohupyty va’ekue. Ko’ágã, ha’e opytu’u ha ovy’a hína ko’ápe, ha nde katu ivaikuete reisu’u. Ha upéi ave, oĩ peteĩ yvykua pypuku ñane pa’ũme, ha avave ndaikatúi ohasa ko’águi upépe, térã upéguio ko’ápe.”

Upépe pe rríko osẽ he’i: “Abraham, emondóna upéicharõ Lázarope che rogayguakuéra rendápe. Ha te’i umi 5 che ryvýpe anivéma haguã ojapo ivaíva ani ágã ha’ekuéra ave ou ho’a ko’ápe ha oiko asy.” Abraham katu he’i chupe: “Umi nde ryvy nga’u piko ndoguerekói Ñandejára Ñe’ẽ.

Umíva niko ohecha va’erã hikuái ha ojapo upépe he’íva.” Pe rríko katu he’i: “Che ru Abraham, upéva niko na’iporãmbái. Peteĩ omano vaekue ohórõ hendápe kuéra, péicharõ oheja mba’éne hikuái heko vaikue.”

Abraham katu he’i chupe: “Nopenái ramo hikuái Moisés ha umi profétakuérare, piko openáta gua’u peteĩ omanóva oikove jevy ramo.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.