LECTURAS MARTES 8º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Pedro ohai va’ekue 1, 10-16

Che pehẽnguekuéra: Umi maranduhára heta oñeha’ã ha ohesa’ỹijo va’ekue mba’épa he’ise pe ñepysyrõ. Ha he’i va’ekue hikuái, Tupã Ñandejára ipy’a porã rupi ome’ẽtaha peẽme. Cristo Espíritu oikuaaukáma va’ekue umi maranduhárape mba’eve ojehu mboyve, mba’éichapa Cristo ohasa asýta ha heko mimbipáta upe rire.

Ha’ekuéra oñeha’ã va’ekue oikuaa, araka’épa ha mba’éichatapa hína upe mba’e upéva, Espíritu ohechauka va’ekue ichupekuéra ipypekuéra voi. Ha Tupã Ñandejára oikuaauka peẽme, pe ha’e kuéra he’íva outaha nda ha’eiha ichupekuéra guarã, mba’e porã peẽme guarãha katu.

Péicha oikuaauka va’ekue peẽme umi omosarambi va’ekue pende apytépe marandu pyahu, Espíritu Santo yvágagui oñembou va’ekue rupi. Ko’ã mba’e ko’ãva, umi Tupã Ñandejára remimbou yvága pegua jepe ohechaséva. Upévare, peñe mbosako’íke ha pene akã porãke. Peha’arõ kuaa opáichavo, pe mba’e Tupã Ñandejára imba’e porã rupi ome’ẽtáva peẽme Jesucristo ou vove.

Ta’ýra iñe’ẽ rendúvaicha, ani peiko Tupã Ñandejárape peikuaa mboyve peiko haguéicha. Upéva rangue, peiko marangatu etépe. Tupã Ñandejára, pene renói va’ekue niko, imarangatu. Ha Tupã Ñandejára ñe’ẽ niko he’i: “Pene marangatúke, che niko che marangatu.”

Tupã Ñandejára Ñe’ẽ.

SALMO ÑEMBOHOVÁI 97, 1- 4

Opavave: Tupã Ñandejára ipyapy mbarete

Pepurahéi Tupã Ñandejárape purahéi pyahu, mba’e hechapyrãva ojapógui ha’e.
Ipyapy mbarete ha imarangatúgui ipu’aka opa mba’ére. O.

Tupã Ñandejára ohechauka ipokatu, tetãnguérape ohechauka heko jojaha.
Imandu’a imborayhu ha heko jeroviaháre tetã Israel ndive guarã. O.

Yvy jerekuévo ojehecha Tupã Ñandejára ipu’akaha opa mba’ére.
To jererohory Tupã Ñandejára yvy jerekuévo, purahéi rory to soro ha to jevy’a. O.

ALELUIA Cf. Mt 11, 25

Aleluia.
Nde niko hovaspyre, ore Ru, Tupã yvy ha yvága Jára, hehechauka va’ekue mba’e guasu ete Sambyhy rehegua
umi imichïvévape.
Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 10, 28-31

Upe ramo Pedro he’i Ñandejárape: Ore niko roheja opa mba’e ndéve romoirũ haguã.

Jesús he’i ichupekuéra: “Añetehápe ha’e peẽme, oimeraẽva oheja va’ekue che rehehápe hóga térã ityvýra, térã iteindýra, térã itúva, térã isy, térã hembireko, térã ita’ýra, térã ijyvy, pe ohejáva rendaguépe ohupytýta 100, ko yvy árima voi, taha’e óga, tyke’ýra, tyvýra, teindýra, tykéra, kypy’y, kyvy, sy, túva, ta’ýra, tajýra, mitã kuimba’e, mitãkuña ha yvy, jehasa asy reheve ramo jepe. Ha omano rire katu, jeikove opa’ỹva. Ha heta umi ko’ágã itenondéva, itapykuéta. Ha heta umi ko’ágã itapykuéva, itenondéta”.

Ñandejára Jesucristo Ñe’ẽ