LECTURAS DOMINGO VIGÉSIMO

LECTURAS DOMINGO VIGÉSIMO

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 38, 3-6. 8-10

Upérõ proféta Jeremías he’i opavavépe: Tupä he’i: ‘Ko táva ho’áta Babilonia ruvicha guasu soldádo kuéra pópe. Ha’e oñemo mba’éta hese ha ndaipóri ojoko va’erã ichupe.’

Upe ramo mburuvichakuéra he’i Karai rréipe: Tekotevẽ jajuka pe kuimba’épe, iñe’ẽme niko omopy’a mirĩmba hína ñande soldádokuéra ha táva guápe opytáva gueteri ko puéblope. Ha’e ndohekái iporãva, ivaívante uvei ko táva guápe guarã.

Rréi Sedequías he’i ichupekuéra: Pejapo hese pejaposéva. Che ndaikatúi añemoĩ pende rehe.

Upéma ramo ipojái hikuái Jeremías rehe ha oity Malquías pósope, oĩva mburuvicha guasu róga korapýpe. Omosã ichupe hikuái ha omboguejy osãingohápe. Pe póso ndahi’ýi ha henyhẽ tujúgui. Jeremías ojasuru pe tuju kuápe.

Upe ramo Ebed Mélec osẽ mburuvicha guasu rógagui ha oho he’i Karai rréipe: Che ruvicha guasu, pe ojejapo va’ekue Jeremías rehe hína peteĩ mba’e nde vaipa jepéva. Oity hikuái ichupe pósope ha upépe omanóta ñembyahýigui, ndaiporivéigui távape hi’upyrã.

Pya’e Karai rréi he’i Ebed Melécpe to gueraha 30 kuimba’e oguenohẽ haguã Jeremíaspe upe pósogui omano mboyve.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 39, 2-4. 18
Opavave: Ñandejára pya’e eju che rendápe.

Ñandejára rehénte ajerovia.
Che rendápe oñemboja ha che rendu. O.

Omanóva oñe ñotỹhágui ha karugua pypukúgui che renohẽ.
Ita ári che moñembo’y aguata mbarete haguã. O.

Che jurúgui omoheñói purahéi pyahu, ha Ñandejárape amomba’e guasu.
Heta oĩne ohechávo ko’ã mba’e ojere ha ojeroviáne Ñandejára rehe. O.

Ñandejára, che niko tekove poriahu. Ani nde resarái che hegui.
Nde upe che renohẽva jejopy vaígui. Pya’e eju che rendápe. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ ojehai va’ekue Hebreoskuérape 12, 1-4

Che pehenguekuéra, oimégui hína ojerepa ñande rehe heta ñande rapicha ohechaukáma va’ekue ojeroviaha, ñamboykéma opa mba’e ñande jokóva ha ñande pekádo ñaneapytĩva, ha jaipykúi py’aguasúpe tape jarekóva ñane renonderã.

Ñama’ẽna Jesús rehe, ichugui ou ñandéve pe ñande jerovia, ha’e voi omopoñepyrü ha omohu’ã va’ekue hekopete. Ha’e oheja raka’e vy’a yvága pegua ogueropu’aka haguã kurusu, otĩ’ỹre upeichaite ou haguã omano. Ha ko’ágã oguapy hína Tupã ykére.

Aipo ramo, pejesareko Jesús rekovekue rehe, hetaite mba’e vai ohasa va’ekue umi tembiapo vai apohagui, ani haguã pene kane’õ ha pende py’a kangy. Peẽ niko ne’ĩra gueteri peñohẽ pende ruguy peñorairõhápe hembiapo vaíva ndive.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA
Che ovechakuéra niko oikuaa che ñe’ẽ ha ou che rapykuéri, ha che aikuaa ichupekuéra, he’i Tupã Ñandejára.

EVANGELIO

Marandu porã Ñandejára Jesucrísto rekove ha hemimbo’e San Lucas omombe’u háicha Lc.12, 49-53
Opavave: Romomba’e guasu ndéve, Ñandejára.

Upérõ Hesu he’i idisípulokuérape: “Tata amyendy haguã niko aju ko yvy ári. Ha nga’u ra’e hendýma katu hína. Che katu niko añemongarai va’erã ágã upe tatápe, ha upéva oguahẽ aja che angapyhy. Peẽ piko peimo’ã aju hague arúvo py’aguapy ko yvy ári. Ndaupéichai hína.

Aju arúvo joavy. Peteĩ ógape oikohápe cinco, mbohapy opu’ãne mokõire. Túva ha ta’ýra opu’ãne ojuehe. Sy ha imemby opu’ãne ojuehe. Ména sy opu’ãne imemby rembirekóre, ha ha’e opu’ãne iména sýre.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.