LECTURAS LUNES VIGÉSIMA QUINTA SEMANA

LECTURAS LUNES VIGÉSIMA QUINTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Proverbios arandukápe oĩ háicha   3, 27-34

Oikotevẽva oñembojárõ ne rendápe, ani rejere ichugui. Ikatu ramo, eipytyvõ ichupe.

Oĩ ramo nde pópe reporopytyvõ haguã ani erétei: “Ko’ẽrõ jahecháta ndéve”. Ani rejapo ivaíva nde róga ykére guáre, jeroviápe oikóva nde ypýpe. Ani reñorairõ rei avave ndive, ojapo’ỹrõ nde rehe ivaíva.

Ani reikose umi mbaretépe oiko vaicha, ani rejehe’a hese kuéra. Iñañávape Tupã Ñandejára ndohayhúi, imarangatúvape omokunu’ũ.

Heko añávare Tupã Ñandejára ojahéi, ha heko potĩva róga katu ohovasa. Oñembo tuichávagui mba’eve ndoikuaaséi,

imboriahúvape katu oipytyvõ.

Tupã Ñandejára Ñe’ẽ.

SALMO ÑEMBOHOVÁI 14, 2-4b. 5

Opavave: Tupã Ñandejára, mávapa oikéta nde rógape

Upe hembiapo porã ha hekojojáva, oikóva teko jojápe hapicha ndive

upe añete guánte he’íva ipy’a ite guive, upe oñe’ẽ vai’ÿva hapicháre. O.

Upe ojapo’ỹva ivaíva hapicháre, upe oiko vai’ỹva hapicha ndive,

upe oñe’ẽ vai’ỹva hapicháre, upe oiko vai’ỹva hapicha ndive. O.

Upe ndohecha ramóiva hembiapo vaívape, umi Tupãre ojeroviávape omomba’éva,

pe plátare oiporuka’ỹva mba’eve, térã plátare omoĩ vai’ỹva hapichápe.

Upe ojapóva ko’ã mba’e, ndo’ái chéne araka’eve. O.

ALELUIA Mt 5, 16

Aleluia.

Péicha ojajái va’erã yvypóra rovake mba’e rendy perekóva pende pype, ikatu haguãicha ohecha pene rembiapo porãha ha pemomba’e guasu pende Túva oĩva yvágape. 

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha  8, 16-18

Upe ramo Jesús he’i hemimbo’ekuérape: Avave nomoendýi peteĩ mba’e rendy ha upéi ojaho’i térã omoĩ tupa guýpe, ohupi uvei yvate ojehesape haguã umi oikéva. Upéichaite avei, ndaipóri mba’eve okañýva osẽ’ỹ va’erã okápe, ha mba’e ñemi ojekuaa’ỹ va’erã ha oñemoesakã’ỹ va’erã.

Aipórõ, pehendu porã: Upe oguerekóvape oñeme’ẽvéta oguerekove haguã. Upe oguereko’ỹvagui katu, pe michĩmi oimo’ãva oguerekoha jepe ojepe’áta, ha mba’evete ndopyta mo’ãi ichupe.

Ñandejára Jesucristo Ñe’ẽ.