LECTURAS: MARTES 3º DURANTE EL AÑO

LECTURAS: MARTES 3º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe  2, 5-12

Che Pehẽnguekuéra: Tupã Ñandejára nomoĩri va’ekue hemimboukuéra poguýpe pe ñande reko tenonderãvévo guarã, ñañe’ẽha hína. Upéva rangue, Tupä Ñandejára ñe’ẽme oime peteĩ hendápe he’iha: “Máva piko yvypóra ne mandu’a haguã hese? Máva piko yvypóra rejepy’apy haguã hese?

Sapy’ami remomichĩve va’ekue ne remimbou kuéragui, upéi rehupi yvate ha remomba’e guasu. Opa mba’e remoĩ ipyguýpe”. Ha upéicha, omoĩvo Tupã Ñandejára opa mba’e ipyguýpe, ndohejái mba’eve oñapytĩ’ỹre ijehe.

Ndajahechái jepe upéichaha. Ha jahecha mba’éichapa Jesús, Tupã Ñandajára omomichĩmive va’ekue sapy’ami hemimbou kuéragui, yvate ohupi ha omomba’e guasu ichupe, pe omano haguéicha omano rupi.

Tupã Ñandejára, ohechaukávo imborayhu ñande rehe, oheja omano ñande rehehápe. Opa mba’e oĩ Tupã Ñandejárape guarã ha Tupã Ñandejára ojapógui, oipotáva opa ta’ýra oike heko mimbipápe. Upévare Tupã, Jesucristo ohasa asy rupi, ojapo va’erã va’ekue ichugui  peteĩ ivai’ỹva mba’evépe, oporopysyrõva.

Opavave niko peteĩnte itúva, umi imarangatúva ha pe oporo momarangatúva. Upévare, Tupã Ñandejára Ra’y notĩri he’i haguã hesekuéra ipehẽngueha. He’i háicha Ñandejára Ñe’ẽme: “Nde rehe che mandu’áne che pehẽnguekuérape, ha rogueropurahéine umi aty guasuha rupi.”

Tupã Ñandejára Ñe’ẽ.

SALMO ÑEMBOHOVÁI   8, 2ab. 5-9

R. Tupã ore Jára, herakuã porã ite nde réra ko yvy ape ári.

Tupã ore Jára, herakuã porã ite nde réra ko yvy ape ári.

Yvága peve oguahẽ, ha’e che jupe:

Máva piko yvypóra, ne mandu’a haguã hese? R.

Michĩ remomichĩve tekove yvágape guágui, ha yvate ichupe rehupi ha rembotuicha.

Mburuvicha ramo remoí ichupe ne rembiapokue ári, opa mba’e ipo guýpe remoĩ. R.

Ovecha ha guéikuéra, ha opaichagua tymba saite, guyrakuéra yvágare ovevéva,

pira ha opa umi mba’e ýpe oikóva. R.

ALELUIA Cf. 1Tes 2, 13

Aleluia.

Pejapyhy Tupä Ñandejára ñe’ë ha ani yvypóra ñe’ëicha,

katu pe añete háicha. Tupä Ñandejára ñe’ë ramo.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       1, 21-28

Upe ramo Jesús oguahẽ Cafarnaúmpe, ha pytu’uha árape oike pe judíokuéra tupaópe, ha oñepyrũ oporombo’e. Opavave ohecha ramo joa ite mba’éichapa ha’e ombo’e ichupekuéra.

Jesús niko nombo’éi umi Moisés rembiapoukapy mbo’eha ombo’e háicha. Ha’e oporombo’e ku noikotevẽí ramo guáicha avavére oporombo’e haguã. Ha upe judíokuéra tupaópe, oĩ peteĩ kuimba’e oguerekóva mba’epochy, ha upéva osapukái: Mba’ére piko reñemoĩ ore rehe, Jesús Nazaretgua? Reju piko ore rundívo?

Che roikuaa. Nde hína pe imarangatúva, Tupã Ñandejára omboúva.

Jesús oja’o pe espíritu añáme ha he’i ichupe: Ekirirĩ ha esẽ pe kuimba’égui!

Pe mba’epochy oityvyro mbarete pe kuimba’épe, ha osapukái hatãvo osẽ ichugui. Opavave oñemondýi ha he’i joa ojupe: Mba’éichagua ñe’ẽ piko ãva? Oikuaa porãhápe ha pokatúpe ko kuimba’e he’i umi mba’epochýpe osẽ haguã, ha ha’e kuéra ojapo ha’e he’íva!

Pya’e voi herakuã Jesús opa rupi Galiléa jerekuévo.

Ñandejára Jesucristo Ñe’ẽ