LECTURAS LUNES 8º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Pedro ohai va’ekue 1, 3-9

Jarohory Tupã ha Ñandejára Jesucristo Rúpe, iporiahuvereko tuicha ite rupi ñane moingove jevy va’ekue, Jesucristo jeikove jevy rupi. Péva ome’ẽ ñandéve ñeha’arõ kuaa ne mbaretéva, ha upéicha rupi pehupitýne pe mba’e Tupã Ñandejára oguerekóva peẽme guarã yvágape, ikatu’ỹva oñembyai, iky’a térã ipiru. Pejerovia haguére hese, Tupã Ñandejára pene mo’ã ipokatúpe, pene pysyrõ haguã, pe ha’e ombosako’íva ha oikuaaukátava hína ára paha oguahẽvo.

Upévare, peẽ pene renyhẽ vy’águi, tekotevẽ ramo jepe sapy’ami pehasa heta jepy’a ra’ã rupi. Pe Pende jerovia niko ha’ete ku óro, iporã haguã oñemboyku va’erã tatápe. Pe jerovia osẽ porãva heta ñeha’ãgui, iporãve jevy pe órogui, ikatúva oñembyai. Upévare, péicha oñeha’ã ramo pende jerovia oñemoneĩ, ojererohory ha oñemoerakuã va’erã, Jesucristo ou vove.

Peẽ pehayhu Jesucrístope, nda pehechái rire ramo jepe. Ha ko’ágä, peroviávo ichupe pehecha’ỹre, pe pende vy’a tuicha etereígui ndaikatúi pemoñe’ẽ. Péicha pehupity pehóvo pe pende jerovia ohekáva, pene ánga ñepysyrõ.

Tupã Ñandejára Ñe’ẽ.

SALMO ÑEMBOHOVÁI 110, 1-2. 5-6. 9. 10c

Opavave: Tupã Ñandejára ndahesarái araka’eve iñe’ẽ marangatúgui

O bien

Aleluia!

Che py’aite guive arohory Tupã Ñandejárape,
aty guasu ha hekojojáva atyhápe.
Tuicháko hína umi Tupã Ñandejára rembiapokue,
ha umi oguerojepy’a mongeta hese. O.

Ha’e omongaru umi hese ojeroviávape,
ha opa ára imandu’a iñe’ẽ ome’ẽ va’ekuére.
Hetã guápe ohechauka hembiapo imbareteha,
ome’ẽvo ichupe kuéra ambue tetã yvy. O.

Hetã guápe ha’e oguenohẽ jejopy vaígui,
ha ome’ẽ iñe’ẽ opa árape guarã.
Tupã Ñandejára niko imarangatu ha jakyhyjeha.
To ñemomba’e guasu Tupã Ñandejárape opa ára. O.

ALELUIA 2Cor 8, 9

Aleluia.
Ñandejára Jesucristo tuichaite ramo jepe, oñemomichï ñande rehehápe, ikatu haguáicha ñene mbotuicha oñemomichïvo.
Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 10, 17-27

Upe ramo Jesús osẽvo oho haguã, oñaniháme ou hendápe peteĩ kuimba’e, oñesũ henondépe ha oporandu ichupe: Mbo’ehára marangatu, mba’épa ajapo va’erã ahupity haguã pe jeikove opave’ỹva?

Jesús he’i ichupe: Mba’ére piko ere che rehe che marangatuha? Imarangatúva peteĩnte oĩ, ha upéva Tupã Ñandejára. Reikuaáma Tupã Ñandejára rembiapoukapy: ‘Ani reporojuka, ani reporomoakã ratĩ, ani remonda, ani eñe’ẽrei nde rapicháre, térã reporombotavy, emomba’e nde ru ha nde sýpe.’

Pe karia’y he’i ichupe: Opa umíva niko ajapóva voínte che mitã guive.

Jesús oma’ẽvo hese, ohayhu ha he’i ichupe: Peteĩ mba’e oĩ rejapo va’erã. Tereho eñemumba opa rerekóvare ha eme’ẽ mboriahúpe. Péicharõ rerekóta mba’eta yvágape. Upéi, eju che moirũ.

Pe karia’y upéva ohendúvo ojepy’apy ha tuicha ñembyasýpe oho, heta mba’e oguerekógui. Upérõ Jesús oma’ẽ ijerekuévo ha he’i hemimbo’e kuérape: Ajépa hasy ete umi imba’e retávape oike haguã Tupã Ñandejára sãmbyhýpe.

Hemimbo’e kuéra oñemondýi ko’ã mba’e ohendúvo, Jesús katu he’i jevy ichupe kuéra: Che irũ nguéra, hasyve peteĩ imba’e retávape oike haguã Tupã Ñandejára sãmbyhýpe, peteĩ kaméllo ohasa rangue ju resa rupi.

Ndahasyive va’erã kaméllo ohasa haguã ju resa rupi, peteĩ mba’eta rerekua oike haguã Tupã Ñandejára sãmbyhýpe.

Ohendúvo ichupe, ko’ýte omomba’ete ha oporandu joa ojupe: Máva piko aipórõ ikatúta oñepysyrõ?

Jesús oma’ẽ hese kuéra ha he’i: Yvypóra kuérape guarã upéva ndaikatúi. Tupã Ñandejárape guarã katu nahániri. Ichupe guarã ndaipóri mba’eve ikatu’ỹva.

Ñandejára Jesucristo Ñe’ẽ