LECTURAS SÁBADO 7º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ Santiago ohai va’ekue 5, 13-20

Che pehẽnguekuéra: Oĩrõ pende apytépe ojepy’apýva, to ñembo’e. Oĩrõ ovy’áva, to guerohory Tupã Ñandejárape ipurahéipe. Oĩrõ hasýva to henói Jesucristo iglésia moakãhára pe oñembo’e haguã hese, ha omona haguã hese ñandyry Ñandejára Jesucristo rérape, ha pe ñembo’e ojejapóva jeroviápe, omongueráta upe hasývape, ha Tupã Ñandejára omopu’ãta ichupe, ha oimérõ iñangaipa ra’e, ojeheja reíta ichupe.

Upévare pemombe’u ojupe pene angaipa ha peñembo’e ojuehe pene resãi haguã. Imarangatúva ñembo’e osẽva ipy’a ite guive, ipokatu. Maranduhára Elías va’ekue yvypóra ñandeichagua, ha oñembo’e ramo guare ipy’a ite guive ani haguã oky, ndokyvéi mbohapy áño imédio pukukue. Ha upéi oñembo’e jevy rire, oky jevy ha kóga heñói jevy.

Che pehẽnguekuéra, oĩ ramo opíava añeteguágui, ha oime hapicha ombojevýva ichupe, peikuaáke pe ombojevýva angaipa ojapóvape hape vaígui, oipe’aha hekove manógui, ha upéva rupive oipysyrõha heta angaipa.

Tupã Ñandejára Ñe’ẽ.

SALMO ÑEMBOHOVÁI 140, 1-3. 8

Opavave: Tupã Ñandejára, to guahẽ ndéve che ñembo’e.

Tupä Ñandejára, ndéve añembo’e. Pya’e eju che pytyvõ.
Che rendu kena ndéve añembo’e ramo.
Insiénsoicha toguahẽ ndéve che ñembo’e. O.

Tupã Ñandejára, emoĩ che juru, che kũre oñangareko va’erã.
Mba’e kuave’ẽ ka’aru guáicha umi che po ndéve amopu’ãva.
Tupä Ñandejára, che niko nde rehénte ajesareko.
Nde rehe ajerovia. Ani che reja reítei. O.

ALELUIA Cf. Mt 11, 25
Aleluia.
Nde niko hovaspyre, ore Ru, Tupã yvy ha yvága Jára, hehechauka va’ekue mba’e guasu ete Sambyhy rehegua
umi imichïvévape.
Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha10, 13-16

Upe ramo ogueraha hikuái mitã nguéra Jesúspe opoko haguã hese kuéra. Umi hemimbo’ekuéra katu, ipochy umi mitãme oguerúva ndive.

Jesús ohechávo kóva ipochy ha he’i ichupekuéra: Peheja umi mitã tou che rendápe, ha ani pejoko. Umi ha’e kuéraicha guápe guarã niko hína ñesãmbyhy yvágagui oúva. Añetehápe ha’e peẽme, oimérõ Tupã Ñandejára sãmbyhy ogueroguahẽva ku mitãicha, oikéta pype. Ha ohupi ijyva ári mitã nguérape, ha ohovasa omoĩvo ipo hesekuéra.

Ñandejára Jesucristo Ñe’ẽ.