LECTURAS DOMINGO VIGÉSIMA QUINTA SEMANA

LECTURAS DOMINGO VIGÉSIMA QUINTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Amós arandukápe oĩ háicha 8, 4-7

Pehendúke peë pejopýva mboriahu ndive ha pehundíva tetã guápe peẽ pejéva: “Araka’épa ohasáta jasy pyahu ñame’ẽ haguã upe trígo?
Araka’épa upe pytu’uha ára ohasáta hepy ñame’ẽ haguã upe avati jaiporúvo balánsa japu, ñambo hepyvéta, jajoguáta mboriahúpe toiko ichuguikuéra ñane rembiguái, toñeme’ẽ ñandéve sapatu repy rehe. Upe trígo vorakue jepe ñame’ẽta ichupekuéra”.

Jacob ojejapoitereígui, Tupã Ñandejára he’i kóicha: “Nda che resarái mo’ãi upe pejapo va’ekuégui”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 112, 1-2. 4-8

Opavave: Ñandejára toñemomba’e guasu, omopu’ãva imboriahúvape.

Ñandejára rehe ojeroviáva tomomba’e guasu ichupe, to guerohory héra.
Tupã réra to ñemomba’e guasu, ko’ágã ha opa ára. O.

Ñandejára oĩ tetãnguéra ári, imimbikue yvága rehe iñasãi.
Ñandejaraichagua ndaipóri, ha’e oiko amo yvate, ha ojayvy omaña haguã yvága ha yvy rehe. O.

Yvýgui ha’e omopu’ã imboriahúvape, ha oikotevẽvape pe oĩ vaivehagui.
Poguasukuéra apytépe ichupe omoĩ, hetãgua poguasu apytépe omohenda. O.

LECTURA MOKÕIHA:
Ko’ágã ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Timotéope 2, 1-8

Che ra’y rohayhuetéva: Tenondete ha’e oñeñembo’e va’erã, ojejerure asy va’erã opavave rehe ha oñeme’ẽ va’erã Ñandejárape aguyje opa yvypóra rehehápe. Oñeñembo’e va’erã umi tetã sãmbyhyhára rehe, mburuvichakuéra rehe, ikatu haguã jaiko py’a guapýpe ha ñorairõ’ỹre, jeporiahuverekópe ha ñemomba’épe.

Upéva iporã ha ombohory Ñandejára ñande salvávape. Ha’e niko oipota opavave ojesalva ha toikuaa pe añetegua. Tupã niko peteĩnte ha peteïnte avei pe omoĩ porãva yvypórakuéra Tupã ndive. Upéva hína Cristo Jesús, yvypórava avei. Ha’e niko omano ñande rehehápe opavave jajesalva haguã, ha mba’e rechaukaha ramo ome’ẽ va’ekue hi’árape porã.

Amombe’u haguã ko’ã mba’e ha’e che moĩ mba’e mombe’uha ha apóstol ramo. Ha oheja che pópe ambo’e haguã jerovia ha añetegua umi judio’ỹvape. Ko che ha’éva hína añete. Nda che japúi. Ha upéicha, aipota kuimba’ekuéra oñembo’e opa rupi ha ohupi ipo Ñandejárape py’a potĩme ha pochy’ỹ rehe, térã ñe’ẽmbojovai’ỹme.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 2Cor 8, 9
Peikuaáma niko Ñandejára Jesucristo, pende rayhupápe, mba’e rerekoha ramo jepe, oñemo mboriahu hague, ikatu haguã oiko pende hegui mba’eta rerekoha imboriahukue rupi.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 16, 1-13

Opavave: Romomba’e guasu ndéve, Ñandejára.

Jesús omombe’u kóva ko káso idisípulo kuérape: Oiko ndaje raka’e peteĩ karai heta mba’e oguerekóva. Ha oje’e chupe ikapata oiporu vaipaha oikóvo ipláta. Ohenói upémarõ ikapatápe ha he’i chupe, “Mba’éiko ko oje’éva nde rehe. Kuatiápe emoĩmbaitéta chéve mba’éichapa reiporu reikóvo ra’e che pláta. Ha upéva ipaha. Ne remba’apo véima ápe.”

Pe kapatá he’i ipy’apýpe, “Mba’éiko ajapóta añemosẽrõ. Na che mbarete véima niko aiko hag̃ua a’yvyjo’o hamba’e. Ha upéi ave, atĩta asẽ hag̃ua upe rupi ajerure ha’u va’erã. Aikuaáma mba’épa ajapóta areko haguã che moguahẽva hógape añemosẽ rire.” Ha ohenói peteĩ-teĩme umi pláta oiporu vaekue ipatróngui.

Pe tenonde ou va’ekuépe oporandu, “Mboýiko redeve che patrónpe”. Ha he’i chupe, “Adeve chupe 100 barril aséite de oliva”. Pe kapatá he’i chupe, “Na’ápe nde kuatia, ha pya’e porã emoĩ 50”. Upéva rapykueriguápe oporandu, “Ha nde piko mboy redevé”. Ha he’i chupe, “10 mil kílo trígo”. Pe kapatá he’i chupe, “Na’ápe nde kuatia, pya’e porã emoĩ 8 mil”.

Pe kapatá patron oikuaávo upéva, oguerohory chupe ijapu haguére osẽ porã hag̃ua. Ha upéicha niko ojapo umi omba’apóva umi mba’e yvy ári guare. Ha’ekuéra niko ikatupyryve umi Ñandejára rembipota apóvonte oikóvagui.

Upévare ha’e peẽme, peiporúke opa mba’e repy yvy arigua peñemoĩ porã hag̃ua heta ndive. Péicharõ ág̃a opa vove pendehegui pende pláta, Ñandejára pene mog̃uahẽne yvágape.

Upe michĩ ra’ymíre oñangareko kuaávape niko, hetave mba’e ikatu jaheja ipópe. Ha upe michĩ ra’ymíme ipokarẽvape, ko’yteve ipokarẽta heta mba’e oñemoĩ ramo ipópe. Ha pende pópe ndaikatúi ramo jaheja pláta ra’ymi, pokarẽme oñembyatýva, piko máva ohejáta pende pópe umi mba’e ovaléva. Ha pende rapicha mba’e ndapereko kuaáirõ piko, máva ome’ẽta peẽme pene mba’e teéva.

Patron niko ndajareko kuaái mokõi. Peteĩre na ñande’a’éi chéne ha jahayhuve pe ambuépe. Ha peteĩrente ñapenárõ, ñamboyke pe ambuépe. Ha upéicha avei, ndaikatúi ñambojerovia Ñandejárape ha pláta oñondive.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.