LECTURAS: MARTES 2° DURANTE EL AÑO

LECTURAS: MARTES 2° DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe                  6, 10-20

Che pehẽngue kuéra: Tupã Ñandejára niko heko joja hína ha nda hesarái mo’ãi umi pejapo va’ekuégui ha mborayhu pehechauka va’ekue ichupe peipytyvõvo umi imba’évape, pejapo háicha gueteri peikóvo. Ha hi’ãnte peteĩ teĩ akói pehechauka pehóvo ipaha ite peve upe akã raku upéva, oikopa ite haguã opa peha’arõva.

Ndoroipotái peñemo ate’ỹ, ta peiko uvei oiko haguéicha umi ojerovia ha oha’arõ kuaa rupi ohupytýva pe Tupã Ñandejára he’i va’ekue ome’ẽtaha.

Tupã Ñandejára ome’ẽ ramo guare iñe’ẽ Abrahámpe, oñe’ẽ me’ẽ va’ekue ijehe voi, ndaipórigui ambue mba’e guasuvéva ichugui . Ha he’i: “He’i, che heta rohovasáne ha ambohetáne ne ñemoñare.”

Abraham oha’arõ kuaa va’ekue ha ohupity pe Tupã Ñandejára oñe’ẽ me’ẽ hague ichupe. Yvypóra oñe’ẽ me’ẽrõ, ome’ẽ iñe’ẽ peteĩ ichugui  mba’e guasuvévare. Ha oimérõ oñe’ẽ me’ẽva, ndaipóri véima ja’e va’erã. Ha néi, Tupã Ñandejára ohechaukase va’ekue umi ohupitývape upe ha’e he’i va’ekue ome’ẽtaha, pe he’i haguéicha ojapotaha, ha nopyrũ mo’ãiha iñe’ẽ me’ẽ nguére. Upévare, omombarete upe mba’e oikuave’ẽ va’ekue iñe’ẽ me’ẽme.

Mokõi mba’e oĩ ikatu’ỹva oñemoambue ha Tupã Ñandejára ijapu kuaa’ỹha: mba’e kuave’ẽ ha Ñe’ẽ me’ẽ. Ko’ãva ñane mokyre’ỹ mbarete ñande jaikóvape jaheka Tupã Ñandejára pytyvõ ha jajerovia va’ekue pe mba’e ñaha’arõva rehe ha’e voi ome’ẽ va’ekue ñandéve.

Upe mba’e ñaha’arõva niko imbarete, ku ty’ãi guasu yga joko háicha. Pe mba’e ñaha’arõva ohasáma yvága rokẽ mboypýri. Upépe Jesús oike ojapo haguã tape ñandéve guarã, Pa’i Guasu ramo, Melquisedec chagua.

Ñandejára Jesucristo Ñe’ẽ

SALMO ÑEMBOHOVÁI     110, 1-2. 4-5. 9. 10c

R. Tupã Ñandejára ndahesarairi iñe’ẽ marangatúgui

Che py’a ite guive arohory Tupä Ñandejárape, aty guasu ha heko jojáva atyhápe.

Tuicháko hína umi Tupä Ñandejára rembiapokue, ha umi oguerojepy’a mongeta hese. R.

Mba’e hechapyrãva ojapo ha umívagui ndoikói tesarái.

Tupä Ñandejára ipy’a porã ha oporohecha kuaa.

Ha’e omongaru umi hese ojeroviávape, ha opa ára imandu’a iñe’ẽ ome’ẽ va’ekuére. R.

Hetã guápe ha’e oguenohẽ jejopy vaígui, ha ome’ẽ iñe’ẽ opa árape guarã.

Héra imarangatu ha oñemomba’e Tupä Ñandejára niko imarangatu ha jakyhyjeha.  R.

 Ñamomba’érõ Tupä Ñandejárape ñane arandu, iñakã porã umi upéicha oikóva.

Hetäguápe oipytyvö hese ojeroviáva.

To ñemomba’e guasu Tupã Ñandejárape opa ára. R.

ALELUIA Cf. Ef  1, 17-18

Aleluia.

Ñandejára Jesucristo Túva to moesakä ñane korasö,

ikatu haguáicha ñamomba’e ha’arömby ipype ñañe renói va’ekuépe.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                            2, 23-28

Upe ramo Jesús ohasa ohóvo kokue rupi peteĩ pytu’uha árape, hemimbo’e kuéra oñepyrũ oipo’o trígo ha ho’u. Umi fariséo he’i ichupe: Ema’ẽmi, neremimbo’e kuéra niko ojapo, ojejapo’ỹ arã pytu’uha árape ave.

Ha’e katu he’i ichupe kuéra: Ndapeikuaái nga’u piko mba’épa Tupä Ñandejára Ñe’ẽme he’i, David ojapóvo iñembyahýi ramo guare, iñirũ nguéra ndive? Oike hikuái Tupaópe, Abiatar pa’i guasúrõ guare, ha ho’u umi panpe Tupã Ñandejárape oñemboyke va’ekue ha pa’ínteva ikatúva ho’u, ha ome’ẽ avei iñirũ nguérape.

He’i avei ichupe kuéra: Pytu’uha árako ojejapo va’ekue yvypórape guarã, ndaha’éi yvypóra pytu’uha árape guarã. Upévare che, yvypóraicha aju va’ekue, areko che pópe ha’évo mba’e mba’épa ikatu ojejapo pytu’uha árape.

Ñandejára Jesucristo Ñe’ẽ