LECTURAS VIERNES 7º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ Santiago ohai va’ekue 5, 9-12

Che pehẽngue kuéra, ani peñomoĩ vaítei ani haguã peñe mbojovake. Tupã Ñandejára oporombojovakeha ára niko hi’aguĩma hína.
Che pehẽngue kuéra, pene mandu’áke umi maranduhárare oñe’ẽ va’ekue Tupã Ñandejára rérape.

Ha’ekuéra heta mba’e ogueropu’aka va’ekue. Ñande jareko ovy’a itéva ramo umi ohasa asývape kirirĩháme. Pehendúma mba’éichapa Job ogueropu’aka va’ekue hembiasa, ha peikuaa mba’éichapa Tupä Ñandejára omoengovia ichupe ipahápe. Tupä Ñandejára niko oporombyasy ha oporo poriahuvereko kuaa.

Opa ite mba’e ári, che pehẽngue kuéra, ani peme’ẽ pene ñe’ẽ yvága, térã yvýre, térã mba’evére. Pejérõ “Upéicha”, ta upéicha. Ha pejérõ “Ndaupéichai”, ta upéicha’ỹ, ani haguã Tupã Ñandejára pene mbojovake.

Tupã Ñandejára Ñe’ẽ.

SALMO ÑEMBOHOVÁI 102, 1-4. 8-12

Opavave: Tupã Ñandejára imba’e porã ha oporoporiahuvereko, ha oporohayhu.

Amomba’e guasu Tupã Ñandejárape che py’a ite guive,
che py’a ite guive amomba’e guasu héra marangatu.
Amomba’e guasu Tupã Ñandejárape
nda che resarái chéne heta mba’e porã ome’ẽ hague chéve. O.

Ha’e oheja rei chéve che rembiapo vaikue
ha che mongueráva opaichagua mba’asýgui.
Ha’e ndohejái apa yvy kuápe ha mborayhúpe che añuã ha che mokunu’ũ. O.

Tupã Ñandejára imba’e porã ha oporoporiahuvereko,
ndaipochy reíri ha oporohayhu.
Ha’e ndoporo mongavajúi mante ha ndaipochy aréi. O.

Yvága oĩ mombyry háicha yvýgui, upéichaite tuicha imborayhu umi hese ojeroviávare.
Kuarahy resẽ mombyry háicha kuarahy reikégui,
upéicha omomombyry ñande hegui ñane angaipa. O.

ALELUIA Cf. Jn 17, 17ba

Aleluia.
Ne ñe’ẽ Tupã Ñandejára hína añete, ore momarangatu pe añetépe.
Aleluia.

EVANGELIO

Marandu pora Ñandejára Jesucristo rekove ha hemimbo’e San Marcos omombe’u háicha 10, 1-12

Upe ramo Jesús oho Judea gotyo upe yvy Jordángui kuarahy resẽ gotyo guápe. Upépe ijaty jevy hese heta eterei ha oñepyrũ jevy ombo’e ichupekuéra jepi guáicha.

Oĩ fariséokuérava, oñembojáva Jesús rehe omoñuhã haguã ichupe, ha oporandu ichupe, peteĩ ménapa ikatu opoi hembirekógui. Ha’e he’i ichupekuéra: Mba’épa he’i raka’e peẽme Moisés?

Ha’ekuéra he’i: Moisés rembiapoukapýpe he’i peteĩ kuimba’e ikatuha opoi hembirekógui ome’ẽ guive ichupe kuatia jueja rehegua?

Upérõ Jesús he’i ichupekuéra: Pende py’a hatã guinte Moisés oheja va’ekue peẽme pepoi pene rembirekógui. Iñepyrũmbýpe katu Tupã Ñandejára ojapo va’ekue kuimba’e ha kuñáme. “Upévare pe kuimba’e oheja va’erã itúva ha isýpe, ojoaju haguã hembireko ndive, ha oiko mokõivégui peteĩ.”

Péicharõ, upe guive ha’ekuéra ndaha’e véima mokõi yvypóra, peteĩntema. Upévare yvypóra ndoipe’ái va’erã ojuehegui umi Tupã Ñandejára ombojoaju va’ekue.

Oĩmarõ hikuái hógape, hemimbo’e kuéra oporandu jevy ichupe kóvare.

Jesús he’i ichupekuéra: Oimeraëva opoírõ hembirekógui ha omenda ambuére, omoakãratĩ hembirekópe. Peteĩ kuña opoírõ iménagui ha upéi omenda jevy, ha’e ave oporomoakãratĩ hína.

Ñandejára Jesucristo Ñe’ẽ