LECTURAS JUEVES 7º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ Santiago ohai va’ekue 5, 1-6

Pehendúke peẽ mba’e repy eta perekóva. Pene rasẽ ha pesapukáike, cháke ojehu vaíko hína peẽme. Pene mba’e repyeta itujupáta, pende ao ho’upáta yso. Pende óro ha pende pláta havẽmbáta, ha umíva pene moĩ vaíta ha pene rundíta tatápe guáicha.

Peiko pemboaty mba’e repyeta ko’ã ára pahápe guarã. Hembiapokue repy napeme’ẽi va’ekue kokuépe omba’apóvape, osapukái hína pejejuhu vai haguã, ha Tupã Ñandejára ipu’akapáva ohendúma ko’ã mba’apohára sapukái.

Ko yvy ári peiko karu guasu ha vy’ápe, ha pende kyra tymbáicha, ha oguahẽma hína jejuka ára. Pejukauka rei ete va’ekue hembiapo vai’ỹvape, ha’ekuéra oñemoĩ’ỹre pende rehe.

Tupã Ñandejára Ñe’ẽ.

SALMO ÑEMBOHOVÁI 48, 14-20

Opavave: Ovy’a va’erã umi ojapóva Tupã Ñandejára ñe’ẽ

Kóicha opa umi heta mba’e oguerekóva, ijehénte ojeroviáva.
Ko’ãva rapykuéri ñemano mante oiko,
ku ovecha rerekuáicha ichupekuéra
ogueraha, yvy guýpe oñotỹmba. O.

Oguejýta yvygýpe, hete ra’anga oguereíta
ha yvykua ypytü hogarä.
Ágã ko’ẽ vove katu imarangatúva ipu’akáne hesekuéra.
ha yvykua oha’arõne ichupekuéra hogarã. O.

Ani rejepy’apýtei rehecha ramo oĩha
oñembopláta hetáva, térã oñembohóga porãva.
Ágã omano vove umíva
opytapáne, ndoguerahái chéne hendive. O.

Oiko porã ramo jepe ko yvy ape ári,
ha opavave ombojuru he’ẽ ichupe
heta mba’e oguerekógui, ágãnte ohóne
itúvakuéra ypykue rendápe, kuarahy ndohechavéi chéne. O.

ALELUIA Cf. 1Tes 2, 13

Aleluia.
Pejapyhy Tupã Ñandejára Ñe’ẽ, ha ani yvypóra ñe’ẽicha, pejapyhy pe añetete háicha Tupã Ñandejára Ñe’ẽicha.
Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 9, 41-50

Upe ramo Jesús he’i hemimombo’ekuérape: Oimeraẽ ome’ẽva peẽme, ymínte jepe, che ndive peiko haguére, añetehápe ha’e peẽme ndo pyta mo’ãiha hekovia’ỹre ichupe.

Oimeraẽ oitýva angaipápe peteĩ mitãicha che rehe ojeroviávape, iporãve va’erã ojeitýrõ ichupe yguasúpe ita guasu ijajúri. Ha nde po nde reitýtarõ angaipápe, eikytĩ. Iporãve reikove ramo Tupã Ñandejára ndive nde po peteĩ reheve, ha ani nde po mokõive reheve rejeity aña retãme, pe tata ogue’ỹháme araka’eve, umi yso omano’ỹháme ha tata máramo ogue’ỹháme. Ha nde py nde reitýtarõ angaipápe, eikytĩ.

Iporãve reikérõ jeikovépe peteĩ nde py reheve ha ani mokõive nde py reheve rejeity aña retãme, umi yso omano’ỹháme ha tata máramo ogue’ỹháme. Ha nde resa nde reitýtarõ angaipápe, eipe’a. Iporãve reike nde resa peteĩ reheve Tupã Ñandejára oisãmbyhyhápe, ha ani mokõive nde resa reheve rejeity aña retãme, umi yso omano’ỹháme ha tata máramo ogue’ỹháme.

Opavave niko oñembojuky va’erã tatápe. “Juky niko iporã, ha nahe’ẽvéi ramo niko ndaikatu véima oñemohe’ẽ jevy, naiporã véima mba’everã. Perekóke juky pende pype ha peiko py’a guapýpe oñondive.”

Ñandejára Jesucristo Ñe’ẽ