LECTURAS LUNES VIGÉSIMA CUARTA SEMANA

LECTURAS LUNES VIGÉSIMA CUARTA SEMANA

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Corintos guápe 11, 17-26. 33

Che pehẽnguekuéra: Ahaívo peẽme ko’ã mba’e ndaikatúi poguerohorývo, ñaimo’ãnte vaicha umi pene ñemboaty ojapo vaiveha pende rehe, ojapo porã rangue. Tenondete voi, oje’e chéve peñemboaty ramo peiko vaipaha. Ha chéve ramo guarã ñaimo’ã vaicha upéichaha. Pejoayvypa va’erã ra’e, aikuaa haguã mba’épepa pene porã peteĩ teĩ.

Umi joavy oĩva pende apytépe, pe karu pejapo jave ndaha’e véima peromandu’ávo Ñandejára Jesucrístope. Upévare, pekarúta jave jepi, peteĩ teĩ oñemotenonde ohupi haguã ikarurã. Ha oime opytáva ñembyahýi reheve, oime oka’úva jepeve. Peẽ piko ndaperekói óga pekaru ha pemboy’u haguã? Mba’ére piko pembotapykue Ñandejára Iglésia, ha pemotĩ umi oguereko’ỹvape mba’eve? Mba’e piko peipota ha’e peẽme? Poguerohoryha? Ko’ã mba’e ko’ãvape nahániri!

Ñandejára che mbo’e va’ekue ko’ã mba’e che ambohasa hína peẽme. Upe pyhare Ñandejára Jesús oñemoñuhãtahápe voi, ohupi va’ekue ipópe mbuja, ha omomba’e guasu rire Tupã Ñandejárape, omboja’o ha he’i: “Kóva ha’e che rete, oñeme’ẽva pende rehehápe. Kóva pejapo, che rehe pene mandu’ahápe.”

Upéicha avei, ojekarupa rire, ohupi pe vino ryru ha he’i: “Ko vino ryru hína pe ñe’ẽme’ẽ pyahu oñemboajéva che ruguy rupi. Péicha pejapo va’erã jepi, che rehe pene mandu’ahápe.” Aipórõ, ou peve Ñandejára, peẽ peromandu’a imano, pe’u jave jepi ko mbuja, ha pey’u ko vino.
Aipórõ, che pehẽnguekuéra, peñe mboaty vove pekaru haguã, peñoha’arõ joa.

Tupã Ñandejára Ñe’ẽ.

SALMO ÑEMBOHOVÁI 39, 7-10. 17

Opavave: Ajépa imba’e porã ite Tupä Ñandejára

Rejerure rangue mymba juka ha mba’e kuave’ẽ,
térã mymba hapy tembiapo vai jeheja reirã,
hendaguépe reju che resape’a.
Upévare ha’e ndéve: “Nde pópe añemoĩ.” O.

Ne rembiapoukapýpe he’íma voi
umi mba’e che ajapo va’erã,
Tupã che Jára, nde reipotávante niko che aipota,
ne rembiapoukapy areko che ãnga ruguápe. O.

Tupä Ñandejára, nde reikuaa akirirĩ rangue,
opavavépe aikuaauka hague nde reko joja,
Umi ne momba’éva to vy’a, akóinte te’i umi nde rehe ojekóva:
“Ajépa imba’e porã ite Tupä Ñandejára”. O.

To vy’a ha to ñeñandu porã ne ndive
maymave nde rekáva,
ha opa ára tomoerakuä ha toipota nde pu’aka:
“Ajépa nde tuichaite Tupã Ñandejára”. O.

ALELUIA Jn 3, 16

Aleluia.
Tupã Ñandejára ohayhu etereígui yvypórakuérape ome’ë hesehápe Ta’ýra peteĩmi Jesucristo; mayma oroviáva ichupe oguereko Tekove ijapyra’ÿva.
Aleluia.

EVANGELIO

Ni siquiera en Israel encontré una fe semejante

Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese? 7, 1-10

Upe ramo Jesús oho Cafarnaúmpe. Upépe oiko peteĩ mburuvicha Romagua oguerekóva peteĩ hembiguái ohayhúva, hasýva ha oĩva omano haguãicha.

Upe mburuvicha, ohendúvo umi oje’e etáva Jesús rehe, omondo judíokuéra moakãhára kuérape, ojerurévo Jesúspe oho haguã oipohano upe hembiguáipe. Ha’ekuéra oho Jesús rendápe ha he’i ichupe: Iporã niko reipytyvõ pe mburuvichápe. Ha’e ohayhu ñane retã ha ha’ete voi omopu’ãuka va’ekue oréve pe tupao.

Jesús oho hendive kuéra, ha oĩ marõ hikuái pe hóga ypýpe, upe mburuvicha omondo iñirũ nguérape he’ívo ichupe: “Karai, máva piko che nde reike haguã che rógape?

Upévare, nda che py’ái voi kuri aha haguã rohekávo jepe. Eréntena che rembiguái okuera haguã. Che niko aĩ mburuvicha poguýpe, ha areko avei che po guypegua. Ha peteĩme ha’érõ oho haguã, upéva oho. Ambuépe ha’érõ ou haguã, upéva ou. Ha ha’érõ che rembiguáipe ojapo haguã ha’éva, ojapo.”

Jesús ohendúvo upéva tuicha oguerohory, ha oma’ẽvo umi hapykuéri ohóvare, he’i: Añetehápe ha’e peẽme, Israelgua apytépe jepe ndajuhúiva peteĩ ojeroviáva Tupã Ñandejárare ko kuimba’éicha. Ojevývo hikuái hógape, umi oñemondo va’ekue ojuhúma pe tembiguái okuera.

Tupã Ñandejára Ñe’ẽ.